भांगरभूंय | प्रतिनिधी
आदर्श शिस्तबद्ध तंत्र सोदपाक कांय वेळ लागूं येता. एक आनंददायक आनी सुरक्षींत शिकपा वातावरण तयार करपा खातीर शिक्षक आपल्या विद्यार्थ्यां कडेन संबंदीत शिस्तप्रिय जावपाचे सृजनशील मार्ग सतत सोदतात.
श्रेश्ठताय ही शिस्त आनी अभ्यासांतल्यान येता. संयोगान न्हय, अशें लेखक अरिस्टॉल म्हणटा. तेन्ना शिक्षकांक विद्यार्थ्यांचेर लक्ष दवरपाक वर्गांतलीं शिस्त आदार करता. भुरग्यांक शिक्षणीक उदरगत करपाक शाळेंत शिस्त गरजेचीं. विद्यार्थांक सुरक्षींत दवरपाचे आनी तांची सृजनशीलताय वाडोवपाचे नदरेन शिस्त म्हत्वाची. शाळेतली प्रभावी शिस्त भुरग्यांक खर निर्णय घेवंक आनी अभ्यासाचेर लक्ष केंद्रीत करपाक मजत करता.
वर्गांत शिस्त दवरपाक शिक्षकांक वेग-वेगळी रणणिती कळपाक जाय. तांच्या वर्गांत प्रभावी आशिल्लीं, उत्तम पद्दतीं वळखुपाक शिस्त जाय. शिस्तींत वर्ग, विद्यार्थीं आनी अणभव हांचेर आदारून हातूंत बदल जावं येतात. आदर्श शिस्तबद्ध तंत्र सोदपाक कांय वेळ लागूं येता. एक आनंददायक आनी सुरक्षींत शिकपा वातावरण तयार करपा खातीर शिक्षक आपल्या विद्यार्थ्यां कडेन संबंदीत शिस्तप्रिय जावपाचे सृजनशील मार्ग सतत सोदतात.
ह्या लेखांत वर्गांतली शिस्त तिगोवन दवरपा खातीर कांय सादे उपाय आसात. ताचो शिक्षकांनी बरो उपेग वर्गांत करूं येता.
शिक्षकांक विशय गिन्यान आसूंक फावो
वर्गांतली शिस्त तिगोवन दवरपाक शिक्षकांक विशयाचीं बरी जाणविकाय आसूंक जाय. तांकां तांच्या वर्गांत सहजतायेन आनी लक्ष केंद्रीत करून हाजीर रावंक मेळटा. वर्गांत तांका सगळ्या विद्यार्थ्यांचें निरिक्षण करपाक मेळटा. तांच्या हालचालींचेर, कृतीचेर आनी वागणुकेचेर बारीकसाणेन नदर गरजेचें थरता.
शिक्षकांची संवाद शैली
दरेका वर्गांतली शिस्त तिगोवन दवरपाक आनीक एक म्हत्वाची पद्दत म्हणल्यार शिक्षकांची संवाद शैली. संवाद बळिश्ट आनी स्पश्ट आसूंक जाय. विद्यार्थ्यां कडेन सकारात्मक संबंद आसल्यार शिकपाचें वातावरण तयार जाता.
अभ्यास गट तयार करप -(पीयर गृप्स)
शिक्षकांनी वर्गाक जाय त्या गटांनी विभागूं येता. दरेका पंगडान वेंचून काडिल्लो एक फुडारी आसूं येता. ह्या गटांचो उपेग शिक्षकांनी वेग-वेगळीं कामां करपाक शकता. विद्यार्थ्यांच्या सहकार्यांक आनी संघटनात्मक वावराक प्रोत्साहान दितले. ताका लागून विद्यार्थ्यांची नकारात्मक वागणूक उणी जातली. तरणाट्या विद्यार्थ्यांक उत्पादक आनी मौलीक वावरांत वांटो घेवपाक आमी प्रेरणा दिवंक शकतात.
विद्यार्थ्यां विशीं म्हायती जाणून घेयात
शिक्षकांनी विद्यार्थ्यांचीं नांवां बेगीन शिकून वर्गांत आनी वर्गा भायर वापरचीं. विद्यार्थ्यांचीं कुटुंबीक फाटभूंय आनी अभ्यासा खातीर वैयक्तीक प्रेरणा तांका आपलें बळगें आनी दुबळेंपणाची जाणविकाय आसूंक जाय. दरेका विद्यार्थ्यांक तांचे शिकपाचे परिणाम सुदारपाक मजत करप. वर्गा भायर आनी वर्गा भितर दरेका विद्यार्थ्यां कडेन शिक्षकांचे संबंद बरे आसूंक जाय. वयर दिल्ल्यो सुचोवणी मतींत दवरून शिक्षकान वर्गाचे नेम तयार करूंक जाय. “आमच्या शाळेचे नेम”, ही कविता वाचुया. – संस्काराची देख दिवया, शाळेचे नेम पाळुया, शिस्तीन रांकेंत उबे रावुया, ताठ मानेन राश्ट्रगीत गावुया, शाळेचो वाठार निवळ दवरुया, शाळेची सोबीतकाय वाडोवया, झगडीं मस्ती सोंपोवया, शाळेची कीर्त वाडोवया, ल्हान-व्हडांचो मान राखुया, गिन्यानी जावन सुखान जगुया. उपरांत शिक्षकांनी वर्गाचे नेम अशें करूं येतात. देख,- नमळायेन वागुया, शाळेंत वेळार पावुया, वर्ग नितळ दवरूया आदी. तेच परीं उपरांत तांका ग्रेड दिवंक शकतात.
बोवाळाचेर ख्यास्त हो उपाय न्हय
विद्यार्थ्यांच्या बोवाळाक लागून तांका ख्यास्त दिवप, ही चड करून पालक आनी शिक्षकांची चूक आसता. कांय काळा उपरांत भुरग्यांक किर्र-किर्राक आवय-बापूय आनी शिक्षक ख्यास्त दितात. मारतात. ह्या पद्दतींचो तांचेर अजिबांत परिणाम जायना. ल्हान भुरग्यांक शिस्त दिवपाची गजाल येता तेन्ना पालक चडांत- चड दडपशाय वापरतात. हया दडपशायेचो अर्थ सतत बोवाळ करप, मारप, वा भुरग्यांक घुस्मटमार करप. भुरग्यांच्या मनांत भंय निर्माण करून शिस्त दिवपाची ही पद्दत पारंपारीक म्हणूंक जाय. कारण आदल्या सगळ्यां पिळग्यांक ह्या भंयांतल्यान वच्चें पडलां. हातूंत दुबाव ना. पूण जसो – जसो काळ बदलत वता, तसो- तसो हे पद्दतीचो परिणाम उणो जायत गेलो. बालरोगतज्ञ आनी मानसोपचार तज्ञांच्या मतान भुरग्यांक अशे तरेन मारून – बडोवन शिस्त दिवंक मेळना.
विश्वास तिगोवन दवरात
जेन्ना आवय – बापूय आनी शिक्षक आपल्या भुरग्यांक सदांच मारतात. तेन्ना तांकां शिक्षक आनी आवय- बापाय विशीं आशिल्लो मोग भुरग्यांच्या मनांत उणो जाता. विश्वासय उणो जावंक कळाव लागना. हें खंयच्याय नात्यांक हानीकारक थारूं येता. देखून सादारणपणान भुरग्यां कडेन खर उलोवप टाळचें. तुमचो भुरग्यांचो तुमचेर विश्वास उणो जालो जाल्यार तो तुमचेर परतून विश्वास दवरपाचो ना. ही घडणूक तुमकां ताचे पासून सदां खातीर पयस करपाक शकता. देखून ही गजाल सांबाळून ताका समजून घेयात. आनी हात वयर करून ताचेर बोवाळ घालप टाळात.
तुस्त – तोखणाय करात
शिक्षक आनी पालक भुरग्यांनी चूक केल्यार तांकां आरडी मारून सांगतात. पूण तेंच भुरगें जेन्ना ती चूक सुदारून बरें वागपाक लागता, तेन्ना ते तांची तोखणाय करीनांत. प्रोत्साहानूय जिनांत. अशें करप सारकें न्हय. गरजेच्या वेळार तांची तुस्त- तोखणाय आनी अपुरबाय केल्ल्यार तीं चूक केन्नाच करची नांत.
शिक्षकांनी गतीशील आनी उर्बेभरीत आसूंत जाय, सगळ्या वेळार सकारात्मक वृत्ती आसूंक जाय. ह्यो सगळ्यो सुचोवणी शिक्षकांक शिकपाचें वातावरण बरे तरेन शिकोवपाक मजत करतली अशें म्हाका दिसता.
विशाल सिनाय खांडेपारकार
8080622370
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
