भांगरभूंय | प्रतिनिधी
अजय देवगानाच्या ‘मैदान’ चित्रपटाचो रेकोर्ड मोडला
मुंबय, खबरां संस्था: ‘श्रीकांत’ चित्रपटांत बॉलीवूड अभिनेतो राजकुमार राव हांणी मुखेल भुमिका केल्या. हो चित्रपट दुश्टी नाशिल्लो उद्देगपती श्रीकांत बोल्ला हांचे जिणेचेर आसा. हो बायोपीक शुक्रारा (१० मे) थिएटरांनी आयलो. चित्रपट प्रदर्शत जावन चारूच दीस जाल्या. चार दिसांनी ह्या चित्रपटान बॉक्स ऑफिसाचेर बरेंच जोडलां. चित्रपटान हालींच प्रदर्शीत जाल्ल्या कांय चित्रपटांक कलेक्शनान फाटीं घातलां.
२०२४त प्रदर्शीत जाल्लो हो राजकुमार रावचो पयलोच चित्रपट. ‘श्रीकांत’ ची मनाक स्पर्श करून वचपी आनी प्रेरणा दिवपी कथा लोकांचीं मनां जिखपांत येसस्वी जाल्यां. राजकुमार रावच्या अभिनयाची ताचे फॅन बरीच तोखणाय करतना दिसतात. चित्रपटाक मेळपी प्रतिसाद पळयल्यार ‘श्रीकांत’ बॉक्स ऑफिसाचेर बरेंच जोडटा अशें समजता.
चित्रपटाचे जोडी विशीं…
‘श्रीकांत’न रिलीजच्या पयल्याच दिसा २.२५ कोटी रुपया जोडले. उपरांत दुसर्या दिसा चित्रपटाचे जोडींत ८६.६७ टक्क्यांची वाड जाली आनी तांणी ४.२ कोटी रुपयया जोडले. तिसर्या दिसा म्हळ्यार आयतारा ‘श्रीकांत’चे जोडींत आनीक भर पडून शेनवारचे तुळेंत आनी २५ टक्क्यांनी वाड जाली आनी तांणी ५.२५ कोटी रुपया जोडले. तशेंच ‘श्रीकांत’ रिलीज जाल्ल्या चवथ्या दिसा म्हळ्यार सोमार १.७५ कोटी रुपया एकठांय केल्यात. ह्या आंकड्यां सयत राजकुमार रावाच्या ‘श्रीकांत’ फिल्मान चार दिसांत १३.४५ कोटी जोडले.
‘श्रीकांत’ बॉक्स ऑफिसाचेर सगळ्यांचो आवडटो चित्रपट जाला. अजय देवगानाच्या ‘मैदान’ ह्या सिनेमाचो विक्रम ‘श्रीकांत’ सिनेमान मोडला. ‘मैदान’ ह्या चित्रपटान पयल्या सोमारा १.५ कोटी रुपया जोडले. जाल्यार ‘श्रीकांत’ चित्रपटान १.७५ कोटी रुपया मेळयल्यात. ‘श्रीकांत’ फिल्माची चार दिसांची जोड पळयल्यार ४० कोटींच्या बजेटाचेर तयार केल्लो हो सिनेमा रोखडोच अर्दो खर्च वसूल करतलो अशें दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
