भांगरभूंय | प्रतिनिधी
शिवोले : सेंट अँथनी चर्च ते वाडी शिवोले मेरेनच्या रस्त्याचें डांबरीकरण बेगीनूच करतले, अशी म्हायती आमदार डिलायला लोगो हांणी एके कार्यावळींत दिली. ह्या वाठारांत उदकाचीं पायपां घालपाच्या कामाक लागून रस्तो खणिल्लो. आतां उदकाचीं पायपां घालपाचें काम पुराय जालां. आदलीं उदकाचीं पायपां काडून ते सुवातेर नवीं बसोवपाचें काम सुरू आसा. जो मेरेन सगल्या घरांतली जोडणी काम पुराय जायतना तो मेरेन रस्त्याचें डांबरीकरण करप शक्य ना. हें काम सुरळीत जावपा खातीर हांगच्या घर धनयांनी सहकार्य करपाची गरज आसा. हें काम पुराय जाले उपरांत रोखडेंच डांबरीकरण करतले अशें आमदारान स्पश्ट केलें.
मजगतीं, पंच वांगडी फेरमिना फर्नांडीस हांणी दिल्ले म्हायती प्रमाण हांगचे सेंट एंथनी चर्च लागसार एफसी शिवोले क्लबा लागसारा गटार बांदकाम करतले. हाका लागून रस्तो खणटले. हो रस्तो सामकोच अशीर आशिल्ल्यान आसगांव ते शिवोली वाडी रस्तो बंद करचो पडटलो. हाका लागून १० ते १४ फेब्रुवारी मेरेन येरादारी हेर रस्त्यान वळयतले. हे विशींचो आदेश उपजिल्लोधिकार्यांनी काडिल्ल्याची म्हायती फर्नांडीस हांणी दिली. हे विशीं वाहन चालकांनी सहकार्य करपाचो उलो तिणें मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
