शेत जमनींत पर्वरी मलनिस्सारण प्रकल्प

भांगरभूंय | प्रतिनिधी

भांगरभूंय । प्रतिनिधी
म्हापशेंः पर्वरेच्या लोकांनी मलनिस्सारण प्रक्रिया प्रकल्प उबारपाक विरोध केल्या उपरांत आतां हो प्रकल्प गिरी- सुकूर हांगच्या राष्ट्रीय म्हामार्गा कुशीकच्या शेत जमनीत उबारपाचें काम चल्लां. सेरुला कोमुनिदादीची ही जमीन आसा. मलनिस्सारण म्हामंडळान हे विशी सामकी गुप्तता पाळल्ल्यान हे प्रकल्पा विशीं थळाव्या लोकां मदीं संभ्रम तयार जाला.
 मेळिल्ले म्हायती प्रमाण पर्वरे सरकारान 20 कोटी रुपया खर्चाचो मलनिस्सारण प्रकल्पाक 2006 वर्सा चालना दिल्ली. ह्या प्रकल्पा खाला सुकूर, साल्वादोर द मूंद, पेन्ह दी फ्रान्स, पिळर्णय रेईश मागुश, नेरूल  आनी पोबुर्फा ह्या वाठाराचो आसपाव केल्लो. 2020 मेरे ह्या वाठारांत जमनीपोंदच्यान मलनिस्सारण लायन घालपाचें काम पुराय  केलें.
20 एमएलडी तांकीच्या ह्या मलनिस्सारण प्रकल्पा खातीर सुवात मेळनाशिल्ली. ताचे खातीर सुमार 8 हजार चौखण मीटर जागो जाय आशिल्लो. कंदब डेपो आनी सुकूर पठारार व्हो प्रकल्प बांदपाक थळाव्या लोकांनी विरोध केल्लो. ताका लागून हो प्रकल्प म्हापशें मलनिस्सारण प्रकल्पाक जोडपाचो सरकारान यत्न केल्लो. मात म्हापशेकारांनी ताका विरोध केल्ल्यान पर्वरीतलो व्हो प्रकल्प रखडलो.
सद्या सरकारान सुकूर, गिरी आनी सांगोल्डें ह्या तिनूय गांवची शीम आशिल्ल्या सुकूर हांगा सेरुला कोमुनिदादीच्या जमनीत ह्या प्रकल्पाचें काम हातांत घेतलां. ही सुवात पयलीं उदका शुद्धिकरण प्रकल्पा खातीर सरकारान बांदकाम खात्या वरवीं संपादीत केल्ली. सर्वे नंबर 69/1, 69/2, 69/3, 69/5, 69/6, 69/7, 70/3 हातूंत ही सुमार 20 हजा चौखण मीटर शेत जमीन आसा.
हातूंतली साडेबारा हजार चौखण मीटर सुवात आता मलनिस्सारण प्रकल्पा खातीर वापरतले. ही सुवात सर्वे नंबर 69/1, 69/2 व 70/3 हातूतली आसा. ती शेत लागवडी खाला आसा. सध्या हे सुवातेत मलनिस्सारण प्रकल्पा खातीर जमीन खणपाचें काम सुरू आसा. मात प्रकल्पाची म्हायती दिवपी कसलेच तकटे संबंदीत कंत्राटदारान व मलनिस्सारण म्हामंडळान लायिल्ले नात

कृशी जमीन सेटलमेंटांत रुपांतरीत करपाक निर्बंध घालपी विधेयक सरकारा वतीन गोंय विधानसभेच्या अर्थसंकल्पीय अधिवेशनांत हाडपाचें थारलां. मात ताचे पयलींच लागवडी सकयल्ली जमीन मलनिस्सारण प्रकल्पा खातीर वापरांत हाडपाचें  काम सरकारान केलां.