भांगरभूंय | प्रतिनिधी
समाजीक जगण्याक तिगोवन दवरपी बळ म्हळ्यार शिस्त. वैयक्तीक उदरगत, संस्थांत्मक वाड आनी समाजीक उदरगत हांचो कोनशाचो फातर म्हूण काम करपी ती एक वागणूक, एक पद्दत. आत्मसंयम, नेमांक पाळो दिवप, अधिकाराचो आदर आनी प्रलोभनां वा विक्षेपां मुखार आसतना लेगीत जबाबदारपणान वागपाची तयारी हांचो आस्पाव शिस्त ह्या उतरांत जाता. जिणेच्या दरेका मळार व्यक्तीगत, वेवसायीक, समाजीक आनी हेर प्रकारची शिस्त समरसताय सांबाळपाक, येस मेळोवपाक आनी मुल्यां पोसपाक म्हत्वाची भुमिका घेता.
वैयक्तीक जिणेंत नेमान संवय, वेळेचें वेवस्थापन, स्वताचेर नियंत्रण आनी ध्येयप्रधान कृती हांचे वरवीं शिस्त सुरू जाता. एक शिस्तबद्ध मनीस रचनात्मक, शांत आनी उत्पादक जिणेचें फुडारपण करपाची चड शक्यताय आसता. न्हीद, निरोगी खाण जेवण, व्यायाम आनी आत्मचिंतन ह्यो गजाली शिस्तबद्ध जिणेचो वांटो थारतात. हें नासत जाल्यार व्यक्तीक आडखळी, अकार्यक्षमता आनी भावनीक अस्थिरताय हांचो फुडो करचो पडटा.
कुटुंबीक मळार परस्पर संवाद आनी जापसालदारकी हांचे वरवीं शिस्त प्रगट जाता. दरेक वांगडी शिस्तीन आपली भुमिका वळखून ती पुराय करता तेन्ना कुटुंब प्रभावीपणान काम करता. कुटुंबीक मळार भुरग्यांक शिस्त लागपा खातीर स्वता पालकांनी आनी घरांतल्या व्हड लोकांनी शिस्तीन काम करप भोव महत्वाचें. आपल्या कृतींचे संभाव्य परिणाम भुरग्यांक सांगल्यार जबाबदार, सहानुभुती पूर्ण भुरगीं घडटलीं.
वेवसायीक क्षेत्र तर शिस्तबद्दतायेचेरूच फुलता. प्रतिबद्ध आनी जापसालदारकी आशिल्ले कर्मचारी कामाचे सुवातेर आसत जाल्यार कार्य संस्कृताय आनी उत्पादनांत सकारात्मक योगदान मेळटा. शिस्तीक लागून कामाची उत्पादकता वाडटा, कामां वेळार पुराय जावपाची निश्चिती आसता आनी वांगड्यां मदीं सहकार्याक पोसवण दिता.
समाजीक मळार शिस्त कायदो, सुवेवस्था आनी सहअस्तित्व सांबाळटा. कायदे पाळपी, भौशीक गजालींचो आदर करपी आनी नागरी कर्तव्यां राखपी नागरिकां वरवीं प्रगतीशील राष्ट्र निर्माण जाता. कायद्याचें राज्य, न्यायवेवस्था आनी लोकशाय प्रक्रिया हीं सगलीं शिस्तबद्ध नागरिकांचेर आदारून आसतात. समाजीक पांवड्यार शिस्त ना जाली जाल्यार अराजकता, भ्रश्टाचार, अशांतताय आनी अधोगती जाता. अर्थीक समृध्दी आनी संवसारीक मान मेळोवपी देशांनी शासन, शिक्षण आनी नागरी समाजांत खोलायेन शिस्तबद्ध वेवस्था आसा हें आमकां पळोवपाक मेळटा.
शिक्षण क्षेत्रांत शिस्त खासा परिवर्तनकारी भुमिका करता. शिक्षणीक संस्था म्हळ्यार फक्त शिकपाची न्हय जाल्यार फुडारांतल्या नागरिकांक, वेवसायिकांक आनी फुडाऱ्यांक तयार करपी केंद्रां आसात. वर्गांतली शिस्त एक केंद्रीत आनी आदरपूर्ण वातावरण सुनिश्चीत करता. शिक्षणीक शिस्त अभ्यास, परिक्षा आनी बौद्धीक विकासाक बळगें दिता जाल्यार आपशिस्त विद्यार्थ्यांक स्वताचे वागणुकेचेर नियंत्रण दवरपाक आनी जाणीवपूर्वक निर्णय घेवपाक मजत करता. शिक्षक आनी प्रशासकी कर्मचाऱ्यांनी तांच्या कृतीतल्यान शिस्तबध्दतायेचो प्रसार करचो पडटलो. वेळार वर्गांत पावप, धडे तयार करप आनी शिक्षणीक अखंडताय राखून दवरप म्हत्वाचें.
व्यापक पांवड्यार, धोरण निर्मात्यांनी शिक्षणीक वेवस्था समावेशक, आकर्शक आनी समकालीन आव्हानांक संबंदीत आसा हाची खात्री करची पडटली. अभ्यासक्रमांत शिक्षणीक आशया वांगडाच समस्या सोडोवप, भावनीक बुध्दी आनी संघटणात्मक वावराचेर भर दिवपाक जाय. शाळेंतल्या मुळाव्या साधनसुविधां वांगडाच खेळां सुविधा, समुपदेशन केंद्रां आनी अभ्यासक्रमा भायल्या कार्यावळींनी विद्यार्थी अदीक फुलतात.
आयज शिस्त ह्या गजाली कडेन खूब दुर्लक्ष जाता. हाका जायते घटक योगदान दितात. समाजीक पांवड्यार वाडत वचपी उपभोक्तावाद, बेगोबेग मेळपी संतुश्टताय आनी माध्यमांचो प्रभाव तरणाट्यांच्या मनांतल्या यश आनी यत्न हांचे विशींच्या धारणांक बदलपाक लागला. आयज जायते लोक शिस्तबद्ध वागचे परस बेगोबेग येस मेळोवपाची आकांक्षा दवरून वागतात. कुटुंबांत पालकांच्या वागणुकेचो परिणाम म्हण लेगीत जायते खेपे भुरग्यां मदीं फक्त हक्काची भावना निर्माण जाता आनी तीं नेमां कडेन आडनदर करतात.
समाजीक पांवड्यार बेशिस्तीचो दीर्घकाळांतलो जावपी परिणाम म्हळ्यार सहानुभुती, जापसालदारकी आनी नैतीन अधिश्ठान नाशिल्ली पिळगी तयार जावप. शिस्तबध्दतेचें मोल नाशिल्ली व्यक्ती व्हड प्रमाणांत समाजा खातीर विघातक थारूंक शकता. ह्या संकश्टाक तोंड दिवपाक बहुप्रवाही पद्दत जाय. सगल्यांत म्हत्वाचें म्हणल्यार शाळेंत सगल्या पांवड्यार मोल-आदारिल्लें शिक्षण दिवचें पडटलें. नेम कित्याक आसात आनी तांचो सगल्यांक कसो लाव जाता हें समजून घेवपाक मजत करची पडटली. नागरी शिक्षण हो अभ्यासक्रमांतलो एक भाग करचो पडटलो, जे वरवीं विद्यार्थ्यां मदीं समाजीक जापसालदारकी आनी योग्य रितीन वागपाची अंतर्गत प्रेरणा निर्माण जातली.
घरांत शिस्तबद्ध वागणुकेक आकार दिवपा मदीं पालकांची म्हत्वाची भुमिका आसता. तांणी स्वता आपल्या कृतींतल्यान वेळ वेवस्थापन, शिस्त हांचें दर्शन घडोवन दिवचें पडटलें. सातत्यान नित्यनेम थारावप, माध्यमांचो वापर करपाचेर नियंत्रण दवरप, आनी भुरग्यां कडेन मुल्यां विशीं नेमान संवाद सादप खूब मजत करूंक शकता.
निमाणें शिस्त म्हणल्यार नियंत्रण न्हय जाल्यार सशक्तीकरण आसा. शिस्तबद्ध मनीस हो दोळे धांपून गजाली पाळपी न्हय जाल्यार प्रामाणीकपणान वागपी, दुसऱ्यांक मान दिवपी आनी उत्कृश्टताये खातीर यत्न करपी आसता. भंयान काम करपी न्हय जाल्यार आदर्श आनी न्यायान प्रेरणा दिवपी आसता. मतभेद ओगी करपी न्हय जाल्यार प्रगती कडेन रचनात्मक रितीन व्हांवपी आसता. शिस्त जेन्ना योग्य रितीन रुजता तेन्ना मनशाचो आत्मो उंचेल्या पांवड्यार पावता.
निमाणें सांगपाचें जाल्यार, जिणेच्या दरेका आयामांत शिस्त हो एक गरजेचो घटक. यत्न, धीर आनी जिद्द हांचो फाटलाव करता आसतना खास करून राष्ट्र फुडाराक आकार दितना विंगड विंगड प्रकारची शिस्त लावप साप्प गरजेचें. पालक, शिक्षक आनी व्हड प्रमाणांत समाजाची ही जापसालदारकी. तरणाट्या मनांक तांचीं ध्येयां, तांचीं तत्वां, तांच्यो मोखी साध्य करपाक सशक्त करपी पोसवण दिवप ही आमची सगल्यांची जापसालदारकी आसा.
डॉ. चिन्मय मधू घैसास
9823728640
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
