शेतांत एक पिकास मारून दाखोवचोच

भांगरभूंय | प्रतिनिधी

जोजफ फर्नांडीसः सांग्यार आयआयटी आड जाहीर सभेंत आमदाराक शिटकावणी

भांगरभूंय । प्रतिनिधी

सांगें: आयआयटी विरोधांत फाटल्या 69 दिसां सावन शेतकार धरणें आंदोलन करतात. केंद्र जमीन उणी पडटा हे खातीर आयआयटी प्रकल्प रद्द केला. पूण थळावे आमदार सुभाष फळदेसाय उणी पडपी तीन लाख चौखण मिटर मेळोवपा खातीर भाटकारांक मेळटा. तेचवरी आयआयटी प्रकल्प सांग्यारूच जातलो अशें म्हणटा. ताका आमी आमच्या शेतांत एक पिकास लेगीत मारपाक दिवचे नात, अशी खर शिटकावणी जोजफ फर्नांडीस हांणी दिली. आयतारा 27 नोव्हेंबराक वरकटो सांग्यार सांगें बचाव समितीन जाहीर बसका आयोजीत केल्ली. त्या वेळार फर्नांडीस उलयताले. हे बसकेक 200 परस अदीक शेतकार हाजीर राविल्ले.

आयआयटी सांग्यार आयल्यार सांगेंकारांक ताचो त्रास जातलो, हे दरेकल्याक खबर आसा. तरी लेगीत चडशा जाणांनी मोनेपण आपणायलां. आयआयटी प्रकल्प सांग्यार आयल्यार शेतकार उपाशी पडटले. हुंवार येवन गांव बुडपाक शकता. पियेवपाच्या उदकाक पादिशेर जातले, विजेचो उणाव जातलो. हेच खातीर फाटल्या 69 दिसां सावन शेतकार आयआयटी आड धरणें आंदोलन करतात. तांची पर्वा करिनासतना आमदार फळदेसाय हट्टाक पेटून आपल्या फायद्या खातीर शेत पुरोवन हो प्रकल्प हाडपाक सोदता, हें चुकीचें आसा. एके वटेन सरकार शेत रोयात म्हूण सांगता जाल्यार दुसरे वटेन आमदार फळदेसाय शेतां पुरोवपाक सोदता, अशें जोजफ फर्नांडीस हांणी सांगलें.

आयआयटीक आमचो सदांच विरोध आसतलो. थळाव्या आमदाराक पुलिसांची राखण घेवन सांग्यार भोंवचें पडटा, ही लजेची गजाल. पुर्तुगेज काळा सावन आमचे हे पुर्वज हीं शेतां रोयताले, आतां तीं आमी रोयतात. आमी मुंडकार. भाटकाराक ही जमीन विकपाक मेळची ना. ती जमीन गेवपाची शेतकारांची तयारी आसा. गरज पडल्यार थळाव्या आमदाराच्या घराचेर मोर्चो व्हरतले, पूण खंयचेच स्थितींत सांग्यार आयआयटी प्रकल्प उबो जावपाक दिवचे नात, अशी शिटकावणी मिल्टन फर्नांडीस हांणी दिली.

सांतान रॉड्रिगीज हांणी सांगलें, उगे पंचायतीन आयआयटी संबंदांत जो थाराव घेतलो तो विचार करिनासतना गडबडींत घेतला. फक्त 10- 15 लोकांक आयआयटी जाय म्हूण हात वयर केल्ले. पूण तातूंत एकलोय शेतकार ना. जी जमीन आयआयटी प्रकल्पा खातीर दाखयल्या थंय नगरपालिका वाठारांतल्या लोकांचीं शेतां आसात.

किरण प्रभू मळकर्णेकार हांणी सांगलें, लोकांक जर आयआयटी नाका जाल्यार फळदेसाय तिचे खातीर कित्याक तळमळटा? शेतां पुरोवन आयआयटी उबारपाक दिवचें नात, हें आमदारान मतींत धरचें. शेतकारांच्या पोटार पांय दवरून हो प्रकल्प हाडपाचो यत्न केल्यार ताचे वायट परिणाम जातले, अशें तांणी सांगलें.

आमी जिवाची पर्वा करिनासतना आमची शेतां, सांगें वाचोवपा खातीर झगडटात. हे खातीर थळावे आमदार पुलिशेचो तशेंच सरकारी यंत्रणेचो गैरवापर करून आमकां भिरांत दाखयता, आमचेर नाका जाल्ल्यो केशी घालून त्रास करता. थळाव्या आमदारान लोकशाय काबार केल्या. तो हुकूमशा जावपाक सोदता, पूण ताका आमी भियेनात, अशें तातूश मास्कारेन्हस हांणी सांगलें. संजय मापारी हांणी सांगलें, सुभाष फळदेसाय हांकां तांच्या वायट कर्तुपा खातीर काळे बावटे दाखयतले. तरीय तो आयकना जाल्यार ताच्या घरा वचून ताका काळे बावटे दाखयतले.

जबरदस्ती केल्यार योग्य जापः कार्लोत कार्व्हालो

सांगें वाचोवपा खातीर शेतकार फाटल्या कितल्याशाच दिसां सावन आंदोलन करता. आपल्या हक्का खातीर झगडटल्यांक कित्याक न्याय मेळना? हक्का खातीर झगडटल्यांक ख्यास्त कित्याक जाता? सांगेंचे नगरसेवक मॅश्यू डिकॉस्टा सदांच दुसऱ्यांच्या हक्का खातीर झगडटा, हे खातीर ताका तडीपार नोटीस जारी केल्या. हो खंयचो न्याय? आमी शेतां खातीर झगडटात हे खातीर आमकां माड्डितात, कोणाक भितर उडयतात. हें आनीक कितले तेंप पळोवपाचें? आमची सोंशीकसाण सोंपल्या हे खातीर ही बसका आपयिल्ली. आमचे जमनीर आमी कोणाकूच घेवचे नात, आनी जर कोण जबरदस्तीन येता जाल्यार ताका योग्य जाप दिवपाचें बसकेंत थारायलां, अशें कार्लोत कार्व्हालो हांणी सांगलें.