भांगरभूंय | प्रतिनिधी
हालींसरा गोंयांत पुलिसांचे वर्देचेर जो दाग लागला, तो कोणूच धुवन उडोवंक शकचो ना. तातूंत आतां आनीक भर घाल्या ती आयआरबीच्या पुलीस कॉन्स्टेबलान. कसलीच भिरांत बाळगिनासतना अमित नायक ह्या कॉन्स्टेबलान जमीन हडप प्रकरणांतलो खांपो गुन्यांवकार सिद्दीकी उर्फ सुलेमान खान हाका गुन्यांव फांट्याच्या बंदखणींतल्यान पळपाक कथीतपणान मदत केली. तो ताका बंदखणींतल्या भायर काडटा आसतना जी सीसीटीव्हीची फुटेज वायरल जाल्या, ती पळयल्यार तांचो हो प्लॅन नियोजीत आशिल्लो आनी तांकां कोणाचो तरी ‘आशिर्वाद’ आसा हें समजतलें. च्यायेक बी वचपाक भायर सरतात तशे हे दोगूय भायर सरून मोटरसायकली वयल्यान पळून गेले.
सुलेमान फाटल्या चार वर्सां सावन फरारी आशिल्लो. पुलिसांच्या हाताक लागनाशिल्लो. पूण 12 नोव्हेंबराक ताका गोंय पुलिसांनी हुबळीच्यान धरून हाडिल्लो. ताचेर कितलेशेच आनी कितलेशेच कडेन गुन्यांव नोंद आसात. म्हुणल्यार तो गुन्यांव करपांत गोळ्ळा आनी ताका गुन्यांव करप म्हुणल्यार कांयच न्हय कशें हें सिद्ध जाता. अशा गुन्यांवकाराक जेन्ना बंदखणींत दवरतात, तेन्ना त्या बंदखणीच्यो वण्टीच न्हय तर कुलूप धरून कुलूप मारपीय प्रामाणिक आनी न कोसळपी आसपाक जाय. पूण हे घणडुकेन गोंयचें गृह खातें कोसळ्ळां हें दिसून आयलें. कोसळून तें मातयेभरवण जालां आनी देशसेवे खातीर न्हय तर स्वताच्या सुवार्था खातीर पुलिसेंत रुजू जाल्ल्या भ्रश्ट वृत्ती आशिल्ले पुलीस उक्ते जाल्यात. आदीं आमच्या गांवांत चोर बी सांपडलो जाल्यार ताका पुलिसांचे सुवादीन करचे पयलीं नागडो करून हुमल्यो घालताले. अशी ख्यास्त मनीस हक्क कायद्या प्रमाणें चलना. पूण गुन्यांवकारांक साथ दिवपी गुन्यांवकारी वृत्तीक हें फावो अशें दिसता.
जमीन हडप प्रकरणाच्यो कागाळी जेन्ना पुलीस स्टेशनाचेर येताल्यो, त्यो पुलिसांनी गंभीरपणान घेवंक नाशिल्ल्यान येदो व्हडलो घोटाळो जालो अशें खुद्द मुख्यमंत्री प्रमोद सावंत हांणी आदीं म्हणलां. इतलेंच न्हय तर फाटीं वाळपय जाल्ल्या ‘पासिंग आवट परेडी’ वेळार तांणी नव्या पुलिसांक मार्गदर्शन करतना हे नवे ‘भरती’न कसलींच वायट कामां करून आपले वर्देक दाग लावचो न्हय अशें म्हणिल्लें. पुलिसांनी आपले वर्देचो मान राखचो आनी खात्याचोय मान राखचो अशें तांणी सांगिल्लें.
पुलीस हे लोकांचे सेवे खातीर आसतात. गुन्यांवकारांचे न्हय. हाची आमच्या पुलिसांक परत परत याद करून दिवपाची गरज आसा. कसलें तरी हांयस दोळ्यां मुखार दिसतकच तांची याद वता आनी ते गुन्यांवकारी भुमिकेंत वतात. ते उपरांत ते नाटकांय बरीं करतात. आतां ह्याच प्रकरणांत पळयलें जाल्यार ज्या कॉन्स्टेबलान ह्या गुन्यांवकाराक कादयेंतल्या सोडला आनी तो हुबळी पुलिसांक शरण आयला. जंय सुलेमानाक पुलिसांनी 12 नोव्हेंबराक धरून हाडिल्लो. आतां हो कॉन्स्टेबल घडये आपूण प्रामाणिक म्हूण दाखोवपाक आपल्याचें सुलेमानान अपहरण केल्लें अशें बी सांगत. ताका जशी हुबळी वचपाची वाट कळ्ळी, तशी ताका गोंयांत येवपाचीय वाट कळटा आसतली. मागीर हुबळी पुलिसांक कित्याक शरण आयलो? गोंयांत येवन गोंय पुलिसां मुखार कित्याक शरण आयलो ना? हुबळींत शरण आयला म्हणटकच ताका हाडपाक गोंय पुलिसांक थंय वचचे पडले. गुन्यांवकारान फुज्ज्यो काडल्यो, मात अमित नायक शरण आयलो. ते दोगूय मोटरसायकलीन हुबळी गेले? काय बंदखणीच्या कांय अंतराचेर तांकां गाडी येवन राविल्ली हाचो तपास करप गरजेचो. हो तपास सारको जालोना जाल्यार अशे कितले सुलेमान गोंयच्या बंदखणींतल्यान फुज्ज्यो काडीत हें सांगूंक शकनात.
गुन्यांवकारी वृ्त्तीच्या कांय पुलिसांक लागून गोंयच्या लोकांचो पुलिसां वयलो विस्वास उडला. कांय गुन्यांवकारी पुलीस खऱ्या गुन्यांवकाराक सोडून पिडितांक कशे त्रास करतात हाचीं कितलींशींच उदाहरणां आसात. फाटल्या विधानसभा अधिवेशनांत गोवा फॉरवर्डचे आमदार विजय सरदेसाय हांणी पुलिसांचीं अशी कृत्त्यां उक्ताडार हाडिल्लीं. बलात्कार प्रकरणांतल्या गुन्यांवकाराक पुलीस कशे मजत करतात आनी आरोप आशिल्ल्ल्या एसी मॅकानिका कडल्यान आपल्या घरा कडेन एसी कशी फुकट बसोवन घेतात हें लोकांनी आयकलां. हे खातीर अशा पुलिसांक हांवें जे मुद्दे मांडल्यात ते फट म्हूणपाचें धाडस जावचें ना. सत्य बागवनासतना उबें रावलें जाल्यार, केदीय व्हडली शक्त ताच्या तोंडांतल्यान फट वदोवंक शकना!!! गुन्यांवकारी वृत्तीचे अधिकारी सत्याच्या मार्गान चलनात, देखून तांकां ह्या मार्गाचो आत्मविस्वास खबर ना.
सुलेमानाक पळून वचपाक दिवपाची ही घडणूक जाले उपरांत विरोधी फुडाऱ्यांनी सरकाराचेर आनी पुलिसांचेर फोग काडलो. तांचे खातीर तें खाद्य. पूण गोंयकारांकय हिस्पाभायर तिडक मारल्या. हे खातीर विरोधकांनी आनी गोंयकारांनी संबंदितांचो राजिनामो मागचे पयलीं, तांणी आपूण बेशिस्त, लायकी नाशिल्ले, आनी ह्या कामाक पात्र ना म्हूण आदींच राजिनामो दिवपाचो. विदेशांत अशें जाता. कसल्याय वायट घडणुकांची जबाबदारी घेवन वयल्या पदार आशिल्ले राजिनामो दितात. गोंयांत आनी आमच्या देशांत हें शक्य ना, कित्याक तर आमी ज्या पदार आसतात त्या पदाचो आमकां निवृत्त जाय मेरेन दुरुपयोग करपाचो आसता आनी आपलीं बॉल्सां भरपाचीं आसतात. सगळेच न्हय. तर तशा वृत्तीचे आसतात तेच…
वर्सा फाटीं आम आदमी पक्षाचे आमदार वेंजी वियेगस हांणी एक पुलीस वेवसायिकांक लुट्टा आनी चोरां कडल्यान चोरयो करू घेता म्हूण भर विधानसभेंत आरोप केलो. सरकाराक ताका सेवेंतल्यान काडचो पडलो. कित्याक तर तो खरेंच चोरांक हाताक घेवन तांचे कडल्यान चोरयो करून घेतालो आनी ते सांपडले जाल्यार आपल्या वरिश्टांच्या आदारान तांकां सोडटालो. ह्या कॉन्स्टेबलाक काडलो, पूण जे वरिश्ट ताचे टोळयेंत आशिल्ले (जाल्यार) ते अजून सेवेंत आसात आनी अशा वृत्तीचे अधिकारी लोकांक लुटपाचीं नवीं साधनां आनी येवजण्यो तयार करता आसतले. हाचो परिणाम गोंयचे जनतेचेर जाता.
जमीन हडप प्रकरणांत, जुगाराचो हप्तो घेवपांत, स्क्रॅप डिलरां कडल्यान पयशे घेवपांत कितल्याशाच पुलिसांचो हात आसता. सांपडटा तो ‘चोर’, जो सांपडना तो आपूण वर्दी घालून मिरयत आनी सामान्य जनतेक धमकायत आसता. अशे पुलीस कायदो आनी सुवेवस्थेक धोक्याचे आसात. अशी वृ्त्ती सोदून काडून तांकां सरकारान चिमटो काडप शाणपणाचें आसा. नाजाल्यार पुलीस वर्देंतल्या चोरांची आनी गुन्यांवकारांचें प्रमाण वाडटलें. मागीर आमकां म्हणचेंच पडटलें… शी!!! थू…
संजय बोरकार
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
