भांगरभूंय | प्रतिनिधी
पणजी: फाटल्या कांय वर्सांत पुराय देशभरांत शेर बाजारांत गुंतवणूक करपी लोकां मदीं वाड जायत आसा. शेर बाजारांतले गुंतवणुकींत गोंयचीं बायलां देशांत आघाडेर आसात. नोव्हेंबर 2024 अखेरेक गोंयच्यान शेर बाजारांत गुंतवणूक करपी वट्ट गुंतवणुकदारां मदीं 32.2 टक्के हीं बायलां आशिल्लीं. बायलां गुंतवणुकदारांची राष्ट्रीय सरासरी 24 टक्के इतली आसा. राष्ट्रीय शेर बाजारान जारी केल्ल्या अहवालांतल्यान ही म्हायती मेळ्ळ्या.
मेळिल्ले म्हायती प्रमाण नोव्हेंबर अखेरेक गोंयांतल्यान वट्ट 2 लाख 36 हजार जाणांनी शेर बाजारांत गुंतवणूक केल्या. हातूंत 75 हजार 992 बायलां जाल्यार 1 लाख 60 हजार 8 दादले (67.8 टक्के) आसात. फाटल्या चार वर्सांत गोंयच्या बायलांची गुंतवणुकदारांची टक्केवारी वाडत गेल्या. 2021-22 ही टक्केवारी 29.8 इतली आशिल्ली. जाल्यार 2022-23 त 30.3 टक्के जाल्यार 2023-24 त ती वाडून 31 टक्के इतली जाली.
नोव्हेंबर 2023 अखेरेक गोंया उपरांत मिझोरामांत 31.4 टक्के बायलां गुंतवणूकदार आसात. उपरांत आसाम (29.8 टक्के), सिक्कीम (29.4 टक्के), नागालँड (28.1 टक्के), महाराष्ट्र (27.9 टक्के), तामिळनाडू (27.6 टक्के), गुजरात (27.5 टक्के) ह्या राज्यांच्यो क्रमांक लागता. केंद्र शासीत प्रदेशांत चंदिगढ (31.7 टक्के), दिल्ली (29.9 टक्के), पाँडिचेरी (28 टक्के) हांगा बायलां गुंतवणुकदारांची टक्केवारी चड आसा.
बायल गुंतवणुकदारांचे टक्केवारींत वाड
अहवाला प्रमाण फाटल्या चार वर्सांत पुराय देशांत शेर बाजारांत गुंतवणूक करपी बायलांचे टक्केवारींत वाड जाल्या. 2021-22 ही टक्केवारी 22.7 इतली आशिल्ली. जाल्यार 2024-25 त (नोव्हेंबर अखेरेक) ती वाडून 24 टक्के इतली जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
