शेनवार मेरेन पडटलो पावस, हवामान खात्याचो येलो अलर्ट

भांगरभूंय | प्रतिनिधी

पणजीः दिवाळीत नरकासूर भिजोवन गैरसोय केल्लो पावस आतां शेनवारा मेरेन आसतलो. पणजी वेधशाळेन येलो अर्लट जारी करुन वीज आनी गडगडाटा सयत चड करून सांजवेळा, रातीं पावसाच्यो दडको पडपाचो अदमास उक्तायला. मजगतीं, बिगरमोसमी (1 ऑक्टोबर सावन) पावसाचे प्रमाण सरासरी परस 31 टक्के उणे आसा. आतां मेरेन बिगरमोसमी पावस 3.46 इंच (88.1 मिमी.) पडलां.
अंदूं दिवाळेच्या आदल्या दिसा पावसान हजेरी लायली. ताका लागून नरकासुर कांय प्रमाणांत भिजले. लोकांचीय गैरसोय जाली. सोमारा रातींय पावस पडलो. हवामान खात्यान शेनवार मेरेन पावस पडपाचो अदमास दिलां देखून पडवो आनी भाऊबीजेकूय पावस पडटलो. पावस उणो आशिल्ल्यान शेतकी आनी बागायतीचेर परिणाम जावचो ना अशी म्हायती कृशी खात्याच्या अधिकाऱ्यांनी दिली.
फाटल्या चोवीस वरांत गोंयांत 18.7 मीमी पावसाची नोंद जालां. एकूण पावस 3.46 इंच (88.1 मीमी) जालो.
सोमारा रातीं सांखळे सगळ्यांत चड 1.71 इंच (43.6 मीमी) पावसाची नोंद जाली. उपरांत पेडणें 1 इंच (26.8 मीमी), काणकोणां 24.2 मीमी, केपें 20 मीमी, मुरगांव 18.8 मीमी, दाबोळे 14.2 मीमी, म्हापशें 14.2 मीमी, फोंडें 4.8 मीमी, धारबांदोडें 9.4 मीमी, सांग्यार 2.9 मीमी पावसाची नोंद जाल्या.
1 ऑक्टोबर सावन आतां मेरेन पेडणें सगळ्यांत चड 7.26 इंच (184.6 मीमी), सांखळे 4.03 इंच, (102 मीमी), धारबांदोडें 4 इंच (99.6 मीमी), वाळपय 3.46 इंच (88.1 मीमी), काणकोणां 89.2 मीमी, केपें 80 मीमी, मुरगांव 77.2 मीमी, दाबोळे 58.4 मीमी, म्हापशें 73.6 मीमी, फोंडें 35.8 मीमी, धारबांदोडें 99.6 मीमी, सांग्यार 63.8 मीमी पावसाची नोंद जाल्या.