भांगरभूंय | प्रतिनिधी
सुदिन ढवळीकारः माधवराव ढवळीकार ट्रस्टा वतीन बांदतले घरां
भांगरभूंय । प्रतिनिधी
फोंडें: सभापती रमेश तवडकार हांच्या मार्गदर्शक तत्वाचेर सुरू जाल्ले श्रमधाम येवजणेक लागून गरीब लोकांचीं घरां उबीं रावतलीं. श्रमधाम येवजणेचें खरें स्रय सभापती रमेश तवडकार हांकां वता. माधवराव ढवळीकार ट्रस्टा वतीन फोंडें, प्रियोळ आनी मडकय मतदारसंघांत खूब जाणांक घरां बांदून दितले. पूण श्रमधाम येवजणेचो लाव गोंयांतल्या गरीब कुटुंबांक जातलो. तातूंत कोणेच राजकारण हाडचें न्हय, असो उलो वीज मंत्री सुदिन ढवळीकार हांणी मारला.
बांदोड्यां आयोजीत केल्ले पत्रकार परिशदेंत ढवळीकार उलयताले. तांचे वांगडा कार्यकारी अभियंते सुदन कुंकळ्येकार, सहाय्यक अभियंते केशव गावडे, पंच रामचंद्र नायक आनी हेर मानेस्त हाजीर आशिल्ले.
आरजी हो पक्ष न्हय, ती एक बिगर सरकारी संस्था (एनजीओ). दरेका बऱ्या कामाक विरोध करून कामां आडावपाचो ते यत्न करतात. फोंडें वाठारांतलो घाणयाऱ्या उदकाचेर प्रकिया करपाचो प्रकल्प लेगीत तांकां लागून आडावलां. आडपय आनी दुर्भाट वाठारांत कांय दिसां आदीं अचकीत उच्च दाबाक लागून विद्यूत यंत्रणा लासून केल्या. माधवराव ढवळीकार ट्रस्टा वतीन खूबश्या जाणांच्या घरांतली इबाडिल्ली यंत्रणाची दुरुस्ती करपाक सुरवात केल्या. व्हड लुकसाण जाल्ल्या घर धनयांक लुकसाण भरपाय दिवपाचो विचार चल्ला. वाठारांत जाल्ले लुकसाणेची पळोवणी करपाचे आदेश सरकारी अधिकाऱ्यांक दिल्यात., अशें ढवळीकार हांणी सांगलें. पोरण्यो जाल्ल्यो वीज सरयो बदलपाचें काम आनी भुंयगत वीज केबल घालपाचें काम फोंडें म्हालांत 60 टक्के पुराय जालां. कांय वाठारांनी अजून काम चालू आसा, तें बेगिनूच पुराय करतलें. फर्मागुडयेर गोंय अभियांत्रिकी म्हाविद्यालयांच्या प्राकारांत 1 मॅगा वॅट सौर उर्जा प्रकल्प सुरू करतले. फुडल्या 3 म्हयन्यांत कामाक सुरवात करतले. वीज खात्याच्या भुंयगत वीज कॅबल घालपाच्या कामाक लागून लोकांक त्रास जाता. पूण फुडल्या दोन वर्सांत गोंयांतलो वीज खात्याचो कारभार सुरळीत जातलो आनी लोकांक बरी सेवा मेळटली, अशें मंत्री ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
