भांगरभूंय | प्रतिनिधी
आयज 5 सप्टेंबर. आयज देशभर शिक्षक दीस मनयतात. आयज भारताचे दुसरे राष्ट्रपती डॉ.सर्वेपल्ली
राधाकृष्णन हांचो वाडदीस. आयज तांच्या उगडासाक शिक्षक दीस मनयतात. 1962 वर्सा राधाकृष्णन हांणी राष्ट्रपती पदाचो सोपूत घेतलो तेन्ना ताणें आपलो वाडदीस शिक्षक दीस म्हूण मनोवपाची इत्सा उक्तायली. देशांतल्या शिक्षकांचो गौरव होच आपलोय भोवमान अशें तांणी सांगिल्लें. तेन्ना सावन सुरू
जाल्ली ही परंपरा अजूनय चालू आसा आनी घडये फुडाराकय चालू उरतली.
आमचे संस्कृतायेंत शिक्षक म्हळ्यार गुरूक मानाची सुवात आसा. दर एका मनशाचे निर्मितींत शिक्षकांची भुमिका खूब म्हत्वाची. शिक्षक हो फकत मार्गदर्शक न्हय तर जिणेक दिशा दाखोवपी दिशादर्शकय आसता. भारतीय शिक्षणीक परंपरेंत गुरू-शिष्य संबंद खूब पवित्र मानतात. पुर्विल्ल्या काळांत गुरूकुल पद्दत आशिल्ली. विद्यार्थी आपल्या पालकांक सोडून अभ्यासाक गुरूच्या घरांत रावपाक येताले. त्या शिश्यांच्या आवय-बापायची सुवात गुरू घेतालो. फकत पुस्तकी गिन्यान न्हय तर शिश्याच्या चारित्र्याची उदरगत करप हें आपलें कर्तव्य असो विचार करून गुरू विद्यादान करतालो. शिश्याच्या जिवितांत गुरूक सगळ्यांत उंचेलें स्थान आशिल्लें आनी गुरूच्या जिवितांतय शिश्याक सगळ्यांत चड प्राधान्य आशिल्लें. अशे तरेन त्या काळांत गुरू- शिश्य संबंद पवित्र बंधनांनी भरिल्लो. विद्यार्थी आपल्या पालकांक सोडून अभ्यासाक गुरूच्या घरांत रावपाक येताले. त्या शिश्यांच्या आवय-बापायची सुवात गुरू घेतालो.
आयज काळ बदलला तरी शिक्षकांचें म्हत्व मात्तूय उणें जावंक ना. आयच्या विज्ञानाच्या युगांतूय आदले भशेन शिक्षकांची गरज आसा. सतत ज्ञान अपडेट करपी शिक्षकाची. मनशाच्या जिवितांतल्यान शिक्षकाक काडून उडोवंक मेळना. शिक्षका बगर मनशाचें जिवीत भरकटूंक शकता. शिक्षक ना जाल्यार मनशाचें जिवीत भरकटिल्ल्या तारवा सारकें आसपाचें. देखून शिक्षकांचे उपकार मानपा खातीर दरवर्सा शिक्षकांचो दीस मनयतात. आमच्या देशांतच न्हय तर ऑस्ट्रेलिया, कॅनडा, ब्राझील, जर्मनी, जपान, इंडोनेशिया, मलेशिया, चिली हांगाय शिक्षक दीस मनयतात, पूण थंय हो दीस 5 ऑक्टोबराक मनयतात.
आमच्या देशांत 5 सप्टेंबराक मनयतात. कारण 1888 वर्साच्या ह्या दिसा भारताचे दुसरे राष्ट्रपती डॉ. राधाकृष्णन हांचो जल्म तामिळनाडूंतल्या तिरुथानी गांवांत एका मध्यमवर्गीय कुटुंबांत जालो. खूब बुदवंत आनी तीक्ष्ण बुद्धी आशिल्ल्यान तांणी शिक्षणाच्या मळार आपलें एक वेगळें वलय तयार केलें. आंध्र विद्यापीठ आनी बनारस संवसारीक विद्यापिठाचे कुलगुरू म्हूण तांणी काम केलें. 1931 ते 1939 मेरेन ते संयुक्त राश्ट्रांत भारताचे प्रतिनिधी आशिल्ले. १९४९ ते १९५२ मेरेन ते रशियेंत भारताचे राजदूत आशिल्ले. १९५२ वर्सा ते भारताचे पयले उपराष्ट्रपती जाले.
ह्या पदाचेर धा वर्सां काम केले उपरांत 1962 वर्सा ते भारताचे दुसरे राष्ट्रपती जाले. 1954 वर्सा भारतरत्नाचो सर्वोच्च पुरस्कार दिवन तांचो भोवमान जालो. डॉ. सर्वेपल्ली राधाकृष्णन हांकां तांच्या शुद्ध चारित्र्याक लागून, प्रकांड पांडित्य, अफाट सहिश्णुतायेक
लागून आनी प्रभावी उलोवपाक लागून संवसारभर लोकप्रियता मेळ्ळी. तांकां नोबॅल पुरस्कारा खातीर 27 फावटीं नामांकन
मेळ्ळें. शिक्षका सावन अध्यक्ष जावन तांचो प्रवास हो तांच्या वावराची गवाय.
तांच्या ह्या येसस्वीपणाच्या मानान सरकारान १९६२ सावन ताचो वाडदीस शिक्षक दीस म्हूण मनोवपाक सुरवात केली. देशभरांतल्या सगळ्या शिक्षकांक शिक्षक दिसाचीं परबीं!
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
