भांगरभूंय | प्रतिनिधी
पणजीः देश-विदेशांतल्यान व्हडा प्रमाणांत पर्यटक गोंयांत मजा करपाक येतात. पूण हालीसराक घडपी कांय घडणुकांक लागून गोंयच्या पर्यटनाचे नांव इबाडपाक लागलां. गोंयची बदनामी जावपाक लागल्या. सोरो पियेवन वाहन चलोवप आनी अपघात करप, गाडी चलयतना जिवाक धोको निर्माण करपी स्टंट करून हेरांचो जीव धोक्यांत घालप निर्माण करप, बंदी आसतना दर्यादेगेर वाहनां व्हरप, गुन्यांवकारी कृत्यां करप अशें प्रकार घडटात. शिवोली वाठारांत कांय पर्यटक चलते गाडयेंतल्यान धोक्याचें स्टंट करतना दिसल्यात. हांगाच्या थळाव्या लोकांनी हुस्को उक्तायला आनी गाडये वांगडाच ह्या तरणाट्या पर्यटकांक कॅमेऱ्यांत कैद केल्यात.
शिवोलेच्या सेंट अँथनी इगर्जे लागसार मोटारींतल्यान वचपी पर्यटकांनी केल्लो हो स्टंट कांय जाणांनी पळयलो. दिल्ली नोंदणीकृत आशिल्ल्या गाडयेंतल्यान हो स्टंट करपी तरणाटो पियेल्लो आशिल्ल्याचोय कांय थळाव्या लोकांक दुबाव आसा.
चलपी गाडयांनी स्टंट करून येरादारींत आडमेळीं हाडपाचे प्रकार सोंसचें नात अशी शिटकावणी थळाव्या लोकांनी दिल्या. ह्या प्रकारांक लागून रस्त्यार भोंवपी हेर वाहन चालक आनी नागरिकांचो जीव धोक्यांत पडूं येता. अशा कृत्यां आड प्रशासनान खर कारवाय करची अशी मागणी थळाव्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
