भांगरभूंय | प्रतिनिधी
पर्वरी: गोंयांत सेगीत पडपी पावसाक लागून आनी भारतीय हवामान खात्यान दिल्ल्या उटंगराच्या पावसाचे शिटकावणे उपरांत शुक्रार, ४ जुलयाक राज्यांतल्या सगल्या शाळांक सुटी जाहीर केल्या. शिक्षण संचालकांनी जारी केल्ल्या परिपत्रकांत म्हणलें, ल्हान भुरग्यांचे सुरक्षेचे नदरेन हो निर्णय घेतला. विद्यार्थ्यां वांगडा शिक्षकांकूय ही सुटी लागू आसा. मात, प्रशिक्षणा खातीर नेमिल्ले शिक्षक हजर रावप गरजेचें.
शाळेंतल्या विद्यार्थ्यांनी घरांतूच रावचें आनी हुंवाराच्या उदका पोंदाक आयिल्ले रस्ते, न्हंयांच्यो देगो आनी हेर धोको निर्माण करपी सुवातांचेर वयचें न्हय, असो उलो शिक्षण खात्यान मारला. गोंय राज्यांत सध्या पावसाचो नेट कायम आसा. विद्यार्थ्यांचे सुरक्षेचे नदरेन ही सुरक्षेची येवजण लागू केल्या. १ जून ते ३ जुलय सकाळ मेरेन गोंयांत ४० इंच पावस नोंद जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
