भांगरभूंय | प्रतिनिधी
बायल चालका आड गुन्यांव नोंद
पणजी: शिवाले ‘हीट अॅण्ड रन’ अपघातांत बायल चालका आड हणजूण पुलिसांनी गुन्यांव नोंद केला. जाल्यार गंभीर जखमी दुचाकी चालक गजानन मोये (73, शिवोली) हांचेर गोमॅकाँत उपचार सुरू आसात.
हो अपघात आयतारा 7 वेर सकाळीं 8.27 वरांच्या सुमाराक मार्ना शिवोले हांगासरल्या लक्ष्मीनारायण देवळा कुशीक घडिल्लो. जखमी गजानन मोये हे आपल्या जीए 03 एजी 2560 क्रमांकाचे अॅक्टिवा स्कुटरी वेल्यान शिवोले सेंट अॅन्थनी चर्ची वटेन वताले. तांणी वाटेर चर्चींत प्रार्थने खातीर वचपी एके बायलेक लिफ्ट दिल्ली.
अपघात थळार दुचाकी पावतकच फाटल्यान येवपी एके अनवळखी मोटारीन दुचाकीक धपको दिलो आनी दुबावीत मोटारी सयत घडणूक थळा वेल्यान पळून गेली. ह्या अपघातांत दुचाकी चालक गजानन मोये गंभीर जाखमी जाले जाल्यार फाटल्यान बशिल्ली बायल किरकोळ जखमी जाली.
जखमी मोये हांकां शिवोलेच्या भलायकी केंद्रांतल्यान फुडल्या उपचारा खातीर बांबोळे गोमॅकाँत दाखल केला. थंय तांचेर उपचार सुरू आसात. जाल्यार फाटल्यान बशिल्ली ती बायल उपचारा उपरांत घरा गेली.
घडणुकेची म्हायती हणजूण पुलिसांक मेळटकूच तांणी घडणूक थळाचो पंचनामो केलो आनी अपघाताक कारण थारिल्ली जीए 03 एएच 9862 क्रमांकाची बलेनो मोटारीची वळख पटयली. उपरांत ही मोटार पुलिसांनी जप्त केली. मोटार चालक र्हिया शुक्ला (मूळ उत्तर प्रदेश) हिचे आड गुन्यांव दाखल केला. फुडलो तपास पुलीस हवालदार रुपेश शेटगांवकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
