भांगरभूंय | प्रतिनिधी
40 हजार फारायले; पुलिशेंत गुन्यांव दाखल
भांगरभूंय । प्रतिनिधी
म्हापशें: शिवोले गोवा डॅरीची दुदाची गाडी आडोवन आनी कामगारांक मारपेट करून 40 हजार रुपया फारावपाचो प्रकार शेनवारा सकाळीं घडलो. ह्या प्रकरणांत हणजूणें पुलिसांनी अज्ञात दुचाकी चालक दुबाविता आड गुन्यांव नोंद केला.
ही घडणूक सकाळीं 7.30 ते 8 वरां मदीं घडली. गोवा डॅरीची दुदाची गाडी घेवन चावक कृष्णा भोमकार आनी लोडर सादीर हे हरमल- मोरजी वाठारांत दूद घालून आनी पयशे वसूल करून शिवोले आयिल्ले. भोमकार फाटलीं 35 वर्सां ह्याच मार्गाचेर दूद घालपाचें काम करता.
शिवोले एसएफएक्स शाळे कडेन पावताच अॅक्टीव्हा दुचाकी वयल्यान आयिल्ल्या दुबावितान गाडी आडायली. तारीर पुला लागसार आपल्या आंगाचेर गाडी घालपाचो यत्न केल्ल्याचो ताणें आरोप केलो आनी धमकी दिली. त्याच वेळार थंय दोग जाण आयिल्ल्यान दुबावीत थंयच्यान गेलो. वाटेर शिवोले चर्ची लागसार दुबावितान दुचाकी आडवी घालून परतून दुदाची गाडी आडायली. गाडी आंगाचेर आयिल्ल्यान आपूण खाला पडलो आनी आपल्याक जखम जाल्ल्याचें सांगून आपल्याक हॉस्पिटलांत व्हरपाक सांगलें. हॉस्पिटलांत वचपा खातीर दुदाचे गाडयेचो लोडर सादीक दुबाविता वांगडा ताचे दुचाकीर बसलो.
दुबावितान दुचाकी शिवोली मुळाव्या भलायकी केंद्रांत व्हरनासतना दुसऱ्याच भितरल्या रस्त्यान व्हेली. थंय सादीक हाका मारपेट करून आनी धमकी दिवन ताचे कडले दुदाचे वसूल केल्ले 40 हजार रुपया घेवन तो पळून गेलो. दुबावितान हॅल्मेट आनी मास्क घातिल्लें. तशेंच दुचाकीच्यो दोनूय नंबरप्लेटी बागयिल्ल्यो.
ह्या प्रकारा उपरांत सादीक हांणी गाडयेचो चालक भोमकार हाका फोन करून घडणुकेची म्हायती दिली. उपरांत तांणी शिवोली पुलीस स्टेशनाचेर वचून कागाळ नोंद केली. हे कागाळेच्या आदारान हणजूणें पुलिसांनी अज्ञात दुबाविता आड गुन्यांव नोंद केलो. पुलीस ह्या प्रकरणांत फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
