शुभमंगल ‘सावधान’

भांगरभूंय | प्रतिनिधी

लग्न हो जिणेंतलो खाजगी सुवाळो. लग्न कोणा वांगडा करचें, कशें करचें, कितले पयशे मोडचे, कोणाक निमंत्रण दिवचें, काय दिवचें न्हय हें थारावपाचो अधिकार लग्न जावपी संबंदीत व्यक्तींक आसता वा तांच्या कुटुंबाक. मात आमी सगलेच समाजाक थर्त भियेतात. तो कितें म्हणटलो, हाका वायट दिसतलें, आमकां लज जातली, लोक थोमणे मारतले, देव रागार जातलो अशे शेंकड्यांनी प्रस्न दोनूय लग्नघरांक पडटात. मागीर तीं भियोवन समाजाक मानवतलें अशेंच लग्न करतात. समाजूय ताचेर कांय दीस रुचीन भासाभास करता आनी मागीर त्या जोडप्याच्या संवसाराची कितें बरी, वायट खबर मेळटा काय म्हूण उमळशिकेन वाट पळयता. पेझाद लग्न लावपाचें आमच्या गोंयांत पसून फॅड आसा. तातूंत तुमी जांचो दुस्वास करतात, जांचे कडेन कोत्रसाण आसा, ताचे परस आपलें लग्न नेटान जावंक जाय, अशें सगल्यांकूच दिसता. ते खातीर ते उदका सारको पयसो मोडटात वा रीण काडून सण मनयतात. लग्नांतली हुंड्याची प्रथा अजून ना जावंक ना, फक्त तिची पद्दत बदल्ल्या, इतलेंच.
पुण्यांतल्या बावधन शारांत फाटल्या 16 मे दिसा वैष्णवी हगवणे हिका घोवा गेल्या घरांत मरण आयलें. तिचे कुडीर 29 घावे, वळ आशिल्ले, अशें पोस्टमार्टेम अहवालांत म्हणलां. ती आत्महत्या काय खून, ताचो तपास पुलीस करतात. ह्या प्रकरणांत पुराय कुटुंबाकूच अटक जाल्या. माव अजित पवारांच्या राष्ट्रवादीचो आदलो फुडारी. ताका फरारी जावपाक मजत करप्यां मदीं कर्नाटकांतलो प्रितम पाटील आसा. ताचो बापूय वीरकुमार चिकोडीचे आमदार. ते मंत्रीय आशिल्ले. हगवणे कुटुंबाक हुंडो म्हूण लाखांनी रुपयांची फाॅर्च्यूनर मोटार, 51 तोळे भांगर, चांदी दिल्ली. सध्या ते 2 कोटी रुपया मागताले. ह्या कुटुंबाची खंय मुळशी वाठारांत जमीन आसा. थंयच्या बाजारभावा प्रमाण तिचें मोल आयज 190 कोटी रुपया जाता. इतलें आसून तांकां पयशांची हाव कित्याक तें कळना? ही प्रवृत्ती सगल्या राज्यांनी, सगल्या जातींनी आसा. म्हणटकच हे घडणुकेचो धडो पुराय देशान घेवपाक जाय.
वैष्णवीच्या मरणा उपरांत मराठा समाजाचेर सरसकट टिका जावंक लागतकच पुण्यांतल्या मराठा समाजान पयर बसका घेवन कांय व्हडले निर्णय घेतले. सध्या हे थाराव पुण्या पुरतेच मर्यादीत आसात. तरीय ते महाराष्ट्रांतूच न्हय, तर गोंय, कर्नाटका सयत सगल्याच राज्यांनी चालीक लावंक जाय. फुडल्या 15 दिसां भितर मराठा समाजांतल्या लग्न सुवाळ्यां खातीर आनी राज्य पांवड्या वयल्या फुडाऱ्यांचे उपस्थिती विशीं आचारसंहिता थारावपाचो निर्णय समितीन घेतला. बसकेंतल्या थारावांचेर एक नदर मारपाक जाय. हाचे मुखार वैष्णवी सारको प्रकार ज्या कुटुंबांत घडटा, तांकां चली दिवप ना आनी तांचे चलयेक चलो दिवप ना, अशेंय थारलां. अर्थांत हें कायद्यांत बसता काय ना, तें पळोवचें पडटलें. फुडाऱ्यांक आपोवन ताचे वांगडा फोटो काडपाची नवी परंपरा सुरू जाल्या. खंयच्याच फुडाऱ्यान जांवयाचो सत्कार करप ना, व्हंकलकारांनी भेट (हुंडो) म्हूण दिल्ले गाडयेची चावी दिवप ना, भाशण करप ना, असो थाराव जाला. फक्त लग्नूच न्हय, तर हेर घरगुती सुवाळ्यांनी हें टाळचें, अशें म्हणलां.
लग्नां आतां 3- 3 दीस चलतात. ताका आळाबंद घालप, फुडारी येता म्हूण लग्नाचे विधी मदींच बंद दवरप, मिरवणूक काडून म्हुर्ताचेर लग्न लावप ना, मैदानांचेर वा हाॅलांचेर राजम्हाला सारके व्हडले सेट उबारप, आॅर्केस्ट्रा, शाही जेवण, रुखवतांत म्हारग वस्तू दिवन ताचें प्रदर्शन करप, आलिशान गाडयो, 40- 50 तोळ्यांच्यो वस्ती, व्हीआयपींक म्हारग भेटवस्तू अश्यो रिती बंद करपाचो निर्णय समाजाचे हे बसकेंत जाला. मराठा समाजान आत्मपरिक्षण करपाची गरज आसा, अशें सगल्यांनीच सांगलें. दरेका गांवांतल्या धर्मीक, राजकी वा प्रतिश्ठीत फुडाऱ्यान घराघरांनी भोंवून हे बाबतींत प्रबोधन, जागृताय करपाचो निर्णय बसकेंत घेतला. असल्या घडणुकां वेळार त्या कुटुंबा फाटल्यान रावपाचें, चलयांक शिकोवपाचें, तांकां स्वावलंबी करपाचें, दुसऱ्यान केलें म्हूण आपूणय लग्नाचेर चड पयसो खर्च करपाचो ना. कमी वेळेंत, कमी लोकांत आनी उण्यो खर्चांत लग्न करपाचें, जमीन विकून लग्न करचें न्हय, चलयेचेर अन्याय जाता जाल्यार समाजाक भियेवन ओगी रावचें न्हय, तिका कुळारा हाडची, मांय- मांवान सुनेक आनी तिणेंय तांकां आदर, आदार दिवचो, लाखांनी रुपया मोडून जावपी लग्नाक कोणेच वच्चें न्हय, अशें विचारुय बसकेंत जायत्या जाणांनी उक्तायले. ताचेच वांगडा मराठा समाजांतल्या कांय जाणांक आयज समज ना, तर बरोच मद मारला, हातांत बऱ्या – वायट मार्गान पयसो खुळखुळपाक लागिल्ल्यान थोडे मदांध जाल्यात, अशेंय कांय जाणांनी सांगलें. लग्न वा हेर घरगुती सुवाळ्यां खातीरची आचारसंहिता. स्वताच्या कुटुंबा पसून चालीक लावची, अशें एकमतान थारायलां. हे बसके उपरांतची पत्रकार परिशद व्हायरल जाल्या.
ही फक्त पुण्यांकूच न्हय, तर देशभरांतल्या कुटुंबांक, जाती- धर्माक देख. घरगुती सुवाळे मनोवपाक लोक आतां तरातरांचो भ्रश्टाचार करपाक लागल्यात. जमनी विकपाक लागल्यात. लग्नाचे परंपरीक विधी, रिती पाळपाचें सोडून मौजमजा, उधळपट्टी, बालीशपणान करपाक लागल्यात, पवित्र लग्नां म्हणल्यार आयज फिल्मी इव्हेंट जाल्यात. वैष्णवीच्या मरणान मालमत्तेचें प्रदर्शन करपी कुटुंबांक सद्बुद्धी येवं.