भांगरभूंय | प्रतिनिधी
केपें: शेल्डें पंचायतीच्या सरपंचपदार कविता गांवस देसाय हांची बिनविरोध निवड जाल्या.
शेल्डें पंचायतींत 11 पंच वांगड्यां मदले 8 पंच वांगड्यांनी सरपंच दिप्ती नायक हांचे आड अविस्वास थाराव हाडिल्लो. ते उपरांत शेल्डें पंचायतीचो ताबो उपसरपंच प्रमोद गांवस देसाय हांचे कडेन आशिल्लो. मात 27 एप्रीलाक शेल्डें पंचायतींत जाल्ले बसकेंत आठूय पंचांनी कविता गांवस देसाय हांची सरपंचपदार बिनविरोध निवड केली.
ह्या वेळार भौशीक बांदकाम मंत्री तशेंच कुडचडेंचे आमदार निलेश काब्राल, केपेंचे गट विकास अधिकारी अनील नायक आनी हेर अधिकारी हाजीर आशिल्ले.
शेल्डें पंचायतीच्या प्रभागांनी वाड जाल्या. पंचायत घराची सुवातूय उणी पडटा. थंय वाचपघर लेगीत आसा. ताका लागून सुवात पावना. पंचायत घरा खातीर हावसींग बोर्डांत सुवात मागल्या, फुडारांत थंय पंचायत घर उबारपाचो यत्न करतले, अशें काब्राल हांणी ह्या वेळार सांगलें. तेचवरी शेल्डें वाठारांत जीं कामां चालू आशिल्लीं ती पुराय करतलेच तेचवरी नव्या कामांक चालना दितले, अशेंय तांणी सांगलें. मंत्री काब्राल हांचो सदांच आमकां तेंको मेळ्ळा. सरपंच पद हेर पंचांक लागून आपल्याक मेळ्ळां. उदरगतीचीं कामां करतना सगळ्यांक विस्वासांत घेवनूच करतले, अशें कविता गांवस देसाय हांणी सरपंचपदार निवड जाले उपरांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
