भांगरभूंय | प्रतिनिधी
वाळपयः वाळपयचे उपनगराध्यक्ष अनील काटकार हांणी राजिनामो दिले उपरांत वाळपयचे नवे उपनगराध्यक्ष म्हूण शेख इंदुस उर्फ शेख फैझल हांची बिनविरोध निवड जाली. ह्या पदा खातीर फैझल हांचो एकूच अर्ज आयिल्ल्यान वेंचणूक अधिकारी तशेंच सत्तरी म्हालाचे उपजिल्होधिकारी प्रवीण परब हांणी तांची बिनविरोध निवड जाल्ल्याचें जाहीर केलें.
उपनगराध्यक्षपदा खातीर शुक्रारा 21 एप्रीलाक सकाळीं 11 वरांचेर सगळ्या नगरसेवकांची बसका आपयिल्ली. ह्या वेळार नगरसेवकां सयत वेंचणूक अधिकारी म्हूण प्रवीण परब हाजीर राविल्ले. वेंचणूक प्रक्रियेंत पालिकेचे मुख्याधिकारी तशेंच सत्तरी म्हालाचे मामलेदार दशरथ गांवस हांणी मजत केली.
शेख फैझल हांची उपनगराध्यक्षपदार निवड जाले उपरांत नगराध्यक्ष सेहझीन शेख हांणी तांकां परबीं दिली. ह्या वेळार हाजीर आशिल्ले नगरसेवक अनील काटकार, रामदास शिरोडकार, विनोद हळदणकार, सर्फराज सय्यद, शराफत खान, वसियुद्दीन सय्यद, नगरसेविका प्रसन्न गांवस, निर्मला सांखळकार हांणी शेख फैझल हांकां फुलां तुरो भेटोवन परबीं दिलीं. शेख फैझल हांणी सांगलें, भलायकी मंत्री विश्वजीत राणे हांकां लागून आपूण उपनगराध्यक्षपदार वेंचून आयलों. ह्या पदाक आपूण न्याय दितलों. पालिका वाठारांतल्यो प्रलंबीत समस्या सोडोवचे नदरेंतल्यान आपूण यत्न करतलों. वाळपय शारांतली येरादारीची समस्या सोडोवपाक प्राधान्य दितलों, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
