भांगरभूंय | प्रतिनिधी
पणजीः शॅक धोरण 2023-26 चें उल्लंघन करून शॅक परस्पर दुसऱ्यांक चलोवपाक दिल्ल्यान 23 शॅकाचेर पर्यटन खात्यान चाबूक ओडला. यूपीआय वरवीं पयशें कोणाच्या खात्यांत वतात हाचो सोद घेवन ही 23 शॅकां भाड्याक दिल्ल्याचो सोद घेतलो आनी तातुंतली स शॅकां गोंया भायल्यांक चलोवपाक दिल्ली. ही 23 शॅका बंद उडोवन ती 15 दिसां भितर मोडून उडोवपाचो आदेश पर्यटन खात्यान दिला.
पर्यटन खात्यान दिल्ले म्हायती प्रमाण दर्यादेगेर पळोवणी मोहिम घडोवन हाडली आनी ह्या वेळार ही शॅकां परस्पर दुसऱ्यांक चलोवपाक दिल्ल्याचे उक्ताडार आयले उपरांत खात्यान हाची दखल घेतली. पळोवणी अहवालाच्या आदाराचेर नेमांचें उल्लंघन करपी 110 शॅक धनयांक नोटीस काडून तातुंतलीं 54 प्रकरणां निकालांत काडलीं. हातुंतल्या 31 शॅकानी कसलोच नेमाचो भंग करूंक नाशिल्ल्यान ह्या शॅकांक काडिल्ली नोटीस रद्द केली आनी 23 शॅक धनयांक आपली शॅकां बंद करपाचो आदेश दिलो. हातुंतले 6 शॅक गोंया भायल्यांक चलोवपाक दिल्ले.
शॅक धोरण 2023-26 खाला हे शॅक धनयांक दिल्ले लासयन्स रद्द करपा सयत ही शॅकां 15 दिसां भितर मोडून उडोवपाचो आदेश पर्यटन खात्यान दिवन सरकारी तिजोरेंत तांणी भरिल्ले सिक्युरीटी डिपॉझीजीटय खात्यान जप्त केला.
प्रक्रियेंत निश्पक्षता सुनिश्चीत करपा खातीर निमाणो आदेश दिवचे पयली सगळ्यां संबंदींत धनयांक वैयक्तीक सुनावणे खातीर खात्यान आपयिल्ले. शॅक धोरणा प्रमाण पारदर्शक आनी नियंत्रीत पर्यटनाक प्रोत्साहन दिवपाक पर्यटन खातें बांदील आसा. गोंयच्या पर्यटन क्षेत्रात तत्वनिश्ठां राखून दवरपा खातीर आनी सगळ्या भागधारकांक कसलोच पक्षपात करिनासतना वेवसाय करपाक मेळचो म्हूण ही पावलां उबारल्याचे पर्यटन खात्यान सांगलें.
खात्यान वांटप केल्ली शॅकां परस्पर दुसऱ्यांक चलोवपाक दितात, ह्या आरोपांचे फाटभूंयेर पर्यटन हंगाम सुरू जावचे पयलीच सरकारान गोंय शॅक धोरण 2023-26 तयार केल्ले. हे प्रक्रियेंत पारदर्शकताय आनी योग्य पद्दत उरची म्हण शॅक धनी आनी संबंदींत संघटणां कडेन खोलायेन सल्लो घेवन धोरणाचो मसुदो तयार केल्लो.
—————-
युपीआय पेमेंट यंत्रणेक लागून काम सोंपें
पळोवणे वेळार दिसून आयले, शॅकांचेर पीओएस/युपीआय पेमेंट पर्यटन खात्यान दिल्ले शॅक धनयांच्या नांवार येना, जाल्यार भलत्याच कोणाच्या नांवार येता. तांचे मदीं कसलेच रगताचें नातें ना हे दिसून आयलें. उदाहरण पळोवपाक गेल्यार ज्योकीम लोबो ह्या धनयाच्या जाग्यार शॅकप्पा लमाणी हाचें नांवार पयशे वताले, माथायस रॉड्रीग्स जाग्यार अमीत मालदार, सरिता रॉड्रीग्स जाग्यार अजीत प्यारेलाल गुप्ता, मंगल देसाय जाग्यार अंनत बीर बहादूर छेत्री, अरूण महादेव साटेलकार हांचे जाग्यार कृष्णा लाल, धाकटू नायक हांच्या जाग्यार देनेती कुमार हांच्या नांवार पयशे वताले. ते भायर दर्यादेगेर लायसन्स नंबर नासतना शॅक घातिल्ले दिश्टी पडल्यो. आनी तांचे कडेन जीएसटी नोंदणी मेळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
