भांगरभूंय | प्रतिनिधी
हरमलकार: बार्देस म्हाल छत्रपती शिवाजी महाराज समारोह समिती वतीन शिवजयंती
म्हापशें : छत्रपती शिवाजी महाराज हें देशाचें आराध्य दैवत. तांच्या धाडशीपणाची गाथा तरणाटीं आनी विद्यार्थ्यां मेरेन पुस्तका वरवीं पावपाक जाय, अशी इत्सा गोंयचे नामनेचे चित्रकार संजय हरमलकार हांणी उक्तायली.
म्हापशेंच्या हुतात्मा चौकांत छत्रपती शिवाजी महाराजांच्या अश्वारुड पुतळ्या लागसारा बार्देस म्हाल छत्रपती शिवाजी महाराज समारोह समिती आयोजीत कार्यावळींत संजय हरमलकार मुखेल सोयरे म्हणून उलयताले.
ह्या वेळार माचयेर मुखेल सोयरी म्हणून नगराध्यक्ष प्रिया मिशाळ, खासा सोयरे अॅड. परेश राव, समितीचे अध्यक्ष डॉ. गुरूदास नाटेकार, सचीव प्रा. रवींद्र फोगेरी, भांडारी विश्वास नागवेंकार, उपाध्यक्ष शंभू भाऊ बांदेकार, प्रकाश धुमाळ, नगरसेवक सुधीर कांदोळकार, एकनाथ नागवेंकार आनी गोविंद शिरोडकार हाजीर आशिल्ले.
पाठ्यपुस्तकांत शिवाजींच्या गुणांचो आस्पाव आसचो. जिजाऊ मातेन शिवाजी कसो घडयलो हाची म्हायती जाय. जिवाक जीव दिवपी निश्ठावान मावळ्यांच्यो कथा जाय. घराघरांनी शिवराय पावपाक जाय अशें हरमलकार हांणी फुडें म्हणलें.
सुरवातेक नगराध्यक्ष प्रिया मिशाळ हांणी छत्रपतींच्या फोटोक फुलांचो हार अर्पण केलो. येवकार आनी प्रास्तावीक डॉ. गुरूदास नाटेकार हांणी केलें. अॅड. परेश राव हांणी मनोगत उक्तायलें. सरकारी मुळाव्या आनी माध्यमीक विद्यालयाच्या विद्यार्थीनींनी शिवरायांचें पाळणें गीत सादर केलें. ज्ञानप्रसारक विद्यालयाच्या विद्यार्थ्यांनी पोवाडो सादर केलो.
शिक्षिका सुफल पेडणेंकार, निशा नमशिकार, अनुष्का सावंत, वैशाली डोंगरे, प्रसाद चिखलीकार हांचो ह्या वेळार भोवमान केलो. एकनाथ नागवेंकार हांणी घोशणां दिल्या. आदले उपसभापती शंभू भाऊ बांदेकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
