भांगरभूंय | प्रतिनिधी
शैलेश नायक आनी नरेश असोल्डेंकार हे जोडयेन गोवा वॅटरन्स क्रिकेट असोसिएशना वतीन घेतिल्ले डबल विकेट क्रिकेट सर्तीचें वस्तादपण जोडलें.
फायनलींत शैलेश-नरेश जोडयेन राजू दाभोळकार आनी अभिजीत तळेकार जोडयेक हारयली. सर्त मडगांव क्रिकेट क्लबाच्या डॉ. राजेंद्र प्रसाद स्टेडियमाचेर जाली.
शैलेश-नरेश जोडयेक 25 हजाराचें इनाम आनी करंड फावो जालो, जाल्यार उप वस्ताद राजू-अभिजीत जोडयेक 15 हजार आनी करंडाचेर समाधान मानचें पडलें. इनाम भेटवण सुवाळ्याक गोंय क्रिकेट असोसिएशनाचे सचीव रोहन देसाय, मडगांव क्रिकेट क्लबाचे अध्यक्ष योगेश नायक हे उपस्थीत आशिल्ले.
सर्तींत बरें प्रदर्शन करपी पांच जोडयांक अखील भारतीय सर्ती खातीर गोंय क्रिकेट असोसिएशना वतीन धाडटले अशी म्हायती रोहन देसायान ह्या वेळार दिली. रुद्रेश शर्मा सर्तींतलो उत्कृश्ट फिल्डीर थारलो. चंद्रकांत घाडी आनी किशोर कडेकार, समीर नायक आनी विशाल तोरस्कार हे उपांत्य फेरये मेरेन पाविल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
