भांगरभूंय | प्रतिनिधी
मुंबय उच्च न्यायालयाचें निरिक्षण; कामुर्ली प्रकरणाचें नदरेन म्हत्वाचें
भांगरभूंय । प्रतिनिधी
पणजी : विद्यार्थ्यां मदीं शिस्त हाडपा खातीर ख्यास्तीचो भाग म्हूण शिक्षकान एकाद्या वेळार मारलो जाल्यार तो गुन्यांव थारना. विद्यार्थ्यां मदीं शिस्त निर्माण करप ही शिक्षकाची लागणूक आसता, अशें निरिक्षण उच्च न्यायालयान 2 फेब्रुवारी 2023 ह्या दिसा दिल्ल्या निवाड्यांत उक्तायल्लें. मुंबय उच्च न्यायालयाच्या गोंय खंडपीठान बाल न्यायालयान दिल्ली ख्यास्त रद्द करून संबंदीत शिक्षिकेची निर्दोश सुटका केल्ली. हें प्रकरण 28 मार्च 2014 ह्या दिसा घडिल्लें.
विद्यार्थ्याक शिक्षकान मारला वा ख्यास्त खंयच्या उद्देशान दिल्या, हें म्हत्वाचें थारता. कामुर्लेच्या दोगा शिक्षिके कडल्यान विद्यार्थ्याक बडोवपाचो विशय सध्या चर्चेंत आसा. कामुर्लेचे मुळावे शाळेंत दोगां शिक्षिकांनी एका विद्यार्थ्याक बडयलो. हे विशीं विद्यार्थ्याच्या बापायन पुलिशेंत कागाळ केल्या. पुलिसां कडल्यान शिक्षिकांक अटक जाली. अटके उपरांत दोगांय शिक्षिकांची जामिनाचेर सुटका जाल्या. वेवस्थापनान दोगांय शिक्षिकांचें निलंबन केलें आसलें तरी शिक्षण खात्या कडल्यान प्रकरणाची चवकशी सुरू आसा. शिक्षण संचालक शिक्षिकांची बाजू सोमारा आयकून घेतले. सैमीक न्याया प्रमाण शिक्षिकांची बाजू आयकून घेवप कायद्यान गरजेचें थारता, अशें शिक्षण संचालक शैलेश झिंगडे हांणी सांगलां.
विद्यार्थ्यांक शिक्षकांनी बडोवप ही गंभीर गजाल आसा. चवकशे उपरांत शिक्षिकांचेर बडतर्फीची कारवाय लेगीत जावप शक्य आसा, अशें मुख्यमंत्री डॉ. प्रमोद सावंत हांणी स्पश्ट केलां. शिक्षिकांची न्यायालयांत सुटका जावची न्हय म्हूण जतनाय घेवन तपास सुरू आसा, अशें मुख्यमंत्री डॉ. प्रमोद सावंत हांणी स्पष्ट केला.
हाचे पयली सुद्दा राज्यात शिक्षकां कडल्यान विद्यार्थ्यांक मारहाण जावपाचे प्रकार जाल्या. अशेच एके घडणुके प्रकरणी उच्च न्यायालयान बाल न्यायालयान दोशी थारायल्या शिक्षिकेची निर्दोश सुटका केल्ली.
सडा हांगच्या सरकारी प्राथमिक शाळेच्या शिक्षिकेन दोगां बहिणी आशिल्या विद्यार्थीनीक मारहाण केल्ल्याची कागाळ 28 मार्च 2014 दिसा मुरगाव पोलीस ठाण्यात दाखल जाल्ली. पुलिसांनी गुन्याव नोंद करून तपास केलो आनी बाल न्यायालयात आरोपपत्र दाखल केले. पोलिसांनी भारतीय दंड संहितेच्या कमल 324 आनी गोंय बाल कायद्याच्या कलम 8(2) खाला आरोपपत्र दाखल केल्ले. बाल न्यायालयान संबंधीत शिक्षिकेक दोशी थारावन मारहाणी खातीर 10 हजार रूपयांचो तालांव ख्यास्त म्हूण दिल्लो. तालांव फारीक केलो ना जाल्यार 6 म्हयन्याची सादी बंदखण शिक्षिकांक भोगची पडटली. तशेच विद्यार्थीनीच्या छळणुके खातीर एके दिसाची बंदखण आनी 1 लाखाच्या तालांवाची ख्यास्त दिल्ली.
ह्या निवाड्याक संबंधीत शिक्षिकेन मुंबय उच्च न्यायालयाच्या गोंय खंडपीठात आव्हान दिल्ले. मुंबय उच्च न्यायालयान संबंधीत शिक्षिकेक निर्दोश थारावान ख्यास्त रद्द केली. विद्यार्थ्यांक शिस्त लावपा सयत तांकां सुदरावपाचे यत्न शिक्षक करतात. ही तांची लागणूक थारता. बऱ्या उद्देशान ख्यास्तीचो भाग म्हूण विद्यार्थ्याक हात लायलो जाल्यार तो गुन्यांव थारना, अशें निरिक्षण निवाड्यांत नोंद केलां. उच्च न्यायालयान शिक्षिकेक निर्दोश सिद्ध करतना नोंद केल्लें निरिक्षण म्हत्वाचें थारतां. कामुर्लीच्या शिक्षिकां कडल्यान मारपेट खंयच्या उद्देशान जाला आनी कागाळी प्रमाण मारपेट खऱ्यांनीच गंभीर आसा काय? हें म्हत्वाचें थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
