भांगरभूंय | प्रतिनिधी
जयेश नायकः शिवोली मतदारसंघांतली काँग्रेसीची आमदार डिलायला लोबो हांणी भाजपांत प्रवेश केल्ल्यान ह्या विधानसभा मतदारसंघांतली राजकी समिकरणां पुराय बदल्ल्यांत. आमदार लोबो हांच्या निर्णया विशीं ह्या मतदारसंघांत समिश्र प्रतिक्रिया आयकुपाक मेळटात.
शिवोली मतदारसंघा भायलो उमेदवार ह्या मतदारसंघांत वेंचून येवपाचो विक्रम डिलायला लोबो हांणी केल्लो. इतलेंच न्हय जाल्यार मतदारसंघांतली पयली महिला आमदार थारिल्ली. मतदारसंघांत फक्त एक वर्स काम करून उण्या काळांत मतदारांचो विस्वास मेळोवपाक लोबो येसस्वी थारिल्ली. ताकाच लागून फेब्रुवारींत जाल्ले विधानसभा वेंचणुकेंत ती भोवमतान वेंचून आयिल्ली. लोबो हांकां काँग्रेसीचे तिकेटीचेर 9699 जाल्यार दयानंद मांद्रेंकार हांकां भाजपाचे तिकेटीचेर 7972 मतां मेळिल्लीं. लोबो हांणी भाजपांत प्रवेश केल्ल्यान मतदारसंघांतले भाजपा फुडारी दयानंद मांद्रेंकार हांच्या फुडारा विशीं प्रस्नचिन्न निर्माण जालां.
मांद्रेंकार हे चार खेपे शिवोली मतदारसंघांतल्यान वेंचून आयिल्ले. पूण फाटले दोन विधानसभा वेंचणुकेंत तांकां सेगीत हार घेवची पडली. ताका लागून तांच्या फुडारा विशीं प्रस्न निर्माण जाला. अशे स्थितींत लोबो हांचो भाजपांतलो प्रवेश ह्या मतदारसंघांतलीं समिकरणां पुराय बददलून उडयतलो. शिवोली भाजपा मंडळाच्या कांय वांगड्यांनी हे संबंदांत सादूर प्रतिक्रिया उक्तायल्या.
शिवोली मतदारसंघांत भाजपा वाडोवपाचो खरो वावर दयानंद मांद्रेंकार हांणीच केल्लो. शिवोली भाजपा म्हणल्यार दयानंद मांद्रेंकार अशें समिकरण जाल्लें. ह्या मतदारसंघांतल्यान सेगीत चार खेपे वेंचून येवपाचो विक्रम मांद्रेंकार हांणी केल्लो. पांचवे खेपे वेंचून आयिल्ले जाल्यार तेच मुख्यमंत्री जावपाचे, असो दावो तांच्या कार्यकर्त्यांनी केल्लो.
2017 चे वेंचणुकेंत विनोद पालयेंकरा हांणी तांकां हारयिल्लो आनी उपरांत फेब्रुवारी 2022 त जाल्ले वेंचणुकेंत डिलायला लोबो हांणी तांचेर जैत जोडलें. आतां लोबो हांणी भाजपांत प्रवेश केल्ल्यान फुडले वेंचणुकेंत भाजपाची तिकेट लोबो हांकांच मेळटली, असो विस्वास तिच्या कार्यकर्त्यांक आसा. सध्याची आमदार लोबो आशिल्ल्यान भाजपा तांकां कुशीक दवरपाक शकची ना. तशें जालें जाल्यार मांद्रेंकार हांकां वेगळो विचार करचो पडटलो. हे विशीं ती कसली भुमिका घेतात, ताचेर ह्या मतदारसंघांतल्या मतदारांचें लक्ष आसा.
भाजपा जो निर्णय घेतली तो आमकां मान्य आसतलो. पक्षाचे सुचोवणे प्रमाण आमी फुडें फुडारांत काम करतले. हे विशीं आनीक चड कांयच उलोवपाचें ना.
मोहन दाभाळे, अध्यक्ष, शिवोली भाजपा मंडळ
भाजपा खातीर आमी 15 वर्सां काम केलां, पूण उपरांत आमकां पक्ष सोडचो पडलो. आमदार डिलायला लोबो हांणी भाजपांत प्रवेश केले उपरांत आतां आमी लेगीत परतून भाजपांत वतले. पक्षा खातीर शिवोलेंत ही नवी सुरवात आसा.
उदय नार्वेकार, आदले पंच ओशेल
काँग्रेसीच्या आमदारांक भाजपांत घेवपाचो निर्णय हो भाजपाचो आसा. आमकां पक्षा वांगडा रावपाचें आसा. व्हड कश्ट आमी पक्ष घडयला. पक्षाचो वावर हे फुडेंय कायम दवरतले.
नारायण मांद्रेंकार, आदले अध्यक्ष शिवोली भाजपा मंडळ
शिवोलींत भाजपाक फाटले दोन खेपे सेगीत हार खावची पडिल्ली. ताका लागून ह्या मतदारसंघांत पक्षाक नव्या मुखामळाची गरज आशिल्ली. आमदार डिलायला लोबो हांच्या प्रवेशान पक्षाक नवें मुखामळ मेळ्ळां. मतदारसंघांत भाजपाक संजिवनी मेळटली. सत्ताधारी पक्षांत आशिल्ल्यान लोकांची कामां करपाक आमदाराक सोंपें जातलें.
हनुमंत नायक, सरपंच आसगांव.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
