शेणिल्ल्या जोत्याची काणी..

भांगरभूंय | प्रतिनिधी

पालखी जावन लोकांची घरा वचपाक धांवपळ, गर्दी. हांव तसो तेन्नाय बी गर्देंत वचपा टाळटालों. सगळे लोक वतकच हांव सुशेगाद वतलों अशें म्हणून हांव देवळांत बसून रावलों. तसो हांव कसलोय विचार करतना दोळे बरे उकते दवरून ध्यान करतां.

तुमी आयकलांच आसतलें की गुगल सर्च इन्जीन वा आतां एआय कितलेंय तज्ञ आसूं, देवळा भायर शेणिल्लें जोतें गुगल वा एआयचो बापूय लेगीत सोदपाक शकना. इतले गर्देंत खंय आनी कशें मेळटलें तें जोतें? तशे लोक दोन कारणांक लागून देवळांत वतात – एक तर आपलें पोरणें जोतें बदलून ल्हवूच नवें जोतें हाडपाक (घडये चुकून). तशें फुकटांत जोतें एक्सचेंज करपाची स्कीम फकत देवळा भायर आसता. दुसरें कारण म्हणल्यार लग्ना खातीर चली वा चलो मेळ्ळो जाल्यार लायफ सॅट जातली म्हणून. सामक्या पवित्र जाग्यार मेळटात, हाचे फुडें आनीक कितें जाय? केन्ना केन्नाय आवय बापूय देवळांनी वा लग्नाच्या हॉलांनी स्वता खातीर सून-जावंय सोदपाचे यत्न करीत आसतात. मागीर कोणूय चलो वा चली आवडली जाल्यार सगळ्यांत पयलीं पंचनामो हॉलांतूच करतात आनी उरिल्लो मागीर सोशल मिडिया वयली प्रोफायल पळोवन.
2013 तली गजाल. तेन्ना हांव चौगुले कॉलेजींत बीएच्या दुसऱ्या वर्सांत शिकतालों. श्रावणांतलो दुसरो सोमार आशिल्लो. हांव ढवळे आमचो कुळदेव वामनेश्वराच्या देवळांत गेल्लों. खूब गर्दी आशिल्ली. देवळांत वचपाचें तिसरें मुखेल कारण म्हणल्यार जेवण! सॉरी, म्हाप्रसाद. पयलींच स्पश्ट करतां, नाजाल्यार देवळांतल्या म्हाप्रसादाचो अपमान बी करतां अशें म्हणटले तुमी. ओगीच सँटीमँट्स हर्ट आनी जावपाक नाका बाबा! शिवराक आसलें तरी देवळांतल्या शिवराक जेवणाक जी रूच आसता ती घरा केल्ल्या शिवराक जेवणाक येना. तशे चडशे गोंयकार नुस्त्या मोगी; नुस्त्याचे धगड म्हणल्यार जाता! पूण फुकट जेवणाचो प्रस्न येता तेन्ना शिवराक लेगीत आवडूंक लागता.
जाल्यार हांव देवळांत गेल्लों. हय सायबा, हांवूंय जेवलोंच. तुमी जेवणाकूच वतात असो आरोप हांव घालतां म्हणूं नाकात. म्हाकाय आवडटा, हांवूंय जेवलों. जेवणा उपरांत पालखी जाली. पावसांत भायर खूब निसरट जाल्ली आनी वयल्यान, आतां सगळे कडेन पेव्हर्स घाल्ले आसात. ताचेर निसरताच. तेन्नाच एका मनशाची विकेट पडली. तसो कांय मार लागलो ना ताका. (आतां तो तूंच बी न्हय मरे? अशें विचारचें न्हय. हांव दुसरे कडेन पयलींच ‘पडिल्लों’ आशिल्लों, आनीक एकदां पडपाची रिस्क घेतलें ना. ‘मोगांत बी पडिल्लो’ अशें समजुचें न्हय).
पालखी जावन लोकांची घरा वचपाक धांवपळ, गर्दी. हांव तसो तेन्नाय बी गर्देंत वचपा टाळटालों. सगळे लोक वतकच हांव सुशेगाद वतलों अशें म्हणून हांव देवळांत बसून रावलों. तसो हांव कसलोय विचार करतना दोळे बरे उकते दवरून ध्यान करतां. तितलो मागीर म्हाका स्टेटस बी घालपाक मसालो मेळटा. वयर सांगल्यांत त्या कारणांतलें एक्कूय कारण म्हाका लागना. हांव देवळांत वतां कारण देवळांत एके तरेची जी शांती मेळटा ती आनीक खंयच मेळना. शांती बरोबर म्हाका पुजा-अर्चना, आराधना, बी आवडटा. मनांतल्या मनांत. आतां हीं सगळीं चलयांचीं नांवां न्हय हेंय बी लक्षांत दवरचें.
रातचीं साडेधा जाल्लीं. सगळे लोक भायर सरिल्ले. घरा वचुया म्हणून हांवूंय भायर सरलों. भायर येवन पळयता जाल्यार म्हजें नवेलें स दीस पयलीं घेतिल्लें, जोतें गायब. हांगां-थंय कोनश्यांनी बी पळयलें. खंयच ना. मागीर कितें, आमी गांवच्या लोकांनी बस केल्ली, तसोच वचून बसींत बसलों. दर एकल्यान स्वताची गाडी भायर काडचे परस बसूच बरी न्हय? बस सुरू जाली. म्हज्या घरा कडल्यान देवूळ सुमार 25 किलोमिटर आशिल्लें. बस स्टॉपार पावतकच तसोच उकत्या पांयांनी देंवलों आनी घरा गेलों. पंचवाडे पावस नाशिल्लो. ही गजाल सोमार, 19 ऑगस्ट 2013 ची.
25 ऑगस्ट 2013 – आयतार. त्या दीस म्हापा पंचवाडेचो ग्रामदेव कलनाथ देवस्थानांत श्रावणांतलो सप्ता आशिल्लो. हांगाय गर्दी. स दीस पयलीं जे लोक वामनेश्वर देवळांत आयिल्ले तातूंतले कांय लोक हांगांय बी येवपाचे आशिल्ले. सांजवेळचीं चार जाल्लीं. हांव देवळांत पावलों. भायर जोतें काडपाक गेल्यार म्हाका म्हजें जोतें दिसलें जें स दीस पयलीं वामनेश्वर देवळांत शेणिल्लें. म्हाका अजाप. गुगल सोदूंक पावनाशिल्लें जोतें आपूण जावन म्हजे कडेन येवन रावलां!
आतां तुमी विचारतले म्हाका कशें कळ्ळें तें म्हजेंच जोतें म्हणून? म्हज्या जोत्याची सायझ धा. पूण त्या जोत्याचे जोडयेर चुकून दाव्या पांयाच्या जोत्यार 9 नंबर बरयिल्लो आशिल्लो आनी उजव्या जोत्यार धा. दोनूय जोत्यांची सायझ एकूच आशिल्ली – धा, पूण नंबर चुकिल्लो. आतां तुमी म्हणटले की सगळ्याच लॉटाचेर अशें जाल्लें आसत जाल्यार? पूण ना, तेंय बी हांवें चॅक केलें रोखडेंच. आनी एक मुखेल कारण म्हणजे त्या देवळांत आयिल्ले कांय लोक हांगाय आयिल्ले. म्हणल्यार चित्र तशें साफ आशिल्लें. इतल्यान एक मनीस थंय आयलो आनी तें जोतें घालून वचपाक लागलो. म्हाका दिसलें आज म्हजे दोळ्या मुखारच्यान जोतें चोरयेक वता बी काय म्हणून. पूण ना, तो लागींच फोनार उलोवपाक गेल्लो. तसो तो आमचो दायजी. पूण सरळ कसो विचारतलों? फोन सोंपोवन तो परत आयलो. जोतें भायर काडून गेलो. हांवें आनीक वेळ केलो ना. रोखडें तें जोतें घालें आनी धांवत घरा आयलों. घरा दवरलें आनी घरच्यान परत वतना उकत्या पांयांनीच गेलों. दुसरें जोतें घालून गेल्यार तेंय कोणेंय चोरलें जाल्यार? येतना तें पोतयेंत घालून आनीक कोण हाडटलो? कोणाकूय दिसतलें आशिल्लें प्रसाद घेवन घरा वता आनी वाटेर मागलो जाल्यार? त्या दीस जें जोतें हांवें घाल्लें तें हांवें थंयच कोनशाक सुरक्षीत दवरिल्लें.
देवळांत पावतकच हांवें त्या मनशाचेर नदर दवरली. सप्ता सोंपतकच हांव कितें पळयतां? तो जोतें चोर भायर आयलो आनी मेळटा तें जोतें घालून गेलो. मात्तूय सोदूंक ना की बाबा, आपूण घालून आयिल्लों तें जोतें खंय गेलें काय? तेन्ना म्हजो शक यक़ीन में बदल गया! म्हजें जोतें ताणेंच चोरिल्लें. तो खरेंच एक प्रकारचो ‘सिरीयल जोतें चोर’ आशिल्लो.
आतां ही सगळी काणी तुमकां एक वेळ फट दिसत. तुमी म्हणशात – आदित्य बरें उडयता, he throws well. पूण जशें पिक्चरांत बी जाता तशेंच म्हजे जाल्लें. हें तेन्ना फेसबुकार घाल्लें तेन्नाय लोक म्हणटाले – तुजेच बरोबर कशें रे घडटा अशें? तुकाच कशें मेळटा सगळें? तें कोण जाणा आतां? घडये म्हाकाच मेळटा कारण त्योय गजाली सोशल मिडियाचेर पावून फामाद जावपाची वाट पळयतात.

आदित्य सिनाय भांगी
9673585953