शेती मनांतल्यान केल्यार ताचो लाव जाताच : संजय पाटील

भांगरभूंय | प्रतिनिधी

आतां शेती करप खूब सोंपी आसा. सगळे तरेच्यो सुविधा हांगा आसात. ते खातीर तरणाटे पिळगेक तातूंत आवड निर्माण जावपाक जाय आनी तांणी मनांतल्यान तें करपाक जाय. हातूंतल्यान खूब फायदो जाता.

कुळागरांत नवी संकल्पना चालीक लावन तातूंतल्यान बरे तरेन येणावळ मेळोवप आनी सैमीक शेतीचो प्रसार करप अशें काम केल्ले खातीर सावयवेरेंच्या संजय पाटील हांकां पद्मश्री पुरस्कार फावो जाला. ते आपल्या भुरगेपणांतल्यान कुळागरांत काम करीत आयल्यात आनी तातूंतच तांकां सैमीक शेतीची आवड निर्माण जाली. तांचें योगदान पळोवन गोंय सरकाराचो तांकां कृषीरत्न पुरस्कारूय फावो जालो आनी आतां भारत सरकाराचो पद्मश्री. ही गोंयच्या शेती मळाक उर्बा दिवपा सारखी गजाल आसा. तांचे कडेन आमी संवाद सादलो तेन्ना तांणी अशें सांगलें:-
श्रम करपाचे संस्कार तुमचेर कशे जाले?
आमची बागायती आशिल्ली, बाबा थंय काम करतालो. देखून घराण्यांत ही संस्कृती आशिल्लीच, त्या भायर मामाल्याय घरा हीच संस्कृती आशिल्ल्यान हातूंत रमप कुस्तार जालें ना. म्हजें शिक्षण मामाल्या घरांतल्यान, म्हणल्यार शिरोड्यां जालें. ल्हानपणा सावन मामाच्या योगदानाचो प्रभाव खूब आशिल्लो. देखून तेच संस्कार आमचेर जाले.
कुळागर करप वा बागायती करप हातूंत कितले श्रम आसतात?
आदीं कुळागरां शिंपपाक खूब त्रास आसताले. फांतोडेर उठून तळ्याचें उदक हाडप आनीक तें कल्ल्यांनी शिंपप, तेंवूंय बी थंडेच्या दिसांनी हें एक व्हडलें संकट आसतालें. पूण आमी तें उमेदीन करताले. हातूंत आमची आवड जाली आनी ती आवड मुखार सरत आसा.
तुमी बागायती संस्थेंतली नोकरी सोडून कुळागरा कडेन गेले, अशें कित्याक?
हे संस्थेंत काम करतना म्हाका शिकपाक खूब मेळ्ळें. मात एक दीस निर्णय घेतलो की आपलें स्वताचें कितें तरी करप आनी ते खातीर काम सोडलें आनी पुरायपणान बागायतीचेर लक्ष दिलें.
तुमी सैमीक शेती विशीं उलयतात, ताचे विशीं सांगशात?
सैमीक शेती विशीं हांवें अभ्यास सुरू केल्लो. गुजरातांत भास्कर नांवाचे एक व्यक्ती आशिल्ले जे सैमीक शेती करताले. तांचे कडेन संपर्क सादून तांच्या फार्माक भेट दिली आनी शिकून घेतलें. तांकां गोंयांत हाडून आमी आनीक चड गजाली शिकून घेतल्यो आनी ताचो प्रसार केलो. सैमीक शेतीचीं तत्वां पाळून आमी मुखार गेले.
सैमीक शेतीचो कसो तरेन फायदो जाता?
सैमीक शेती करताना चड पयशे मोडचे पडनात. खर्च कमी आनी उत्पन्न चड अशी ही प्रक्रिया आसा. ते खातीर सैमीक शेती करप गरजेचें.
बागायती करपा खातीर उदकाची गरज आसता, हें तुमी दोंगराळ वाठारांत अशें मेळयतात?
पावसाच्या उदकाची जतनाय केल्यार उदकाचो उणाव जायना. ते खातीर आमी ताचेर वावर केलो. पावसाच्या दिसांनी व्हांवून वचपी उदक आडावन ताची जतनाय करपाचें काम आमी केलें आनी ताचो लाव आमकां शेती खातीर जालो. उदकाची समस्या हे तरेन पयस जावं येता. खूब तरेचे उपाय हे खातीर आसा. खंयचोय शेतकार हें करपाक शकता, तें लेगीत कमी पयशे खर्च करून.
तुमकां गोंयच्या शेती खात्याचो आदार कितले मेरेन मेळ्ळा?
शेती खात्याचो आदार खूब मेळ्ळा. शेती अधिकाऱ्यां कडल्यान मार्गदर्शन मेळ्ळां, शेती खातीर आशिल्लें अनुदान आनी खूब गजाली ह्या खात्याच्या माध्यमांतल्यान मेळ्ळ्यात.
नवे पिळगेक तुमचो शेती विशीं कितें संदेश आसा?
आतां शेती करप खूब सोंपी आसा. सगळे तरेच्यो सुविधा हांगा आसात. ते खातीर तरणाटे पिळगेक तातूंत आवड निर्माण जावपाक जाय आनी तांणी मनांतल्यान तें करपाक जाय. हातूंतल्यान खूब फायदो जाता.