भांगरभूंय | प्रतिनिधी
भांगरभूंय । प्रतिनिधी
पोरणे गोंयः शेतां कसपाक तरणाट्यांक आकर्शींत करपा खातीर शेतकारांनी शेतांचें वेवसायिकरण करपा कडेन लक्ष दिवपाक जाय अशें सान्तआंद्रेचो आमदार विरेश बोरकार हाणे नेवरा हांगा आयोजीत केल्ल्या शेतकार मेळाव्यांत सांगलें. फाटल्या कांय वर्सां सावंन पंडग दवोरल्ल्या खाजन शेतां परतून कसपा खातीर तरणाट्यांक तयार करपाच्या हेतान हो शेतकार मेळावो आयोजीत केल्लो.
कृशी वेवसाया कडेन एक वेवसाय म्हणून पळोवपाचो वेळ सद्या आयला. तरणाट्यांक शेतांनी हाडपा खातीर शेतांकडेन वेवसाय हे नदरेंतल्यान पळोवपाक जाय. सान्त आंद्रें मतदारसंघांतली खाजन शेतां लागवडी खाला हाडची हे खातीर सरकारी पांवड्या वयल्यान यत्न सूरू आसा. शेतकारांनी ते खातीर फुडें सरपाक जाय. ते फुडें आयले ना जाल्यार सगले यत्न फुकट वतले अशें बोरकारान शेतकारांक सांगलें.
सहकारी संस्थाच्या पालवान सामाजीक फार्मिंगा कडेन आमी वचपाक जाय. आपले वैयक्तीकपणान शेतां करपा परस सामाजीक शेतां दरेकल्याक परवडपाक शकतलीं. पयलीं तेपार शेतकार शेताच्या कामा खातीर एकमेकाक मजत करताले. सध्या मजुरीचे दर वाडल्ल्यान मानाय घालून शेतांची कामां करपाक शेतकाराक परवडना. ते खातीर सामजीक शेतांची संकल्पना परत सुरू करपाक जाय अशें तांणे शेतकारांक पटोवन दिवपाचो यत्न केलो.
शिल्पा आनी नेड्डा खाजन शेतां फाटल्या कांय वर्सां सावन सामकी पडंग पडल्यांत सगल्या शेतकारांनी एकठांय येवून ती कसपाक सुरवात करची अशें बोरकारन तांचे लागीं मागलें. कृशी खात्याचे सहाय्यक संचालक प्रमोद जोशी, गोंय कृशी कॉलेजाचो प्राचार्य सुरेश कुंकळ्ळकार, नाबार्डाचे सहाय्यक सरवेवस्थापक सोनाली बांदेकार, तिसवाडीचो कृशी अधिकारी राशेला फर्नांडीस, गोंय जैवविविधताय मंडळाचो प्रोजेक्ट सहाय्यक वर्षा होबळे, कृशी जाणकार अमोल नावेलकार हांणी शेतकारांक मार्गदर्शन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
