भांगरभूंय | प्रतिनिधी
अहमदाबाद, खबरां संस्था: गुजरातच्या बीझेड फायनान्स ग्रुपान ‘एक का दो’ या नांवान चलोवपी पॉन्झी येवजणेचे क्रिकेट खेळगडेय बळी थारले. शुभमन गिल, राहुल तेवतिया, मोहित शर्मा आनी साई सुंदर सयत पांच खेळगडे १० लाख ते १ कोटी रुपयां मेरेन फटवल्यात. मजगतीं सीआयडी घोटाळे करपी, गुंतवणूक करप्यांचो डेटा सोदतात. हातूंत अभिनेतो सोनू सूद हांचेंय नांव मुखार आयलां. कारण ह्या फटींग मनशांचे एके कार्यावळीक सोनू हजर आशिल्लो. मात, गुंतवणूकदार म्हणून अभिनेत्याच्या नांवाची एंट्री सध्या तरी सांपडूंक ना.
सीआयडी क्रायमच्या सुत्रांनी दिल्ले म्हायती प्रमाण, पांच क्रिकेट खेळगड्यांनी पॉन्झी स्किमींत गुंतवणूक केल्ल्याचें मान्य केलां. मात, सीआयडीचे मुखेली डॉ. एस. राजकुमार पांडियन हांणी हे विशीं कसलीच प्रतिक्रिया दिवंक ना. हे पॉन्झी येवजणेचो सुत्रधार भूपेंद्रसिंग झाला जावन आसा. ताणें बीझेड फायनान्स सयत डझना परस चड कंपनीं स्थापन केल्ल्यो. तो स्वता ग्रुप सीईओ म्हणून फटयतालो.
पॉन्झी येवजणेंत ६ हजार कोटी जोडले
भूपेंद्र झाला २०१६ सावन बीझेड फायनान्स कंपनी चलयता. सीआयडीन गांधीनगरांत गुन्यांव दाखल करून तपास सुरू केला. विवीध येवजण्यां वरवीं तांणी लोकां कडल्यान तांणी ६ हजार कोटी रुपया एकठांय केल्या आसतले, असो अदमास आसा.
अशी घाली तोपी
५ लाखांचे गुंतवणुकीचेर ३२ इंची टीव्ही- मोबायल भेट. १० लाख रुपयांचे गुंतवणूकदारा खातीर गोंयची भोंवडी. एफडी आनी गुंतवणुकीचेर ७% व्याज लिखीत स्वरूपांत दिवपाचे आनी तोंडी १८% मेरेन दिवपाचें आस्वासन. एजंटांक म्हारग भेटवस्तूय दिताले.
उत्तर गुजराताक केलो आपलो अड्डो
भूपेन्द्र सिंह झाला हाणें राजस्थाना सयत देशभरांत आकर्शक गुंतवणूक येवजण्यांचें जाळें घातलें. उण्या काळांत चड व्याज दिवपाचें आस्वासन दिवन पॉन्झी येवजण सुरू केली. सुमार १४ हजार लोकांनी ह्या सापळ्यांत आडकून गुंतवणूक केली. येवपी दोन-चार दिसांनी गुंतवणूकदारांक व्याज दिवंक ना जाल्यार व्हड प्रमाणांत पिडेस्त मुखार येवपाची शक्यताय आसा. पुलिसांक एक निनावी अर्ज मेळ्ळे उपरांत तपास सुरू जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
