भांगरभूंय | प्रतिनिधी
आत्मविस्वास म्हणल्यार जियेवपाचें मनोबल… जियेवपाचो आनंद… उर्बा… आनी आशा… आत्मविस्वास हो दृढनिश्चय, जिद्द, सुसंगती आनी कितेंय साध्य करपाच्या यत्नांतल्यान जाणवता. विचारांची वेवस्था करपा खातीर स्वता विशीं, वास्तवा विशीं, जिणे विशींची वृत्ती चड म्हत्वाची जाता. विचारांतली वृत्तीच मनोबल वाडयता. देखून दर एका कृती फाटल्यान आशिल्लो विचार आनी वृत्ती म्हत्वाची.
एक गजाल सांगूं, परिस्थिती कितेंय आसूं, बरो विचार करात. फाटल्या काळांत केल्ल्या येसस्वी कामां खातीर स्वताची तोखणाय करात. सेगीत सकारात्मक विचार आसल्यार तुमचो आत्मविस्वास वाडोवपाकय आदार जाता. तुमकां जें करपाक जाय ताचेर खर विस्वास दवरचो पडटलो. तुमी कितेंय करूं, सोंपें वा कठीण आसूं जैत तुमचेंच आसतलें असो विस्वास..! तुमी स्वता कडेन करतात त्या स्वताच्या संवादांतल्यान तुमी तुमचो विस्वास घटमूट करूंक शकता. भावार्थ ताणपाचें काम म्हणल्यार भंय. कोण कितें म्हणटलो… आमी कितें तरी चुकीचें करतात काय… ह्याच भंयाक लागून आमचें काम करतना आमी घट्ट उबे रावंक शकनात.
विस्वास आनी आत्मविस्वास हीं एकाच नाण्याचीं दोन बाजू. विस्वास हो आत्मविस्वासाची बुन्याद. सगल्यांक तो वाडोवपाचो आसा पूण खरो प्रस्न म्हणल्यार तो कसो वाडोवचो? विचारांचेर नियंत्रण दवरून सकारात्मक विचार करप जेन्ना तुमी तें करपाक लागतात तेन्ना तुमचो भावार्थ घट जाता आनी तुमचो आत्मविस्वास वाडटा.
व्हड शास्त्रज्ञ थॉमस एडिसन हांणी इलेक्ट्रीक दिवो सोदून काडचे पयलीं धा हजार फावटीं अपेसांत पडलो. पूण तो सकारात्मक मनान यत्न करीत रावलो आनी ताका पुरायपणान येस मेळ्ळें. म्हणून म्हाका दिसता आत्मविस्वास मेळोवपाची मुखेल गजाल म्हणल्यार योग्य मार्ग आनी सकारात्मक वृत्ती पयली.
आत्मविस्वास हो एक गूण जो दरेकल्याक उण्या चड प्रमाणांत आसता. आत्मविस्वास तुमकां जियेवपाची उर्बा दिता. तोंडार हांसो सदांच मन खुशाल दवरपाक आदार करता. ध्यान वा एक छंद स्वता भितर आशिल्लो तुमच्या जिवितांत रंग परतून हाडटा. तुमचो आत्मविस्वास वाडटा. सादेपणान सांगपाचें जाल्यार ‘आत्मविस्वास’ म्हळ्यार दिल्लें काम वा आव्हान हांव साध्य करूंक शकता अशी सकारात्मक भावना.
ताका वाडपाचो एक बरो मार्ग म्हणल्यार तुमचे भोंवतणी घडपी नव्या गजालींचो सोद घेवप आनी तातूंत शक्य तितलो वांटो घेवप. गट चर्चा, मेळावे, भाशणां, छंद गट, कार्यशाळा, मंच, हे आनी हेर जायते आमचो आत्मविस्वास वाडयतात आनी नवी म्हायती आनी गिन्याना वांगडाच आमची कुशळटाय वाडयतात. आत्मविस्वास म्हणल्यार कोणूय कितेंय सांगता ताका अस्वस्थ जावंक नासतना योग्य जाप दिवप. तुमी करतात त्या दरेक कृती वांगडा फाटीं फुडें विचार करप.
आत्मविस्वास ना जाल्यार ल्हान ल्हान गजाली खूब कठीण दिसतात. तुमी कितें तरी सुरू केलें. उदा. परिक्षे खातीर शिकपाक सुरवात केली, नवो वेवसाय सुरू केलो, घर बांदपाक सुरवात केली, आनी कोणे तरी म्हणलें, तुमकां हें करप शक्य ना अशें म्हाका दिसता.
आत्मविस्वास आसल्यार अशा उलोवपाचेर लक्ष लेगीत दिवचे नात. तुमी म्हणटले, हांव पळयतां तें कशें जमाना… हांव करतलों, आनी तुमी दुपेटीन जोश घेवन काम करतले… आत्मविस्वास ना जाल्यार तुमकां भंय दिसतलो. तुमकां स्वताचेर दुबाव येवपाक लागता. आमी कितले कश्ट करतात तें म्हत्वाचें आसा अशें म्हाका दिसता. पूण ताचे परस चड खंयचेंय काम आत्मविस्वासान करपाक मेळ्ळें जाल्यारूच आमी खात्रीन येस मेळोवंक शकतले.
स्वताच्या विचारांचेर, कर्तुबाचेर, आपली तांक आनी निर्णयांचेर विस्वास दवरप म्हळ्यार आत्मविस्वास. खर निर्णय घेवप. दीसपट्ट्यो कार्यावळी वा धोक्याचीं कामां करपा खातीर निर्णय घेवपाक आनी त्या निर्णयांचेर वागपाक स्वताच्या निर्णयाचेर विस्वास दवरप गरजेचें.
आत्मविस्वास आनी तांक आसल्यार येस मेळूंक शकता. सेगीत स्वता कडेन उलयत रावत जाल्यार आमचो आत्मविस्वास वाडयता. आमी करपाक शकतात हाची परत परत आमच्या मन आनी मेंदवाक याद करून दिवप. जिणेंतल्या सुखी, येसस्वी घडणुकांचो उगडास करून मनाक उर्बा दिवप.
वाचन हो एक अणभव. जाका लागून आमचो आत्मविस्वास वाडटा, आनी ताचे खातीर वेगळ्यावेगळ्या विशयां वेलीं पुस्तकां वाचप, समकालीन आदर्शांचीं चरित्रां वाचप, मुखेल दिसाळीं वाचप उपेगी थारूंक शकता.
वृत्ती- आत्मविस्वास निर्माण करपाक नितळ कपडे घालप आनी वेवस्थीत रावप हेंवूय तितलेंच म्हत्वाचें. तुमी घालतात त्या ड्रेसाचेरूय तुमच्या आत्मविस्वासाचेर परिणाम जाता. सोबीत ड्रेस घालून कोणे तरी त्या ड्रेसाची तोखणाय केल्यार तुमचो आत्मविस्वास वाडटा. वा मनाक बरें दिसता. सेगीत कसल्या तरी बौद्धीक वा कलाकृतींत गुथून आमी आमचे भितरली सुप्त तांक परतून सोदून काडपाक जाय. तातूंतच आमच्या सुप्त तांकीची आमकां नव्यान वळख जाता. दीसपट्ट्या वेव्हारांतल्यान जाणीवपूर्वक वेळ काडून सैमांत भोंवप खूब बरें. छंद करप दीसपट्ट्या कामा भायर फक्त स्वताच्या आनंदा खातीर कांय छंद खेळ म्हणून करप मनांत खोस हाडटा आनी आत्मविस्वास वाडयता.
तुमकां तुमच्या खंयच्याय एका समस्येचेर मात करपाक तुमचो आत्मविस्वास मजत करूंक शकता. आयज संवसारांत व्हड जाल्ले लोक आपल्या आत्मविस्वासाच्या बळार मुखार सरल्यात. आत्मविस्वास आनी आत्मबळाची कळ येसस्वीपणाचें दार उगडटा.
एक खरें सांगूं… हें सगलें आमी कशे आसात ताचे परस आमी कितें विचार करतात ताचेर आदारून आसता. आपल्याक आवडटा त्या गजालीचेर मन केंद्रीत केल्यार तुमचो आत्मविस्वास वाडटा. तुमच्या कृतीचेर आनी निर्णयांचेर विस्वास दवरचो पडटा. हें करपाची तुमची तांक आसा हाची जाणविकाय आसल्यार आत्मविस्वास वाडोपाक वाव मेळटा. आत्मविस्वास हें एक बळगें जी आमच्या चलपांत आनी उलोवपांत सदांच व्यक्त जाता. आमचो आशावाद आमी घट्ट दवरपाक जाय.
गौरी भालचंद्र
9422373926
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
