भांगरभूंय | प्रतिनिधी
दसरो जालो म्हणटकच वेध लागतात ते म्हणल्यार दिवाळीचे. दिवाळेची परब आश्वीनवध्य त्रयोदस सावन कार्तीक शुध्द द्वितिया मेरेन पांच दीस मनयतात. धनत्रयोदस, नरकचतुर्दस, लक्ष्मी पुजन आनी हेर सण म्हणल्यार तुळशी लग्न, भावबीज आदीं. उपरांत कालो, जात्रांक सुरवात जाता. नरकासूर हो राकेस आसलो जाणें खूब राजांक मारिल्ले, राणयांक उखलून आपले वांगडा व्हरतालो ताका लागून सत्यभामान कृष्णाच्या सांगातान नरकासूरा कडेन झूज करून ताका मारून उडयलो आनी सत्याचेर जैत मेळयलें. तो दीस चतुर्दस आशिल्लो म्हणून त्यादिसा नरकचतुर्दस अशें म्हणटात. आमी दिवाळी नरकासूर प्रतिमेचो वध करून मनयतात.
हायस्कुलाची समायी परिक्षा सोंपता आनी सुटी केन्ना पडटा हाची उमळशीक तकलेंत आसताली. केन्ना केन्नाय निमाण्या पेपराच्या दिसा तकलेंत नरकासूर आसतालो. तशेंच धोल, तासो वाजपाचो आवाज कानांत घोळटालो. जाका लागून पेपराचेर प्रस्नाची जाप कशीं बरोवं हें सुचनाशिल्लें. सुटी पडले उपरांत तकलेंत नाचतालो तो म्हणल्यार नरकासूर. दीस आसूं वा रात हे फावटी कशे तरेन नरकासूर करतलो हेंच चिंतप मनांत जातालें. आवय, बापूय, काका, चाचा, चाची हांचे फाटीक लागून लागून तणान, साकान नरकासूर करप आनी 5-6 भुरगीं एकठांय जावन(अप्रुप, यतीश, जयनेश, विराज, गंधर्व, कौशीक) गांवांत तो भोंवडान, फांतोडेर ताजें दहन करून, दिवाळी मनोवपाक वेगळीच मजा आशिल्ली. ते खीण परतून येवचें नात. पूण त्यो यादी मात अजूनय काळजांत घर करून आसात.
2017 वर्सा अशेच तरेन गांवचे भाव जमिल्ले कडेन नरकासूर करून, नरकासूर वध सर्तींत वांटेकार जावपाचें थारायलें. ताची वाट गांवचो दरेक तरणाटो फाटल्या कितल्याशाच वर्सां सावन पळयतालो. कुडचडेंचें आमदार निलेश काब्राल (आदले भौशीक बांदकाम मंत्री) हांच्या सहकार्यान युवा दे सांतेरीच्या पंगडाक तेंको मेळ्ळो म्हणल्यार अतिताय जावची ना. रक्तदान शिबीर, क्रिकेट सर्त अश्यो साबार कार्यावळी युवा दे सांतेरीचो पंगड वर्सांन वर्स घडोवन हाडटा.
18 ऑक्टोबर 2019 दिसा कुडचडेंच्या युवा खेळ आनी कल्चरल क्लबान कुडचड्यार नरकासूर वध सर्त आयोजीत केल्ली. शेळवणचो नरकासूर पयलेच फावटी सर्तींत देंवता हे खातीर व्हड संख्येन गांवचे लोक सर्त पळोवपाक आयिल्ले. नेण्टीं धरून जाण्टीं तशेंच माचयेर बशिल्ले आमदार निलेश काब्राल, त्या वेळा वयली असोल्डें पंचायतीची सरपंच सुनिता नायक तशेंच हेर पंच लेगीत नरकासूराची वाट पळयताले. युवा दे सांतेरीचो पंगड पयलेच फावटी नरकासूर वध सर्तींत, कुडचड्यार देंवलो आनी ताका दुसरें इनाम फावो जालें.
2017 सावन 2018, 2019, 2021, 2022 आनी 2023 अशीं साबार वर्सां पंगड नरकासूर वध सर्तींत वांटेकार जालो. 2017 सावन शेळवणचो तरणाटो युवा कलाकार गौरंग दयानंद नायक हांच्या सांगाताक प्रबल वस्त, संकेत नायक मुळे हांकां लागून पंगड घट जायत गेलो. गौरंग नायक हांचे कार्य 2017 सावन आयज मेरेन चलत आसा. जाका लागून दर वर्सा ताजे कलेंतल्यान नवें नवें प्रयोग आनी कला तो लोकां मुखार पावयता. 2024 हें वर्स युवा दे सांतेरी पंगडाचें आठवें वर्स आसा. पंगडाचे अध्यक्ष- चंदन दि. देसाय, सचीव- तुशार मं. नायक, भांडारी- किरण देसाय आनी हेर वांगड्यां सयत गोंयांत वेगळ्यावेगळ्या वाठारांनी जावपी 2024 वर्सा नरकासूर वध सर्तींत व्हड नेटान बरें सादरीकरण करपाच्या हेतान पंगड ग्रामदेवी श्रीसांतेरी मातेक, देव श्रीचंद्रेश्वर भुतनाथाक, श्रीगणपतीक, श्रीशिखेरी राखणदेवाक, देव कुड्डो आज्याक आनी देव दत्तात्रयाक श्रीफळ अर्पण करून तयारेक लागला.
संकेत दि. देसाय
शेळवण
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
