शेतकारांनी शेतां विशीं विस्वास दाखोवचो

भांगरभूंय | प्रतिनिधी

मुख्यमंत्री: सरकार शेतां खातीर व्हड प्रमाणांत खर्च करता

सांखळे शेतकार मेळाव्याचें आयोजन

दिवचल: स्वयंपूर्ण गोंय हे संकल्पनेक आतां पांच वर्सां पुराय जालीं. ह्या दसऱ्यांत गोंयां भायल्यान 50 टक्केच रोजां आयिल्लीं, आनी 50 टक्के रोजां गोंयकारांनी उत्पादीत केल्लीं. तेच प्रमाण गोंय फलोत्पादन मंडळा वतीन विकतात ती भाजी आयज 40 टक्के गोंयच्या शेतकारांनी रोयल्या. सरकार शेतां खातीर व्हड प्रमाणांत खर्च करीत आसतना शेतकारांनी शेतां विशीं आपलो विस्वास दाखोवंक जाय. आयच्या शेतकारांनी शेतांत देंवून शेत केलें ना जाल्यार फुडली पिळगी शेतांत देंवची ना. तरणाटी पिळगी फक्त मोबायलांत गुथिल्ली आसता. तांकां शेतां विशीं मार्गदर्शन करून शेतांत देंवोवपाचो यत्न करूंक जाय अशें मुख्यमंत्री डॉ. प्रमोद सावंत हांणी सांगलें.

सांखळे रवींद्र भवनांत सहकार खातें आनी उदका स्रोत खात्या वतीन सेवा पखवाडा निमतान शेतकारांचो मेळावो आयोजीत केल्लो. ह्या वेळार मुख्यमंत्री उलयताले. माचयेर राज्यसभा खासदार सदानंद शेट तानावडे, उदका स्रोत मंत्री सुभाष शिरोडकार, आमदार देविया राणे, प्रेमेंद्र शेट, उत्तर गोंय जिल्हो पंचायत अध्यक्ष धाकू मडकयकार, जिल्हो पंचायत वांगडी गोपाळ सुर्लकार, शंकर चोडणकार, प्रदीप रेवोडकार, महेश सावंत, देवयानी गांवस, उदका स्रोत खात्याचे मुखेल अभियंते ज्ञानेश्वर सालेलकार, फलोत्पादन म्हामंडळाचे एमडी संदीप फळदेसाय, गोंय राज्य सहकारी बँकेचे अध्यक्ष पांडुरंग कुट्टीकार आनी हेर हाजीर आशिल्ले.

डॉ. प्रमोद सावंत हांणी मुखार म्हणलें, दरेक शेतकारां कडेन 50 हजार चौमि परस चड जमीन पडीक आसा. ती सगलीं एकठांय करीत जाल्यार लाखांनी चौमि सुवात पडून आसा. सरकार सगल्या प्रकारच्या कृशी उपक्रमां खातीर सगले तरेची मजत करता. आमोणें सारक्या गांवांत सरकारान 42 कोटी रुपया खर्च करून बांद बांदला. पूण शेतकार शेतांत देंवनात.

गोंयाक कोट्यांनी रुपयांचो गोरवांचो चारो भायल्या राज्यांतल्यान हाडचो पडटा. आपले उक्ते सुवातेंत हो चारोच जर रोयत जाल्यार शेतकार फायद्यांत येवंक शकता. सरकार ह्या सगल्या कृशी संबंदीत उपक्रमांक मजत करता. शेतकारांक सगले तरेची मजत करपी देशांतलें गोंय हें एकूच राज्य आसा. पूण शेतकारांनी मुखार येवंक जाय अशेंय तांणी म्हणलें.

सरकार मळ हें फक्त फटवणूक करून आपल्याच लोकांक कामाक लावपा खातीर ना. जाल्यार तें लोकांक अर्थीक नदरेन मजत करून प्रगती सादपा खातीर आसा. सहकार मळ आनी कृशी मळ एकठांय येत जाल्यार व्हड गजाली साध्य करूंक शकतात अशेंय मुख्यमंत्र्यांनी म्हणलें.

गोंयच्या दूद वेवसायांत व्हड अर्थीक लाव आसा. हाचे कडेन शेतकारांनी लक्ष घालून वेवस्थीत काम करीत जाल्यार ह्या वेवसायांतल्यान 50 ते 100 कोटी रुपयांची उलाढाल करूंक शकतात. गोंय सरकार आनी मुख्यमंत्री ह्या सगल्या प्रकारच्या कृशी विशयक वेवसायांक सहकार्य करपाक तयार आसा. फक्त शेतकारांनी मुखार येवंक जाय. शेतकारांक गरजेची आशिल्ली उदका पुरवण हाची जापसालदारकी उदका स्रोत खात्यान घेतल्या. फुडल्या 25 वर्सांचो विचार करून आतां सावनूच उदकाची तजवीज करपा खातीर विवीध येवजण्यो हातांत घेतल्यात अशें उदका स्रोत मंत्री सुभाष शिरोडकार हांणी म्हणलें.

ह्या वेळार खासदार सदानंद शेट तानावडे, आमदार देविया राणे, प्रेमेंद्र शेट हांचींय उलोवपां जालीं. दिवली पेटोवन मुख्मंत्र्यां हस्तुकीं मेळाव्याचें उक्तावण जालें. ह्या वेळार उत्कृश्ट कार्य केल्ले खातीर सहकारी पतसंस्था, शेतकार सहकारी पतसंस्था, प्रगत शेतकारांचो भोवमान केलो.