भांगरभूंय | प्रतिनिधी
भारताचे बॅडमिंटन खेळगडे किदाम्बी श्रीकांत आनी एच एस प्रणय हांणी बीडब्ल्युएफ जपान ओपन सुपर 750 बॅडमिंटन सर्तीचे प्री-क्वॉर्टरफायनलींत सुवात मेळयली. जाल्यार बायलांच्या गटांत आकर्षी कश्यप हारली. तिका जपानाची स्टार खेळगडी अकाने यामागुचीन हारयली.
मजगतीं, श्रीकांतान पयले फेरयेंत तायवानच्या चोउ तीएन-चेन हाका 21-13 आनी 21-13 अशा सरळ गेमींनी हारयलो. जाल्यार संवसारीक क्रमवारींत 10वे सुवातेर आशिल्ल्या प्रणयान चीनाच्या ली शिफेंगा आड 21-17 आनी 21-13 अशा फरकान जैत जोडलें. प्री-क्वॉर्टर फायनलींत प्रणय भारताच्या श्रीकांता आड खेळटलो.
बायलांच्या एकोड्या गटांत आकर्षी यामागुची आड 21-17 आनी 21-17 अशा फरकान हारली.
बायलांच्या दोट्टी गटांत त्रेसा जॉली आनी गायत्री गोपिचंद हे भारताचे जोडयेन जपानाचे सयाका होबारा आनी सुइजू हे जोडये आड पयली गेम हारून लेगीत उपरांत जबरदस्त पुनरागमन केलें. त्रेसा-गायत्री जोडयेन जपानाचे जोडयेक 11-21, 21-15 आनी 21-14 अशा तीन गेमींनी हारयली.
मिश्र गटांत रोहन कपूर आनी एन सिक्की रेड्डी हे जोडयेक पयले गेमींत आघाडी घेवन लेगीत अखेरेक हार घेवची पडली. ताका तायवानाचे होंग वेई आनी ली चिया ह्रिस कडल्यान 21-18, 9-21 आनी 18-21 अशा फरकान हार घेवची पडली.
सिंधू आनी सात्विक-चिराग हांच्यो मॅची आयज जातल्यो. संवसारीक क्रमवारींत 17वे सुवातेर आशिल्ली सिंधू पयली मॅच 20वे सुवाते वयले झांग यी मान हिच्या आड खेळटली. सिंधू सध्या फॉर्मा खातीर झुजता. हे सर्ती वरवीं ती फॉर्मांक येवपाक इत्सूक आसतली.
दादल्यांच्या दोट्टी गटांत सात्विक साईराज रंकीरेड्डी आनी चिराग शेट्टी ही भारताची जोडी आयज पयली मॅच खेळटली. तांची मॅच इंडोनेशियाचे लियो रॉली कारनांडो आनी डॅनिएल मार्थिन हांच्या आड जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
