भांगरभूंय | प्रतिनिधी
वाळपयः सत्तरी म्हालांतल्या करंझोळ वाठारांतल्या श्री सांतेरी ब्राह्मणी देवस्थानाचो परंपरीक चोर उत्सव आयतारा राती शेंकड्यांनी भाविकांचे हाजिरेंत मनयलो. रातच्या 10 वरां मेरेन हो उत्सव चल्लो.
सांजेच्या 6 वरांच्या सुमाराक गांवच्या मांडाचेर भौशीक गाराणें घातलें. परंपरेन चलत आयिल्लो हो चोर उत्सव सगळ्यांचे साक्षीन, व्हड उमेदीन मनोवपाची शक्त देवान सगळ्यांक देवान दिवचें, अशें मागणें मागलें. सत्तरी म्हालांतल्या दरेका गांवांतल्यान आयिल्ल्या गावुणग्यांक मान दिवन उत्सवाक सुरवात जाली. करंझोळ गांवांत उत्सव मनोवपा खातीर येवपी चोर उत्सवाच्या माध्यमांतल्यान सत्तरी म्हालांत गाघे गावुणगे हांकां एक विशिश्ट मान आसता.
भौशीक गाराणें घातले उपरांत उपाट उमेदीन भरिल्ले स्थितींत सगळे जाण श्री सांतेरी ब्राह्मणी देवस्थानाच्या प्रांगणांत वतात आनी थंय उत्सव मनयतात. थंय देवळांत सगऴ्या गावुणग्यांक विशेश मान दितात. तीर्थ दिवप, कुकीम लावप आनी हेर धर्मीक विधी थंय जातात. ते उपरांत चोर उत्सवाचे व्रत पाळपी आठ गडे तातूंत वांटो घेतात. तातूंतल्या चार गड्यांची तकली जाल्यार चार गड्यांचे धड जमनींत पुरतात. एकलो सुवारी जाल्यार दुसरो मुड्ड्याचो चोर अशें दाखयतात. परंपरीक वागन आनी उत्सव मनोवपाची आगळी प्रथा हाका लागून हो चोर उत्सव पळोवपाक गोंयच्या साबार वाठारांतल्यान लोक येतात. ते उपरांत परंपरीक घोडेमोडणी मनयली. हो उत्सव राती उसरां मेरेन चालू आशिल्लो. तातूंत करंझोळ सांतेरी ब्राह्मणी देवीचे दोन जाल्यार कुमठोळचे देवीचो एक घोडो रातीं उसरां मेरेन गांवच्या मांडार घोडेमोडणींत वांटो घेता.
वेगळी वळख निर्माण करपी परंपराः हरिश्चंद्र गांवस
गांवांत दर वर्सां जावपी हो चोर उत्सव ह्या गांवची एक वेगळी प्रतिश्ठा सांबाळटा. गोंयच्या परंपरीक मळाचेर वेगळी वळख निर्माण करपी ही परंपरा. शेंकड्यांनी वर्सां सावन चलत आयिल्ली ही परंपरा आयज लेगीत तेच उमेदीन आनी भावनेन मनयतात, अशें ज्येश्ठ नागरीक हरिश्चंद्र गांवस हांणी सांगलें.
उत्सव एकचार सांबाळपाची संद दिताः अर्जुन केरकार
करंझोळ गांवाक व्हड इतिहास आसा. पुर्तुगेजां आड व्हड संघर्श केल्ल्याचें इतिहासांत नोंद आसा. सैमाच्या गोपांत रावपी हो गांव स्वाभिमानी लोकांक लागून हेरां परस वेगळो दिसता. हो उत्सव गांवच्या सगळ्या लोकांक एकठांय हाडून एकचार सांबाळपाची संद दिता, अशें ज्येश्ठ नागरीक अर्जुन केरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
