भांगरभूंय | प्रतिनिधी
पणजी, प्रतिनिधी : संजीवनी साकर कारखान्यांत इथेनॉल प्रकल्प जातलो काय ना, हाचे विशीं निर्णय तशेंच ऊस शेतकारांक ठोस आस्वासन मुख्यमंत्री डॉ. प्रमोद सावंत हेच दिवंक शकतात. शेतकी मंत्री ह्या नात्यान मुख्यमंत्र्यां कडेन हांव चर्चा करतलों, अशे शेतकी मंत्री रवी नायक हांणी सांगलां.
धरणे आंदोलन करपी ऊस शेतकारांनी म्हजे कडेन प्रस्न मांड़ुंक ना, अशेंय तांणी सांगलें.
संजीवनी साकर कारखान्यांत इथेनॉल प्रकल्प उबारपाचो निर्णय हाचे पयलींच जाला. आरएफपी निविदा पसून जारी जाल्यो. दोन कंपनींनी इत्सा प्रस्तावा खातीर बोली सादर केल्ल्यो. उपरांत कांय कारणांक लागून ह्यो कंपनीं फाटीं सरल्यो. आतां सरकाराचें पीपीपी खाते नव्यान निविदा जारी करपाचें आसा. तें मुख्यमंत्र्यां कडेन आसा. संजीवनी साकर कारखानो तशेंच ऊस शेतकारांच्या हिताचेर निर्णय घेवपा खातीर आदले खासदार अॅड. नरेंद्र सावयकार हांच्या फुडारपणा खाला सरकारान समिती स्थापन केल्या. ऊस शेतकारांक इथेनॉल प्रकल्पा विशीं मुख्यमंत्रीच कितें तें आस्वासन दिवं शकतात, अशें रवी नायक हांणी मुखार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
