भांगरभूंय | प्रतिनिधी
मुखेल सचिवांच्या फुडारपणा खाला फाल्यां बसकापणजी : हरमल दर्यादेगेर शॅक कर्मचाऱ्यां कडल्यान जाल्ले मारपेटींत दत्ताराम बांदेकार हाका मरण आयलें उपरांत दर्यादेग सुरक्षे विशीं हुस्को निर्माण जाला. दर्यादेग सुरक्षेचो नियाळ घेवन खर उपाय येवजण्यो करपा खातीर फाल्यां बिरेस्तारा मुखेल सचिवांच्या फुडारपणा खाला उंचेल्या पांवड्या वेली बसका जातली. पर्यटन, पुलीस, येरादारी, पंचायत, हवाई येरादारी खात्याचे सचीव तशेंच अधिकारी हाजीर आसतलें. पर्यटकांची सुरक्षा आनी पर्यटन वाडोवपा विशीं बसकेंत चर्चा जातली, अशी म्हायती गोपांनी दिली.
फाल्यां 30 जानेवारीक दनपारां 3 वरांचेर मंत्रालयांत बसका जातली. शॅकवाल्यां कडल्यान कायदो सुवेवस्था हातांत घेवपी प्रकारात हाली वाड जाल्या. फाटल्या चार म्हयन्यांत शॅक कर्मचाऱ्यां कडल्यान दोन खून जाल्या. हे भायर चार जाणाक जिवेशी मारपेटीचो प्रकार घडला. ही प्रकरणां फाटल्या चार म्हयन्यांच्या काळांत घडल्या. ह्या घडणुकांची चर्चा समाज माध्यमांचेर मोट्या प्रमाणांत सुरू आसा. हातूंतल्यान गोंय पर्यटकां खातीर सुरक्षीत ना, असो संदेश पातळपाक मजत जाता. ह्या घडणुकांची गंभीर दखल घेवन मुखेल सचिवांच्या फुडारपणा खाला फाल्यां बसका जातली. हे बसकेंत दर्यादेग आनी पर्यटन सुरक्षेचेर भर आसतलो.
शॅकवाल्यां कडल्यान नेमांचे उल्लंघन जाता. टेबलां तशेंच खुर्च्यो कशायतरेन लायल्यो आसतात. हाका लागून वाद जाता. तशेंच शॅकवाल्यां कडल्यान अतिक्रमण जावपाचें प्रमाण वाडलां.
शॅकवाल्यां कडल्यान जावपी अतिक्रमण आनी दादागिरी हाचोय नियाळ बसकेंत जातलो. व्यक्तीगत सुरक्षे खातीर बावंसरांचो वापर करपाचें प्रमाण वाडलां. तशेंच दर्यादेग वाठारांत वेवसायिकां कडल्यान हप्ते घेतात, अशी चर्चा आसा. हाका लागून गुंडगिरीत वाड जाता. ह्या सगळ्या समस्यांचेर चर्चा जावन उपाय येवजणेंची आंखणी जातली. पुलीस अधिकारी, पंचायत, येरादारी हांचे कडल्यान सुचोवण्यो घेवन उपाय येवजण्यांची आंखणी जातली.
पर्यटन वाडपा खातीर जायरातबाजी करप तशेंच सवलती दिवपाचोय विशय अजेंड्याचेर आसा.
…….
बसकेच्या अजेंड्याचें मुखेल विशय
केंद्रीय गृह मंत्रालय : वेंचीक देशां खातीर फुकट व्हिसा आनी एराव्हल सुविधा
केंद्रीय पर्यटन मंत्रालय : इनक्रेडिबल इंडिया जायरातीत गोंयचो आस्पाव
…
अबकारी खातें : दर्यादेगेर सोऱ्याच्यो बाटल्यो विकपाचेर बंदी घालपी
– दर्यादेगेवेल्या ग्लासाच्यो बाटल्यो काडून नितळसाण दवरप
– दर्यादेगेवेली शॅकां वेळांत बंद करप
….
बंदर आनी शिपींग : क्रुज टर्मिनलाचेर फुकट वायफाय सेवा
– रस्ते आनी नितळसाण घरां नितळ दवरप
– दिव्यांग आनी ज्येश्ट पर्यटकां खातीर सुविधा
– क्रुज लायनरांक सवलती दिवप
…….
येरादारी संचालनालय : विमानतळ, रेल्वे स्टेशन, क्रुज टर्मिनलाचेर योग्य दरांत टॅक्सी सेवा
– टॅक्सी संघटणे वरवीं टॅक्सी सेवा अॅप तयार करप
– रेंट ए कॅब धनया खातीर नेम खर करप
– योग्य वागणुके खातीर पर्यटक आनी चालकां खातीर जागृताय शिबिरां
……..
पर्यटन संचालनालय : ब्ल्यू फ्लॅग प्रमाणपत्रा खातीर दर्यादेगांची निवड
– एकादश तीर्थ सर्कीट, गांवगिऱ्या पर्यटनाक उर्बा
– मायस, वेडिंगा खातीर एक जनेल येवजण
– विमानतळ, क्रुज टर्मिनलाचेर म्हायती केंद्रां
– पर्यटन कर्मचाऱ्यांक योग्य प्रशिक्षण दिवप
– दर्यादेग, पर्यटन थळांचेर डू आनी डोंट सयत हेल्पलायन नंबर
– सुरक्षा आनी नितळसाणी विशीं योग्य म्हायती खातीर मोहीम
– दर्जेदार पर्यटना खातीर फिनलँड, स्वीडन, स्वीज देशांचेर भर
– गोवा ब्रँड प्रोमोट करपा खातीर विदेशांत मिडिया मार्केटींग
– शॅक कर्मचाऱ्यांक क्युआर कोड सयत आयडी कार्ड
– गोंयची संस्कृताय, संगीत, कुजीनाक उर्बा दिवप
– पर्यटक वाहनां खातीर पार्कीग सुविधा
…..
पंचायत : दर्यादेग, पर्यटन थळांची नितळसाण
– दर्यादेगांचेर डस्टबीन, नितळसाण घरां आनी चेंजींग रुम
– रस्ताद सुणी आनी हेडग्यां गोरवांचेर नियंत्रण
……
पुलीस, येरादारी : बेकायदा शॅक, भिकाऱ्यांचेर नियंत्रण
– शॅक कर्मचारी आनी एडव्हेंचर पर्यटन कर्मचाऱ्यांचे पुलीस व्हेरिफिकेशन
– टावट आनी उदका खेळां खातीर खर धोरण
– पर्यटन थळांवेली बेकायदा बांदकामां मोडप
……………………
एअरलायन्स, विमानतळ : गोंयात येवपी आंतरराष्ट्रीय विमानां वाडोवप
– हेर शारां कडेन गोंयाक थेट कनेक्टिविटी
– देशी विमानांचे दर नियंत्रीत करप
– विमानतळाचेर पर्यटनाची म्हायती दिवपी एलईडी स्क्रीन
– चार्टर विमानां खातीरच्या बशीक फुकट पार्कीग
– विमानतळाचेर फुकट वायफाय सेवा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
