भांगरभूंय | प्रतिनिधी
म्हापशें: कळंगूटे देंविल्ल्या आनी 1.71 लाखांचो म्हालवज आशिल्ली पर्यटक टॅक्सींत उरिल्ली बॅग कळंगूट पुलिसांनी सोदून चेन्नयंतल्या पर्यटकांचे सुवादीन केली.
मंगळारा 24 वेर सांजवेळ चेन्नयंतलो पर्यटक टी. रीना हे आपल्या कुटुंबां सयत गोंयांत पर्यटना खातीर आयिल्ले. ते अॅप पर्यटक टॅक्सींतल्यान कळंगूटे देंविल्ले. गडबडींत तांची एक बॅग टॅक्सितूच उरली आनी ती पर्यटक टॅक्सी थंय सावन गेली.
हे बॅगेंत 37 हजारांची भांगराची सरपळी, 1 लाख 19 हजार रोख रक्कम आनी 15 हजारांचो मोबायल फोन असो 1 लाख 71 हजारांचो म्हालवज आशिल्लो. बॅग मोटारींत उरिल्ल्याचें समजतकच त्या पर्यटकान कळंगूट पुलीस स्टेशनार धांव घेतली.
पुलिसांनी त्या अॅप टॅक्सिच्या क्रमांका वेल्यान तिचो सोद घेतलो. तो मेरेन मोटार वास्को परतून गेल्ली. पुलिसांनी त्या चालकाक टॅक्सी सयत बॅग घेवन कळंगूटे परतून आपयलो. उपरांत ती बॅग सगल्या म्हालवजा सयत पर्यटक टी. रीना हाचे सुवादीन केली.
पुलीस निरिक्षक परेश नायक आनी सहाय्यक उपनिरिक्षक नरेशकुमार साळगांवकार हांचें ह्या पर्यटक कुटुंबान बॅग सोदून दिल्ले खातीर उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
