भांगरभूंय | प्रतिनिधी
पणजी: दर्यादेग वाठारांतल्या शॅक्सांचेर पर्यटन खात्याचें मात लेगीत नियंत्रण ना. शॅक धोरणाची पर्यटन खात्या कडल्यानूच पांयमल्ली जायत आसा. शॅक्सधारक गोंयकार आसलें तरी ते चलोवपी गोंया भायले आसात. तांच्या दादागिरीचो फटको गोंयकारांक बसता आनी तातूंतल्यानूच अमर बांदेकार ह्या थळाव्या तरणाट्याचो खून जालो. ह्या खुनाक राज्य सरकारूय जापसालदार आसा. असो आरोप काँग्रेसीचे प्रदेश अध्यक्ष अमीत पाटकार हांणी मंगळारा केलो.
पणजेंतल्या काँग्रेस भवनांत घेतिल्ले पत्रकार परिशदेंत ते उलयताले.
राज्य सरकारान निश्चीत केल्ल्या शॅक धोरणा प्रमाण दर्यादेगांचेर कितल्यो खाटीं आसच्यो हें निश्चीत केलां. पूण खात्या कडल्यानूच ह्या नेमांचें उल्लंघन जाता. दर्यादेगांचेर नेमान घालून दिल्ले परस चड खाटीं आसल्यार ताचो पर्यटकांक त्रास जाता. हाची जाणीव करून दिवपा खातीर गेल्ल्या अमर बांदेकाराचो थंयच्या कामगारां कडल्यान खून केलो. ही गजाल दुर्दैवी आशिल्ल्याचें पाटकार हांणी म्हणलें.
दर्यादेगांचेर जे शॅक्स चलतात ते गोंयकारांच्या नांवार आसले तरी ते गोंया भायले लोक चलयत आशिल्ल्याचें ऑनलायन बिलां वयल्यान लक्षांत येता. तरी लेगीत पर्यटनखात्याचे अधिकारी हाचे कडेन आडनदर करतात. हातूंतल्यानूच ह्या वेवसायांतलो भ्रश्टाचार दिसून येता अशें पाटकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
