भांगरभूंय | प्रतिनिधी
2014 वर्साचो कला- संस्कृती खात्याचो कोंकणी साहित्या खातीरचो पुरस्कार नामनेचे साहित्यकार एन् शिवदास हांकां भेटयतना मुखेल सोयरे श्याम बेनेगल.
श्याम बेनेगल दीर्घायुश्यी जावन णव्वदी उपरांत हें जग सोडून गेल्ल्याची बातमी वाचली. ते कोंकणी मनीस. एक सिनेमा निर्माते, दिग्दर्शक, अंकूर आनी कितलेशेच सिनेमा तांच्या नांवार आसात.
वर्स आसलें 2014. गोंय सरकाराच्या कला आनी संस्कृती खात्याचे त्या वर्साचे राज्य पुरस्कार वेगळ्या वेगळ्या प्रकारां खातीर जाहीर जाल्ले. तातूंत साहित्या खातीरचो पुरस्कार म्हाका फावो जाल्लो. एरव्ही 2005 वर्सा म्हाका देशांतले व्डले सरकारी संस्था म्हणल्यार साहित्य अकादेमीचो पुरस्कार फावतकच बाकीचेर पुरस्कार व्हडलेशे लक्षांत उरनात. कला आनी संस्कृती खात्याचो प्रतिश्ठेचो सुमार 1 लाख रुपयांचो राज्य सरकारा व्हडलो पुरस्कार आनी साहित्य अकादेमीचोय पुरस्कार इतलेच मोलाचो, पूण पुरस्काराक मोल नासता, मान आसता आनी हो मान म्हाका राज्य पुरस्कारा पयलीं राष्ट्रीय पातळेर म्हज्या ‘भांगरसाळ’ ह्या कथासंग्रहाक फावो जाल्लो. देखून हांव समाधानी आसलो.
सुदैवान तो मेरेन म्हाका गोंयांतले राज्य पातळे वयले कला अकादमीचे पुरस्कार दोन फावटीं, जनगंगा पुरस्कार, टी एस पै फावंडेशनाचे पुरस्कार अशे साबार पुरस्कार लाबिल्ले. म्हणटकच अशा पुरस्कारांची नवला म्हाका नाशिल्ली. पूण, 2014 वर्सा कला, संस्कृती खात्याचो साहित्य पुरस्कार म्हजे यादींत चड उरलो तो श्याम बेनेगल हे व्यक्तीक लागून. हो पुरस्कार म्हाका तांचे हस्तुकीं प्रदान केल्लो आनी बेनेगल तेन्ना गोंयांत आसले. पुरस्कार भेटवणेचो सुवाळो मिनेझीस ब्रागांझा सभाघरांत सांजेच्या पांच वरांचेर आसलो. वांगडा तेन्नाच कला, संस्कृती मंत्री दयानंद मांद्रेकार आसले. पूण म्हत्वाचे म्हणल्यार प्रत्यक्ष सुवाळ्याक एक वर आसतना आमची च्या पार्टी जाली. थंय श्याम बेनेगल हांकां लागिच्या मेळपाची आनी तांचे कडेन उलोवपाची संद आयली. मजा म्हणल्यार तांकां हांव साहित्य अकादेमीचो वांगडी आनी 2005 चो साहित्य पुरस्कार जोडिल्लो लेखक म्हूण पयलींच म्हायती जाल्ली. आतां देशार वता थंय साहित्य अकादेमीचे पुरस्कार फाव जाल्ले लेखक खूब आदराक आनी मानाक पात्र थारतात. हें हांवें तेन्ना आनीक एके घडणुके वयल्यान पळयलें.
तेन्ना दिगंबर कामत मुख्यमंत्री आसलो. गोंयांत जातल्या इफ्फी खातीर चित्रपट सृश्टींतले खूबशे बरे- बरे नट, नटयो पणजे येतात. अमिताभ बच्चनाची घरकान्न जया बच्चनूय एकदां आयिल्ली. कला अकादमीच्या दालनात भितर सरतना दिगंबर कामतीन जया बच्चनाक म्हजी वळख करून दिली. तिणें म्हाका स्मायल केलें आनी फुडें वतले तितल्यान दिगंबरान तिका सांगलें, ‘ही इज अवर साहित्य अकादेमी अवार्ड विनर कोंकणी रायटर’ आनी मुख्यमंत्री दिगंबराचीं हीं उतरां आयकना फुडें जया बच्चन जी फुडें वताली ती थांबली आनी म्हजे कडेन लागीं येत तिणें म्हाका हात दिलो.
हे प्रसंग थंय वाटेर तिका पळोवंक राविल्ल्यांनी पळयलो आनी देशांत साहित्य अकादेमी पुरस्कार जोडणाऱ्या लेखकाक केदें वजन खास करून साहित्या कडेन नातें आशिल्ल्या लोकां मदीं आसता तें कळ्ळें.
हो प्रसंग श्याम बेनेगलाचे भेटेक जुळना, पूण पुरस्कार प्रदान करपाक आयिल्ल्या बेनेगलान च्या घेतना म्हजे कडेन कोंकणींत मुखेल प्रवाह कशे व्हांवतात ते संबंदी विचारपूस केली आनी कोंकणींत बरें नवें साहित्य उजवाडाक येता तें आयकून ताका कोंकणी मनीस म्हूण खोस जाली.
श्याम बेनेगल तेन्ना ऐंशी वर्सांचे आसुये, पूण घटमूट आसले. बरे चलताले. तांच्या सांगातान काडिल्ले खूबशे फोटो म्हज्या आता संग्रहांत आसात, तांकां काल उजाळो गावलो. श्याम बेनेगर हे प्रयोगशील दिग्दर्शक, तांचे सगलेच सिनेमा हांवें पळोवंक नात, पूण पळयल्यात ते खूब भाराविल्ले अशे कलात्मक सिनेमे आसात.
श्याम बेनेगलाच्या मरणान एका कलात्मक पर्वाचो काळ सोंपला. सिनेमा हे फुडाराकय येत रावतले, पूण श्याम बेनेगल परत जावचे नात. जाणें आमकां, कोंकणी लोकांकय अभिमानाचें दायज कोंरातून दवरलां. तांकां म्हजीं आर्गां.
– एन शिवदास
94224 17233
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
