भांगरभूंय | प्रतिनिधी
पुजा नायकाक तीन दिसांची पुलीस कोठी
फोंडेंः फाटले कितलेशेच दीस गाजत आशिल्ल्या सरकारी नोकरी दिवपाचें हांयस दाखोवन लाखांनी रुपयांक तोपी घाल्ले पुजा नायक हिका म्हाड्डोळ पुलिसांनी केरी- फोंडेंच्या श्रीधर सतरकार हांकां आत्महत्या करपाक प्रवृत्त केल्ले खातीर पुलिसांनी शेनवारा अटक केली. पुजा नायक हिका न्यायालयान तीन दीस पुलीस कोठयेंत दवरपाचो आदेश दिला.
मजगतीं, म्हाड्डोळ पुलीस स्टेशनार दोन तरणाट्यांक सरकारी नोकरी दिवपाच्या बदला अदमाशेक 14 लाख रुपया घेवन फटवणूक केल्ल्या प्रकरणांत पुजा नायक आनी अजीत सरकार हांकां अटक जाल्ली. पूण केरी हांगासरल्या श्रीधर सतरकार हांणी आत्महत्या केल्ल्यान पुजा नायक हिचे आड म्हाड्डोळ पुलीस स्टेशनार गुन्यांव दाखल केल्लो. ते प्रमाण तिका शेनवारा अटक केली.
सतरकार आत्महत्या प्रकरणांत पुलिसांनी पुजा नायका आड गुन्यांव नोंद केला. पुजा हिका दिवचल आनी पर्वरे पुलिसांनी अटक केल्ली. शेनवारा पुलिसांनी पुजा नायकाक अटक करून आयतारा न्यायालयांत हजर केली तेन्ना न्यायमुर्तीनी तिका तीन दीस पुलीस कोठयेंत दवरपाचो आदेश दिलो. निरिक्षक योगेश सावंत हे विशींचो फुडलो तपास करतात.
मजगतीं, ह्या पयशे घेवन सरकारी नोकरी दिवपाचे हांयस दाखोवन हाचे पयलीं पुजा नायक हिचे सयत पुजा यादव आनी दीपश्री सावंत गांवस हांकांय अटक केल्या. तांणी लेगीत लाखांनी रुपयांची लोकांक तोपी घाल्या. पुजा यादवान रेल्वेंत नोकरी दिता म्हूण सांगून लोकां कडल्यान पयशे घेवन तोपी घाली. तशेंच दीपश्री सावंत गांवस हिणेंय सरकारी नोकरीचें हांयस दाखोवन लोकांक तोपी घाल्या. सद्या तिगूय जाण पुलीस कोठयेंत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
