शेशशायी अनंत

भांगरभूंय | प्रतिनिधी

आमच्या गोंयांत मेजक्याच घरानी अनंत चतुर्दस हें व्रत भक्तीभावान करतात. आयज हो उत्सव जातलो. अनंत हें विष्णूचें एक नांव. ताचीच ह्या दिसा पूजा करतात. कांय वाठारांनी गणपती ह्याच दिसा विसर्जीत करतात. घरांत सुख, शांती, ऐश्वर्य, गिरेस्तकाय येवची. घरांतल्या मनशाची भलायकी बरी उरची, ताका चड आयुश्य मेळचें हे खातीर हें व्रत करतात. ते मनां पसून केल्यार ह्याच जल्मांत गोड फळ मेठला, अशें आमच्या पूर्वजांनी म्हणलां. तांचे हे शब्द लाखमोलाचे समजुया.
ह्या व्रताची खाशेली गजाल म्हणल्यार 14 तराचीं फुलां, फळां, कड्डणां हांचो नैवेद्य दाखोवन धाग्या सयत अनंत देवाची पूजा करतात. धागो म्हणल्यार देव अनंत अशी भावना. उदकान भरिल्लो तांब्याचो कलश, तातूंत अनंताची प्रतिमा दवरून हें व्रत करतात. रेशमी तांबड्या रंगाच्या दोऱ्याक 14 गाठी मारून उजव्या मनगटाचेर तो बांदतात. तो येवपी सगल्यो आपत्ती संकश्टा पसून त्या मनशाची सदांच राखण करता अशी श्रद्धा आसा.
चौदा दांपत्यांक घरा आपोवन तांकां पाटार बसोवन तांची पाद्यपूजा करतात. हळद, कुकूम लावन तांकां प्रसाद दितात. पूजा, महाप्रसाद जाले उपरांत सांजवेळार विसर्जन करतात. थोडे लोक हें व्रत चौदा वर्सां धरतात. संवळें पाळटात. थोडे कायमचें आजल्म करतात.
गोंयांत भाद्रपदाच्या चौदाव्या दिसा अनंत चतुर्दशीचो उत्सव करतात. गोरगरिबांक दानधर्म करतात. शेजाऱ्यांक महाप्रसादाक आपयतात. सावयवेरेंच्या अनंताच्या देवळांत हो उत्सव शेंकड्यांनी भाविकांचे हाजेरींत मनयतात. हातूंत लोकांचो एकवट दिश्टी पडटा. हिंदू संस्कृतायेंतलो हो व्हडलो उत्सव. ताका चौदर अशेंय म्हणटात. मनगटाक बांदिल्ल्या पवित्र धाग्याक ‘रक्षासुत्र’ म्हणटात. हो धागो सामको अतुट शक्तीचो. अडीअडचणी वेळार तो आपली शक्त दाखयता. संकश्टाचेर मात करपाक बळ दिता. सुखा- समाधानाची जीण जगपाक बरें आरोग्य, धनसंपत्ती दिता.
शेशशायी अनंत महाराज की जय.

– सिद्धी तिळवे