भांगरभूंय | प्रतिनिधी
डिलायला लोबोः शेतकारांक सगळे तरेची मजत करपाचे यत्न
भांगरभूंय । प्रतिनिधी
शिवोलीः सडयें आनी मार्ना पंचायती वाठाराक जोडपी शेत जमन राखपाचे सगळे तरेचे यत्न चल्ल्यात. जाता तितले बेगीन ही जमीन लागवडीक योग्य करतले, अशी म्हायती शिवोलीची आमदार डिलायला लोबो हांणी दिली.
आमदार लोबो हांणी सडयेची सरपंच दीपा पेडणेंकार, उपसरपंच निलेश वायंगणकार, पंच निशांत कळंगूटकार, ओमकार हरमलकार, मार्नाचे पंच संदेश हडफडकार, विलियम फर्नांडीस, फर्मिना फर्नांडीस, अमीत मोरजकार हांचे सयत शेतांत बांदिल्ल्या रस्त्याच्या वाठाराची पळोवणी केली.
सध्या शेतांत बांदिल्ल्या रस्त्याच्या सांकवा लागसार व्हड प्रमाणांत माती आसा. ती माती काडून उदकाक योग्य वाट मेळची हे खातीर यत्न आसा. फाटल्या कितल्याशाच वर्सां सावन ह्या शेतांत उदक सांचून उरलां. ही जमीन लागवडी खाला हाडपाचे टप्प्याटप्प्यान काम चल्लां. शेतकारांक जाता तितली मजत दितले, अशें आस्वासन ह्या वेळार आमदार लोबो हांणी दिलें. शेतांत उदक सांचून उरलां ताका शिंपणावळ खातें जापसालदार आसा, असो आरोप उपसरपंच निलेश वायंगणकार हांणी केलो. तांणी सांगलें, ह्या खारजाचें बांदकाम केल्लें. ह्या खारजांतलें उदक थेट शेतांत भरता. खारजांतल्या उदकाचो योग्य वापर करिनात. उरफाटे शेतांची वाट लागल्या. हाचेर ताकतिकेन उपाय येवजण करचे खातीर मशिनांचो वापर करचे खातीर मुख्यमंत्र्यान शेतकारांक अनुदान दिवचें, अशीय मागणी वायंगणकार हांणी केली.
जोड रस्तो तात्पुरतो उक्तो
मार्ना आनी सडयें पंचायतीक जोडपी शेतांतलो रस्त्याचें काम नोव्हेंबरांत सुरू केल्लें. सध्या ह्या रस्त्याचेर डांबरीकरण आनी सोबितीकरण करपाचें उरलां. फाटल्या कितल्याशाच दिसां सावन हो रस्तो बंद केल्ल्यान सेंट अँथनी चर्ची लागसारच्या रस्त्याचेर येरादारीची कोंयडी डाता. शाळा सुरू जाल्ल्यान विद्यार्थ्यांक सोयीचें जावचें तशेंच येरादारेची कोंयडी टाळचे खातीर मार्ना आनी सडयें रस्तो फक्त ल्हान गाडयां खातीर उक्तो केला. रस्त्याची माती घट जावचे खातीर एक पावसाळो वचप गरजेचें आसा. पावसाळ्या उपरांत रस्त्याच्या डांबरीकरणाचें काम पुराय करून रस्तो सगळ्या गाडयां खातीर उक्तो करतले, अशी म्हायती आमदार डिलायला लोबो हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
