भांगरभूंय | प्रतिनिधी
कालूच हांवें
एक शेत कसलां
कालूच कवितेंत हांवें
एक शेत कसलां
जगाल म्हाका खबर ना
कासरें कांनी हांव नकळो
गुटो काय अळय ??
किदें तें तूंच पळय…
हांव तुमकां खरें सांगतां
जूंव खंयचें रीस खंयची
कांयच म्हाका खबर ना
पूण कालूच कवितेंत
हांवें एक शेत कसलां
दावो काय उजवो
जोरगो काय मेळशिल्लो
गवण पागो दायें
असलें कांय एक
म्हाका खबर ना
पूण कालूच कवितेंत
हांवें एक शेत कसलां
वायंगण काय सरदें
आजगो काय कोंरगूट
हिरीs री री री काय
जा जा sss जा जा
केन्ना किदें म्हणप
म्हाका देव्वोच्यान
तर खबर ना
पूण कालूच कवितेंत
हांवें एक शेत कसलां
थामेलां काय पोटरेलां
पसवलां काय कणशेलां
सारें पयलीं नडणी पयलीं
आसूं नडणी कशीय
तरी कडणो बरो हालता (कवितेंत)
पूण कालूच कवितेंत
हांवें एक शेत कसलां
भाता चाळो मारतना
पांय केन्ना हुलपोंक ना
तणा वरण व्हरतना मानेक
खाज केन्ना पडोंक ना
शेल पालपोणें मडकूळ हिळो
असलें हातीं केन्ना धरूंच ना
पूण कालूच कवितेंत
हांवें एक शेत कसलां
दिपराज सातोर्डेकार
पंचवाडी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
