भांगरभूंय | प्रतिनिधी
विश्वजीत राणे: वाळपय, पर्यें मतदारसंघांतल्या शेतकारांचो भोवमान
वाळपय: भारताचे अर्थीक वेवस्थेंत शेतकार एक म्हत्वाचो घटक. शेतकाराक लागूनच आमी आयज बरी जीण जगपाक शकतात. ताका लागून शेतकारांक मान दिवचो. आहाराचेर नियंत्रण दवरतना पोशक अन्न खावप खूब गरजेचें. आयचे बदलपी जिणे पद्दतींत आमच्या आहारांत बदल दिसपाक लागल्यात. हाचो परिणाम आमचे भलायकेचेर जावपाक लागला. हाका लागून भलायकी मंत्री विश्वजीत राणे हांणी सगळ्यांक पोशक अन्न खावपाचेर लक्ष केंद्रीत करपाचो उलो मारलो.
वाळपय आनी पर्यें मतदारसंघाच्या भारतीय जनता पक्षाच्या समाजीक न्याय सप्तका खाला शेतकारांचे भोवमान कार्यावळीक ते उलयताले. वाळपयच्या कार्यालयांत हे कार्यावळीचें आयोजन केल्लें.
ह्या वेळार माचयेर पर्यें मतदार संघाची आमदार डॉ. देविया राणे, वाळपय आनी पर्यें मतदार संघाचे भाजपाचे संघटक विनोद शिंदे, वाळपय मतदारसंघ भाजपा मंडळ अध्यक्ष रामनाथ डांगी, पक्षाचे पदाधिकारी प्रसाद खाडीलकार, वाळपय नगरपालिकेची नगराध्यक्ष सेहझीन शेख, सत्तरी म्हालांतले विवीध पंचायतीचे सरपंच, पंच वांगडी, बूथ समित्यांचे अध्यक्ष, कार्यकर्ते, किसान मोर्चा, महिला मोर्चा हांचे पदाधिकारी आनी हेर ह्या वेळार हाजीर आशिल्ले.
जिसुडा वरवीं गोंयांत कार्यरत आशिल्ल्या हातगाडे वाल्यांक अर्थीक मजत दिवन तांकां पुश्टीक अन्न तयार करपा विशीं प्रशिक्षण दितले. हे विशींची रचणूक बेगीनूच जाहीर करतले. प्रधानमंत्री नरेंद्र मोदी हांणी दिल्ल्या उल्या प्रमाण हें काम फुडें व्हरपाचो यत्न करतले अशें भलायकी मंत्री विश्वजीत राणे हांणी सांगलें.
मंत्री राणे हांणी फुडें उलयतना सांगलें, पंतप्रधान नरेंद्र मोदी हांणी अंदूचें मिलीट वर्स म्हणून जाहीर केलां. ताका लागून व्हडा प्रमाणांत पुश्टीक जेवण तयार करपी लागवड विवीध सुवातांचेर जातली. हातूंत सगळ्यांनी वांटो घेवचो आनी आपल्या जेवणांत पोशक जिवनसत्वां वापरपाचेर भर दिवची अशी मागणी ह्या वेळार तांणी केली.
आपल्या कुटुंबाची जापसालदारकी दरेकल्यान घेवची. जांकां पोशक अन्न जिवनसत्वां ह्या संबंदी म्हायती आसा. तांणी आपल्या कुटुंबाकूय हे विशीं म्हायती दिवची. गोंयच्या शेतकी खात्या वतीन अंदूं व्हडा प्रमाणांत जिवनसत्वां दिवपी लागवडीचेर भर दितले. हाका सगळ्यांनी सहकार्य करचें अशें मंत्र्यान सांगलें.
शेतकारांक सरकारा वरवीं मजत मेळटली:डॉ. देविया राणे
समाजीक न्याय सप्तका खाला भाजपान विवीध उपक्रम हातांत घेवपाचो यत्न केला. सत्तरी म्हालांतल्या दोनूय मतदारसंघांनी शेतकारांचो भोवमान सुवाळो घडोवन हाडून शेतकारांक उर्बा दिवपाचो यत्न केला. फुडाराक हेरांनीय अशा शेतकारांची देख घेवची आनी तरणाट्यांनी व्हडा प्रमाणांत शेतकी वेवसायांत प्रवेश करचो अशी मागणी पर्यें मतदार संघाची आमदार डॉ. देविया राणे हांणी केली. शेतकारांक सरकारा वरवीं गरजेची मजत मेळटली. शेतकारान सेंद्रीय सार्याचो वापर करून शेतकी वेवसाय चालीक लावपाचीय मागणी तिणें ह्या वेळार केली.
सुरवातेक भाजपाचे संघटक विनोद शिंदे हांणी सगळ्यांक येवकार दिलो. पुराय कार्यावळीचें सुत्रसंचालन उदय सावंत हांणी केलें.
ह्या वेळार वाळपय मतदारसंघातल्या योगेश देसाय, कमल गांवकार, लक्ष्मण गांवस, महादेव पार्सेकार आनी भागिरथी पर्येंकार हांचो भोवमान जालो. जाल्यार पर्यें मतदार संघांतल्या श्वेता सत्यवान खोत, सुरेश नायक, मधुराम परवार, प्रशांत राणे, दशरथ गांवस हांचो भोवमान जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
