भांगरभूंय | प्रतिनिधी
भांगरभूंय । प्रतिनिधी
काणकोणः राज्यांतल्या शेतकारांक तांच्या सरकारी अनुदानाचे पयशे हाच्या फुडें म्हयन्यांच्या 10 तारखे पयलीं दितले अशी घोशणा उदका स्रोत मंत्री सुभाष शिरोडकार हाणे मंगळाराक आमोणे- पैगीण हांका पश्चीम घाट उदरगत कार्यावळ, कृशी आनी उदका स्रोत खात्यान आयोजीत केल्ल्या कृशी मेळाव्यांत केली. शेतकार आमची पोटां भरतात ताका लागून तांकां समाजांतल्या हेर घटकां परस चड प्राधान्य दिवपाक जाय. अनुदानाचे पयशे वेळार मेळ्ळ्यार पिकावळ घेवपाक तांकां उर्बां मेळटलीं अशे ताणे सांगलें.
सरकारी कर्मचाऱ्यांक म्हयन्याच्या पयले तारखेक पगार मेळटा. वेळार पयशे मेळप व्हो शेतकारांचो हक्क आसा अशें सांगतना सरकारी येवजण्यांतल्या दरेका शेतकाराक वर्साक उण्यात उणे 5 हजार रुपये मेळटले हाची वेवस्था सरकार करतलो. गोरवां सांबाळ खाते, कृशी आनी उदका स्रोत खात्यान ते खातीर एकठांय येवन काम करपाची गरज आसा अशें शिरोडकार हांणे म्हणलें. 2021 तें 2023 ह्या वर्सांत काणकोण तालुक्याक कृशी खात्या कडल्यान अडेज कोटी रुपया मेळ्ळ्यांत अशी म्हायती ताणे दिली.
राज्यांत सद्या तिनश्यां वरय उदकाचे बंधारे आसात. अंदू वर्सा आनीक शंबर बंदारे बांदतले. 2025 मेरेन बंधाऱ्यांचो आंकडो पांचश्यांचेर पावतलो. 75 बंधाऱ्यांची दुरुस्ती करतले अशें ताणे सांगलें. कृशी मेळाव्याचें उक्तावण शिरोडकार आनी रमेश तवडकार हांणी केलें. ह्या वेळार पैगीणची सरपंच सविता तवडकार, खोलाचो जिल्हो पंचायत वांगडी शाणू वेळीप, पैंगीणची जिल्हो पंचायत वांगडी शोभना वेळीप, आत्मा प्रकल्प अधिकारी शिवराम नायक गांवकार, उदका स्रोत खात्याचो कार्यकारी अभियंतो पाटील, कृशी संचालक नेव्हील आफोंसो, उप संचालक संदीप फळदेसाय आनी वेगवेगळ्या पंचायतीचे सरपंच आनी उपसरपंच हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
