भांगरभूंय | प्रतिनिधी
अॅड. एन. नोरोन्हा हांकां 2 लाखांचें लुकसाण
भांगरभूंय । प्रतिनिधी
म्हापशें: म्हापश्यां पोरण्या आझिलो हॉस्पिटला लागसार आनंदवन इमारतींतल्या आरके लॉ फर्म ह्या अॅड. एन. नोरोन्हा हांच्या मालकेच्या कार्यालयाक उजो लागलो. तातूंत सुमार 2 लाखांचें लुकसाण जालें.
ही घडणूक सोमारा 28 ऑक्टोबराक दनपारां 12.30 वरांच्या सुमाराक शॉर्ट सर्किटाक लागून घडली. ह्या वेळार ते इमारतीच्या पयल्या माळ्या वयल्या कार्यालयांत विराज नांवाचो कामगार आशिल्लो. अचकीत कार्यालयांतल्या एसी यंत्रणेंत शॉर्ट सर्कीट जालें आनी रोखडोच उजो लागलो.
कार्यालयाक उजो लागताच कर्मचारी विराज हांणी भायर धांव मारली आनी उजो पालोवपी दळाक हाची खबर दिली. म्हापशेंच्या उजो पालोवपी दळाचे जवान थंय पावले ते मेरेन पुराय कार्यालय धुंवरान भरिल्लें. जवानांनी जनेलांतल्यान उदकाचो फवारो मारून उजो नियंत्रणांत हाडलो. ते उपरांत दळाचे उपअधिकारी प्रकाश कान्नायक हांणी ऑक्सिजन सिलिंडर घालून भितर प्रवेश केलो आनी उजो पालयलो.
हे दुर्घटणेंत कार्यालयांतले फर्निचर, कागदपत्रां आनी हेर वस्तू लासून गेल्यो. हाका लागून सुमार 2 लाख रुपयांचें लुकसाण जालें. उजो पालोवपी दळाचे अधिकारी गणेश गोवेकार, उपअधिकारी ज्ञानेश्वर सावंत, उपअधिकारी प्रकाश कान्नायक हांच्या फुडारकपणा खाला योगेश आमोणकार, प्रविण गोवेकार, देवेंद्र नायक, संजू कोरगांवकार, दिलीप सावंत, जितेंद्र नायक आनी भिकाजी काळोजी ह्या पंगडान उजो पालयलो. घडणुकेची म्हायती मेळटाच थळावे नगरसेवक प्रकाश भिवशेट हांणी भेट दिवन पळोवणी केली. म्हापशें पुलीस उपनिरिक्षक दत्तप्रसाद पंडीत हांणी सांगात्या वांगड्या घडणुकेचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
