भांगरभूंय | प्रतिनिधी
भांगरभूंय । प्रतिनिधी
काणकोणः लोकां खातीर कृशी उत्पादन करपी शेतकार व्हो खऱ्या अर्थान अन्नदातो आसा. ताणे पिकयल्ल्या म्हालाक बरें मोल मेळपाक जाय. मात खणींतल्या मिनाक भाता परस चड पटीन मोल मेळटा. मीन विकल्यार पयशे मेळटले मात अन्न मेळचें ना. आनी मीन कितलो तेप मेरेन मेळटलें, असो प्रश्न करून कृशी उत्पादन करतात ती शेत जमनीचें बिगर शेत जमनीं रुपांतर जाता तें सासणाचें थांबोवपाक जाय, अशें समाज कल्याण मंत्री सुभाष फळदेसाय हाणे सांगलें.
नगर्सें हांगा गोय कृशी उत्पादन विपण्णन मंडळाचे नवे इमारत प्रकल्पाचो बुन्यादी फातोर बसोवपाचे कार्यावळींत ते मुखेल सोयरे म्हणून उलयताले. सुमार साडेतीन कोटी रुपये खर्च करून हो प्रकल्पा बांदतात. ह्या वेळार माचयेर काणकोणचो नगराध्यक्ष रमाकांत नायक गांवकार, कृशी उत्पादन मंडळाचो अध्यक्ष आनी आदलो मंत्री प्रकाश वेळीप, कृशी खात्याचो संचालक नेव्हिल आफोंसो, उपसंचालक संदीप फळदेसाय, उपाध्यक्ष प्रेमानंद म्हांबरे, नगरसेवक हेमंत नायक गांवकार, दक्षीण गोंय जिल्हो पंचायत अध्यक्ष सुवर्णा तेंडुलकार, जिल्हो पंचायत वांगडी शोभना वेळीप, शाणू वेळीप, शिवराम नायक, सत्यवान देसाय, खोलाचो सरपंच अजय पागी आनी हेर मानेस्त आशिल्ले.
गांवगिऱ्या वाठारांत पिकयल्लो म्हाल विकपा खातीर नव्या मार्केटांत शेतकारांक सुवात दिवची जाका लागून तांकां रस्त्याचे कडेन बसून म्हाल विकचो पडचो ना, अशें नगराध्यक्ष रमाकांत नायक गांवकारान सांगलें. गोंय सरकार सदांच शेतकारांचे हित पळयता. गोयांत शेतकारांक मेळपी सुविधा हेर राज्यांत मेळनात असो दावो नेव्हिल आफोंसोन केलो. गोंयातल्या शेतकारांचो म्हाल विदेशांत धाडपाचे नदरेन पॅक हावस सुरू करपाचो विचार आसा अशी म्हायती तांणे दिली.
मार्केटिंग बोर्डाक गोंयच्या चारून चेक नाक्यां वयल्यान वर्सुकी सुमार 13 कोटी रुपयांचो महसूल मेळटा. बोर्ड शेतकारांच्या खंयच्याय म्हालाचें मोल थारायना. मात कांय जाणांनी ते विशीं गैरसमज करून घेतला. 35 कोटी रुपये खर्च करून फोंड्यांत सगळ्यो सुविधा आशिल्लो प्रकल्प उबारला आनी ताचो फायदो गोंयकारांक जाता. हाच्या फुडें ठोक दरान म्हाल विक्री करपाचो प्रस्ताव सरकाराक धाडला अशें प्रकाश वेळीप हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
