भांगरभूंय | प्रतिनिधी
महाराष्ट्र आनी कर्नाटक ह्या गोंयच्या दोनूय शेजारी राज्यांतलो राजकी संघर्श आतां खूब उंचेल्या पांवड्यार पावला आनी ताचेर
चर्चा जावप सभावीक. महाराष्ट्रांतलो सत्ता संघर्श कर्नाटकांतल्या सध्याचे राजकी संघर्शाचे तुळेंत वेगळो आसलो तरी 10-15दिसांचेर येवन पाविल्ल्या थंयचे विधानसभा वेंचणुकेचो विचार करतना सत्ते खातीर कितेंय हो महाराष्ट्रांतलो पॅटर्न कर्नाटकांतूय चालू आशिल्ल्याचें दिसता. महाराष्ट्रांत विधानसभा वेंचणुकेची तारीक लागिल्ली ना, हें जरी खरें आसलें तरी फुडल्या वर्साचे सुरवेक जावपी लोकसभा वेंचणुके वांगडा ती घेवचे नात वा जावचीच ना अशें म्हणपाक मेळचें ना. महाराष्ट्रांतलो सत्ता संघर्श ल्हवू ल्हवू पूण निश्चीत अशी एक वेगळी दिका घेवपाक लागला. जाल्यार कर्नाटकांत विधानसभा वेंचणुकेच्या निमतान चालू आशिल्ल्या राजकी संघर्शाक वेगळीच धार येवपाक लागल्या.
गोंयांतले भाजपाचे फुडारी, मंत्री- आमदारूय सध्या कर्नाटकाच्या वेगवेगळ्या वाठारांत प्रचारा खातीर थंय तंबू उबारून आशिल्ल्यान गोंयां खातीर ही वेंचणूक म्हत्वाची थारल्या. मंत्री विश्वजीत राणे हाणें हालींच थंयच्या एका वाठारांत कन्नड भाशेंतल्यान प्रचार करून ‘हम किसीसे कम नही’ हेंच दाखोवन दिलां. महाराष्ट्रा कडेन सांस्कृतीक नदरेन आमी चड लागींचे आसले तरी कर्नाटक लेगीत आमचे खातीर बरोच लागींचो आसा. भाजीपालो, फळफळावळ हो तर जोडपी दुवो आसाच, पूण सध्या म्हादयच्या उदकाक लागून तयार जाल्ल्या तंट्यानूय कर्नाटका कडेन आमी बरेच जोडले गेल्यात अशें म्हणपाक जाता.
कर्नाटकांत वेंचणुके उपरांत कोणा कडेन सत्ता येतली, हाचेर गोंयांत लेगीत बरीच चर्चा हालींसराक जातना कानार पडटा. कर्नाटकांत भाजपा परत सत्ता मेळयतलो अशें दिसता तरी विरोधकांनी तयार केल्लें खडेगांठ आव्हान मोडून काडप भाजपाक कितले मेरेन सोपें वतलें हो प्रस्न आसाच. प्रधानमंत्री नरेंद्र मोदी आनी गृहमंत्री अमीत शाह हांणी पुराय कर्नाटक पिंजून काडटना कसलीच कसर बाकी दवरली ना ही वस्तुस्थिती, तरी राहुल गांधी हांचें लोकसभा वांगडी प्रकरण जे पद्दतीन हाताळ्ळें ताची तिडक मतदार भाजपाचेर काडटले, असोय अदमास आसा. राहुल गांधी हांच्या भारत जोडो यात्रेन काँग्रेसी खातीर अनुकूल अशें वातावरण तयार जालां अशें त्या पक्षाच्या ज्येश्ठ फुडाऱ्यांक दिसता तरी तांतूंत कांय तथ्य आसा अशें म्हणपाक मेळचें ना. कर्नाटकांत परत सत्तेर येवपाचें शिवधनुष्य भाजपाक झेपतलें काय हाची जाप फुडल्या पंदरा- वीस दिसांत मेळटली तरी भाजपाच्या फुडारपणाची खरी कसवटी हे वेंचणुकेंत लागतली हातूंत दुबाव ना. फुडल्या वर्सा सुरवेकूच जावपी लोकसभा वेंचणुकेचे फांटभुंयेर भाजपाक कर्नाटकाचो गड कसलेंय मोल दिवन जिखपाचो आसा. गुन्यांवकारी मळा वयलो बादशहा अतिक अहमदाची तो पुलिसांच्या ताब्यांत आसतना जाल्ली निर्घृण हत्त्या आनी ताचे वयल्यान धवळून गेल्ल्या राजकारणाचो फटको भाजपाक कर्नाटकांतले वेंचणुकेंत बसपाक शकतलो काय, हाचीच चर्चा आयकुपाक मेळटा. ना म्हणलें तरी ताचो फटको भाजपाक बसपाक शकता अशें जायत्या जाणांक दिसता.
कर्नाटकांत भाजपाक अरविंद केजरीवाल हांच्या आम आदमी पक्षाचो कितलो मेरेन हातभार लागतलो हाचीय चर्चा जाता आनी ‘आपा’ न काँग्रेस पक्षाच्या परंपरागत मतपेढीचो भेद करून थोड्या प्रमाणांत मतां आपले कडेन घुंवडावपाक तांकां येश आयलें तर ताचो फायदो भाजपाक जातलो हें न्हयकारपाक जायना. ह्या सगल्या मुद्द्यांचो अभ्यास करूनच भाजपान कर्नाटकांत बऱ्याच नव्या उमेदवारांचेर भरवसो दवोरून पोरण्या फुडाऱ्यांक कुशीक वडयलां. भाजपांत बंडखोरी जाल्ली हरशी पळोवपाक मेळना. मात हे खेपे कर्नाटकांत तेंय घडून आयलां. काँग्रेसाचे नवे राष्ट्रीय अध्यक्ष मल्लिकार्जुन खर्गे हे कर्नाटकांतले आशिल्ल्यान तांकांय स्वताक सिद्ध करून दाखोवपाच हीच संद आसा.
केजरीवाल हांची आम आदमी पार्टी काँग्रेस पक्षाचें गणित इबाडूं शकतली हाचेर मात जायते जाणाचें एकमत आसा. फाटले विधानसभा वेंचणुकेंत तीशेक मतदारसंघांतल्यान वेंचणून लडयल्ल्या ‘आप ‘न हे फावट दोनशें परस चड सुवातो लडोवपाचें थारावन उमेदवार उबे केल्यात. तें पळयल्यार मतविभागणी अटळ थारतली. भाजप, काँग्रेस आनी जनता दल (सेक्युलर) अशी तीन पक्षां मदींच कर्नाटकांतली वेंचणूक रंगतली असो सादारण अदमास पयलीं बांदताले. मात आतां आम आदमीनय रिंगणांत हॅट उडयिल्ल्यान भाजपाक खोशेचो उकळ्यो फुटप सभावीक आसा. विरोधकांचो एकवट जावपाक शकना आनी जाल्यार तो जावपाक दिवप ना होच भाजपाचो सध्याचो पवित्रो आशिल्ल्यान जें कितें घडटा तें आपल्याच फायद्यांचें आसा अशें तांकां दिसल्यार तातूंत अजाप तें कसलें ?
कर्नाटकांत फाटल्या पांच वर्सांत आपल्या पक्षान हेर राजकी पक्षांची बरीच सुवात घेतल्या असो दावो ‘आप’ करता आनी तातूंत कणभर लेगीत तथ्य आसल्यार काँग्रेसा खातीर तें बरेंच जड थारपाक शकता. आम आदमी पक्ष आतां राष्ट्रीय पक्ष आशिल्ल्यान ताचो तांकांय मात्सो फायदो मेळटलो अशो तर्क लडोवपाक मेळटा. ताच्या प्रचार समिती मुखेलीच्या नांवातूच मुख्यमंत्री हो शब्द आसा. पंजाबांत सरकार घडयलें, गुजरात- गोंयांत स्वताचें अस्तित्व दाखोवन दिलें. मागीर कर्नाटकांत आमी तेंच करून दाखयतले अशें हेच मुख्यमंत्री चंदू म्हणटात. ते लोकप्रिय अभिनेतो आशिल्ल्यान आनी काँग्रेशींतल्यान फुडें आयल्यात हें मतींत घेतल्यार काँग्रेसाकूच ताचो फटको बसतलो अशे निश्कर्श कोणाकूय काडपाक मेळटा. सोऱ्या घोटाळ्यांत अरविंद केजरीवाल घुस्पल्ले आसतले मात तांचे राजकी म्हत्वाकांक्षेक तशी मर्यादा ना. कर्नाटकांत तांकां आपलो पक्ष वाडोवपाच आसा आनी ते कोणा कडेन तडजोड करतले अशें दिसपाची सारकी परिस्थिनी ना.
कर्नाटकांत विधानसभा वेंचणुकेच्या निमतान सत्ता संघर्श रंगत आसा जाल्यार महाराष्ट्रांत भाजपान शिवसेना फोडून उद्धव ठाकरे हांच्या तोंडांक पानां पुसत सावन फाटल्या आठ- धा म्हयन्यांत जें चल्लां तें सत्ता संघर्शाचें एक वेगळेंच रूप आसा. महाविकास आघाडी वज्रमूठ घट करपाक एके वटेन फुडें सरिल्ली आसतना राष्ट्रवादीचे अजीत पवार हांच्या मनांत वेगळेंच कितें तरी शिजता. उद्धव आनी आदित्य ठाकरे, संजय राऊत हांची सत्ते विणे जाल्ली तडफड जाल्यार महाराष्ट्राक सध्या पळोवपची न्हय अशें जालां. सत्ता संघर्शा वयलो तोडगो सर्वाच्च न्यायालया कडल्यान अपेक्षीत आसतना तो लांबणेर पडत आशिल्ल्यान राज्यांतलें एकूण राजकी वातावरण बरेंच दुशीत जाल्ल्याचें दिसता. महाराष्ट्र आनी कर्नाटक ह्या आमच्या शेजारी राज्यांत स्थिर सरकारां अधिकारार आयल्यार तो गोंयां खातीरूय सोनियाचो दीस थारतलो, अशें म्हणपाक मेळटलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
