भांगरभूंय | प्रतिनिधी
भांगरभूंय । प्रतिनिधी
मडगांवः मडगांव शारांतल्या श्री हरी मंदिर देवस्थानाची 114वे दिंडी महोत्सवाक सुरवात जाल्या. मुखेल दिंडी शेनवार 25 नोव्हेंबराक जातली. उत्सवाचो समारोप आयतार 26 नोव्हेंबराक जातलो.
दिडें निमतान मंगळार 21 नोव्हेंबराक सांजे 5 वरांचेर बाल कलाकार, वास्को वतीन भजन संध्या कार्यावळ जातली. सांजे 7 वरांचेर संदीपबुवा मांडके हाचे कीर्तन जातलें. 22 नोव्हेंबराक सांजे 5 वरांचेर श्री विठ्ठळ रखुमाई महिला संघ, बोरये हाचे वतीन ‘चंद्रभागेच्या तिरी’ ही भक्ती संगिताची कार्यावळ उपरांत 7 वरांचेर मांडके हाचे कीर्तन जातलें. 23 नोव्हेंबराक सांजे 5 वरांचेर तुळशी परिवार गोंय हांची भजनाची कार्यावळ जातली उपरांत मांडके हाचे कीर्तन जातले. 24 नोव्हेंबराक सांजे 7.30 वरांचेर मांडके हाचे कीर्तन जातलें.
हरी मंदिराचे मुखेल दिंडीची सुरवात शेनवार 25 नोव्हेंबराक जातली. सकाळीं 7 वरांचेर म्हाभिशेक आनी हेर धर्मीक कार्यावळी जातल्यो. सकाळीं 10 वरांचेर सुरेंद्र शेणवी बोरकार (बोरये) आनी वांगड्यांच भजनाची कार्यावळ जातली. दनपारां 12.30 वरांचेर म्हाआरत्यो आनी म्हाप्रसाद जातलो. सांजे 5 वरांचेर वारकरी सांप्रदाया वतीन भजनाची कार्यावळ जातली. सांजे 6.15 वरांचेर श्री माऊलीची धर्मीक ग्रंथा सयत श्रींच्या रथांत स्थापणूक जातली. सांजे 6.30 वरांचेर श्री हरी मंदिरा सामकारच्या माचयेर मुखेल निमंत्रीत गायक संपदा कदम माने (मुंबय) आनी सौरभ काडगांवकार (पुणे) ह्या कलाकारांची पयली गायन बसका जातली. रातीं 8 वरांचेर वास्कोचे नामनेचे दिंडी आयोजक बाबू गडेकार संचलीत श्री दामोदर बोगदेश्वर दिंडी पथकाची आनी निमंत्रीत वारकरी भजनी मंडळा सयत रखुमाई रथाचें प्रस्था हरी मंदिरा कडल्यान जातलें. रातयां 9.30 वरांचेर युको बॅक, न्यू मार्केट हांगच्या माचयेर आमंत्रीत गायक आनी वादकांची दुसरी गायन बसका जातली.
रातयां 11 वरांचेर मडगांव नगरपालिका बिल्डिंगे कडल्या चौकांत गायनाची तिसरी बसका जातली ते उपरांत श्रीच्या दिंडी ऱथाचें श्रीराम मंदिर, श्री दामोदर साल आनी श्री विठ्ठल मंदिर हांगा प्रस्थान जातले. आयतार 26 नोव्हेंबराक दनपारां 12.30 वरांचेर दिंडी रथाचें श्री हरी मंदिरात आगमन, ते उपरांत गोपाळकालो आनी म्हाआरत्यो जातल्यो. रातयां 8 वरांचेर सुस्मिता डवाळकार (मुंबय) हिचे गायन जातलें. सूत्रनिवेदन श्रिया टेंगसे करतलें. गायक कलाकारांक दयानिधेश कोसंबे, राया कोरगांवकार दत्तराज शेट्ये, दत्तराज सुर्लकार, राहुल खांडोळकार, महेश धामस्कार आनी अभिजीत एकावडे हे वादक कलाकार सांथ संगत करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
