भांगरभूंय | प्रतिनिधी
णव जाणांक अटक, रु. 3.5 लाखांचो म्हाल जप्त
म्हापशें, प्रतिनिधी ः दिवाळेच्या दिसांनी पयशे लावन इस्पिकांनी खेळपाची खूब कुटुंबांनी परंपरा आसा. खास करून उत्तर भारतांतल्या पयशेकार घराब्यांनी. गोंयांतल्या दर्या देगांचेर मात वेगळे पद्दतीचो जुगार रातदीस चालूच आसता. शेळप्यां- धुळेरांत एका बंगल्यांत असोच आॅनलायन कसिनो चलतालो. पुलिसांक ताची म्हायती मेळटकच तांणी थंय धाड घालून णव जाणांक अटक केली. तांचे कडलो साडेतीन लाख रुपयांचो म्हाल जप्त केला. शेनवारा मध्यानरातीची ही घडणूक.
शेळप्यांतलो हो बंगलो मूळ पीटर मिस्कीता हांचो. तांणी तो एकल्याक भाड्यान दिला. ताणें ताका जुगार केंद्राचें रुप दिलां. पुलिसांनी काल अटक केल्ल्यां मदीं मध्यप्रदेश, छत्तीसगढ आनी बिहारांतले तरणाटे आसात. पर्यटक म्हूण ते हांगा आयिल्ले. उत्तर आनी दक्षीण गोंयांत कायदेशीर पद्दतीन जुगार, कॅसिनो आनी हेर खेळ चलतात, मात बऱ्याच घरांनी, बंगल्यांनी, दुकानांच्या माळयाचेर जुगार चलता. कांय जाणांनी थंय यंत्रांय बसयल्यांत. फाटीं मडगांवां असल्याच एका जुगार दुकानाचेर पुलिसांनी धाड घाल्ली.
जात्रांनी चलपी पट बऱ्याच प्रमाणांत कमी जाला, मात ह्या आधुनिक जुगारांक मात ओतो आयलो. गृह आनी पुलीस खात्यान हाचेर कडक कारवाय करची, अशी मागणी पालकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
