भांगरभूंय | प्रतिनिधी
मनीस सभावांत कांय गूण दोश आसतात. तांतूतलो एक दोश म्हणल्यार सर करप. अशेंच कांय जाण श्रीकृष्ण आनी गौतम बुद्ध हांची सर करतात. बुद्ध कसो उंचेल्या पांवड्यांचो आनी श्रीकृष्णाचेर टिका करपी लोक आसात.
श्रीकृष्ण आनी गौतम बुद्ध हांची सर करप कितलें योग्य?
श्रीकृष्ण वेद व्यास हांणी उबी केल्ली एक व्यक्तीरेखा. तिची रचनाय देख दिवपाक केल्ली. तो आदर्श. जाल्यार दुसरे कडेन सुमार पांचव्या शेंकड्यांत जल्मल्लो एक राजकुंवर.
एक आदर्श व्यक्तीरेखा जाचे भितर देवत्व आसा आनी एक हाडां मासाचो मनीस हांची सर करप अशक्य. कारण मनीस चुको करीत शिकता. मनशां भितर आशिल्ले सगळे गूण अवगूण ताचे भितर आसात. बुद्ध मनशा भशेन वागता. श्रीकृष्ण आदर्श वागता.
देख दिवपाचें जाल्यार, नरकासूर ह्या असुरान 16 हजार बायलांक बंदी करून दवरिल्लीं. पयलींच्या तेंपार घुरी घालतना वा झूज जावन हारिल्ल्या राज्यांतल्या वा प्रांतांतल्या बायलांक बंदी करून हाडपाची पद्दत आशिल्ली. नरकासूराक मारतकच ह्या 16 हजार बायलांक श्रीकृष्णान आपलें नांव दिवन सन्मान दिल्लो, अशी नोंद आसा. दुसरे वटेन बुद्ध, जो निकतीच बाळांत जाल्ले बायलेक सोडून गेल्लो. इतलेंच न्हय जांणी गौतम बुद्धाच्या वागणुकेचो अभ्यास केला तांकां एक गजाल होलमल्या आसतली, ती म्हणल्यार बुद्धाक बायलां आवडनाशिल्लीं.
पुराय बायलजातूच नाका आशिल्ली. कित्याक काय? हाची जाप घडये ताच्या मनांत खोल भितर पितृसत्ताक विचारसणीच आशिल्ली. ह्या विचारसरणेक मानपी लोक बायलांक उणाक मानतात. सुरवातेक बुद्धान बायलांक दिक्षा दिली ना. जेन्ना दिली तेन्ना खूब कडक नेम केले.
जरी दया, करुणा हाचो प्रचार केलो, अहिंसेचो प्रचार केलो, पूण मनांत बायल जाती विशीं भयंकर द्वेश आशिल्लो हें सत. मनशाचें कतृत्व कितलेंय असादारण आसूं, निमाणे कडेन मनीस हो मनशां भशेन सादारण आसता. देव जायना. बुद्धान बायलांचो कितलो द्वेश केलो हाचे विशीं दुर्गाबाई भागवत हांच्या ‘एैसपैस गप्पा दुर्गाबाईंशी’ ह्या पुस्तकांत वाचूंक मेळटा. दुर्गाबाई भागवत हांणी बौद्धधर्माच्या नेमाचेर अभ्यास केला. देखून तांकां चडश्या लोकांक खबर नाशिल्ली बुद्धाची एक बाजू कळ्ळी. पूण हे खातीर गौतम बुद्ध वायट थारना. संवसाराक अहिंसेचो मंत्र दिवपी येद्या व्हड मनशा भितर बायलां विशीं आकांताचो राग आशिल्लो हें सत.
श्रीकृष्णान अर्जुनाक झूज कर असो उपदेश करीत भगवदगीता सांगली. जाल्यार सम्राट अशोका सारको पराक्रमी राजा बौद्ध जालो. ताणें झूज जिखून संन्यास घेतलो अशें उदाहरण दिवन एक विशिश्ट गट श्रीकृष्णा आड बुद्ध अशें चित्र उबें करतात. हो युक्तीवाद कितलो मेरेन खरो?
पयलें म्हणल्यार महाभारतांतलें झुज आनी सम्राट अशोक हांचीं झुजां हातूंत खूब फरक आसा. सम्राट अशोका सारके राजा आपलें राज्य वाडोवपाक दुसऱ्या राज्यांचेर घुरी घालताले वा झूज करताले. महाभारतांतलें झूज हें अन्याया आड केल्लें झूज. श्रीकृष्णान अर्जुनाक अहिंसा शिकोवपाची अशेंय कांय लोक म्हणटात. पूण श्रीकृष्णान खंय अर्जुनाक हिंसा कर म्हणल्या? फकत आपलें कर्तव्य कर अशें सांगलां, तेंय अनासक्त जावन.
हांव ह्या दोनूय व्यक्तीमत्वां कडेन कशें पळयतां? सर करिनासतना तांणी कसले विचार दिले हाचो विचार करप म्हत्वाचें. एक सत्याच्या सोद घेवपाक घर-दार सोडून गेल्लो राजकुंवर, जाका कडक तपस्या करतकच ‘मध्यम मार्ग’ आपणावचो हो साक्षात्कार जालो आनी दुसरे कडेन दैवत्व आशिल्लो श्रीकृष्ण हाणें सांगलें भावने परस कर्तव्य श्रेश्ट. अध्यात्म समजुपाक घर दार सोडपाची गरज ना. ‘गृहस्थ उच्यते’. सामान्य मनीस हो संन्यासा परस व्हडलो- ‘उच्यते’. सुवार्थ सोडप म्हणल्यारूच संन्यास घेवप.
संपदा कुंकळकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
