भांगरभूंय | प्रतिनिधी
गॅस सिलिंडराचो स्फोट जाल्ल्यान घराचें लुकसाण
भांगरभूंय | प्रतिनिधी
फोंडें: गाळवाडो- प्रियोळ बिरेस्तारा मध्यान रातीं शॉर्ट सर्किटाक लागून एका घराक उजो लागलो. ह्या उज्यांत कुडींत वापरूंक नासतना आशिल्ल्या गॅस सिलिंडराचो स्फोट जालो आनी पुराय घराचें लुकसाण जालें. बिरेस्तारा रातीं हें पुराय कुंटुंब आपल्या सोयऱ्यांच्या घरा गेल्ले ताका लागून घरांत कोणूच नाशिल्लो. उज्यांत भांगराच्यो वस्ती, पयशे, कपडे, आयदनां, पुस्तकां आनी हेर साहित्य मेळून आनी सुमार 15-20 लाखांचें लुकसाण जालें.
कांय दिसां आदीं आपल्या 14 वर्सां पिरायेच्या भुरग्याची शस्त्रक्रिया केल्या उपरांत पुराय कुटुंब सीमेपायण- मंगेशीच्या काकाच्या (चुलत्याच्या) घरा रावताले. कांय दिसां आदीं शस्त्रक्रिया केल्ल्या भुरग्याक दोंगराळ वाठारांतल्या घरांत यो- वच करपाक कठीण जातलें हें चितून पुराय कुटुंब घराक कुलूप करून काकाच्या घरा रावपाक गेले. ताचे उपरांत उजो लागपाची ही घडणूक घडली. हें घर दोंगराळ वाठारांत आशिल्ल्यान उजो लागिल्ल्याचें कोणाचेच नदरेक आयलें ना. पूण, पुराय घरांत उजो पातळ्ळें उपरांत कुडींत वापरूंक नासतना आशिल्ल्या गॅस सिलिंडराचो स्फोट जालो. तेन्ना व्हड आवाज जाल्ल्यान शेजाऱ्यांनी घरा कडेन धांव घेवन उजो पालोवपाचो यत्न केलो, तशेंच कुंडय उजो पालोवपी दळाक आपयलो. हें घर दोंगराळ वाठारांत आशिल्ल्यान कर्मचाऱ्यांक उजो पालोवपा खातीर खूब कश्ट करचे पडले. गॅस सिलिंडराच्या स्फोटाक लागून घराचे बरेंच लुकसाण जालां जाल्यार उरिल्ल्यो घराच्यो वण्टी कोसळपाच्या वाटेर आसात. उजो पालोवपी दळान उजो नियंत्रणांत हाडलो. पूण तो मेरेन बरेंच सामान उज्यांत लासून सुमार 15-20 लाखांचें लुकसाण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
